Mediu Ambiente xustifica Caliao como forma de xenerar emplegu

La viceconseyera de Mediu Ambiente, Belén Fernández, xustificó la construcción del banzáu de Caliao diciendo que se trata de "una bona oportunidá pa xenerar emplegu y actividá".

Nesti sen, Fernández aseguró que la promoción d'obres públiques saca a la lluz "ufiertes o posibilidaes de llograr proyectos a precios premediaos". Asina lo esplicó la viceconseyera en declaraciones a los medios enantes de participar nel actu de clausura del cursu de xestión d'agües entamáu pola Federación Asturiana d'Empresarios (FADE).
  
Fernández, que refugó facer declaraciones sobre la oposición d'Izquierda Unida a la construcción del banzáu, apuntó que tovía se ta a la espera de los estudios realizaos pola Confederación Hidrográfica pa que'l proyeutu salga alantre, pero sí recordó que les previsiones apunten a que la diferencia ente disponibilidá de recursos y demandes de suministru va siguir creciendo pol cambiu climáticu.
  
"A esti problema ye al que tien que dar respuesta'l Principáu", siguió. Asina, señaló l'apuesta del Gobiernu pa solucionar esti asuntu, al tiempu que s'aprovecha la capacidá del sector del agua n'Asturies pa xenerar emplegu.
  
Nesti sen, calcó en que, a pesar del momentu actual de crisis, el sector del agua na so visión integral ta siendo una palanca de producción d'emplegu nel país que'l Principáu ta sabiendo aprovechar, según Fernández. Amás, afirmó que'l sector da emplegu n'Asturies a 160 persones.
  
Esta apuesta del Gobiernu demuéstrase, según dixo, nes 33 obres de saniamientu y depuración licitaes n'Asturies dende'l 2009, que suponen "una meyora en términos de calidá y bienestar social, especialmente nes zones rurales".