Francia va presentar un proyeutu de llei pa prohibir el 'burka'

El Gobiernu francés va presentar un proyeutu de llei pa imponer una prohibición del 'burka', pese a que'l pasáu marzu'l Conseyu d'Estáu, l'órganu consultivu supremu, desaconseyó la midida.

Esta decisión tomóse mientres una xunta celebrada esti miércoles nel Elíseo y convocada pol presidente francés, Nicolas Sarkozy, na que participaron el primer ministru, François Fillon, los líderes de la mayoría na Asamblea Nacional y los presidentes de los grupos parlamentarios. El proyeutu de llei va presentase a mediaos de mayu y el Parllamentu va realizar una votación en xunetu, según los medios franceses.
  
Al otru día de les eleiciones rexonales del mes pasáu, Sarkozy fizo alusión a la posibilidá de presentar un proyectu de llei sobre'l 'burka'. Pero'l presidente del grupu d'Unión por un Movimientu Popular (UMP) na Asamblea, Jean-François Acopé, consideró que la proposición de llei que presentó esti grupu en xineru, roblada por 220 diputaos, diba permitir l'aprobación d'una llei nun plazu de tiempu cortu.
  
El xefe d'Estáu quier que nel proyeutu de llei apaezan como argumentos principales pa la prohibición del 'burka' la dignidá de la muyer y el respetu a los valores de la República. Según una de les persones encargaes d'ellaborar el testu, citada pol periódicu 'Le Figaro', la ministra de Xusticia, Michèle Alliot-Marie, va ser el que va intentar defender el testu nel Parllamentu.