L'Academia celebra'l Día del Llibru col 'Catecismu de Villaviciosa'

Con motivu de la celebración del Día del Llibru, l’Academia de la Llingua Asturiana va presentar una reedición del ‘Catecismu de Villaviciosa de 1916’ de Luis Sánchez García.

L’actu tendrá llugar el prósimu vienres, 23 d’abril, a les 19 hores, nel Teatru Riera de Villaviciosa, y nél intervendrán Lluis Portal (Asociación La Compaña del Ronchel), Roberto González-Quevedo (Secretariu de l’ALLA) y Manuel Busto (Alcalde de Villaviciosa).

Esti catecismu foi escritu y publicáu en 1916 por Luis Sánchez García (Uviéu, 1879), cléricu en delles parroquies de Parres, Piloña, Ribadeva y Villaviciosa. En 1943 pasa a la parroquia de Fuentes, onde continúa realizando’l so llabor pastoral hasta la so muerte, ocurrida’l 29 de xineru de 1964.

Trátase de la primera doctrina escrita n’asturianu, inspirada nel Catecismu Romanu, El Perrone y les Sagraes Escritures. Nun pretende facer un testu pa espertos, esplica nel prólogu: “Ta escrito pa rapazos (y anque sea pa vieyos d’aldea y xente sencilla), non pa tiólogos y doctores, qu’esos ya saben dir a les fuentes. Y ta asina en bable porque paez qu’asina llamará más l’atención de los rapaces y lierán más; y liendo más, deprenderán más; y deprendiendo más... ¡Ai! home, va cambia’l tiempu, porque esti rema...-“, diz l’autor.

Luis Sánchez García escribió les 78 fueyes del catecismu nel periodu en que permaneció na parroquia de Vallés, pero col tiempu perdióse’l rastru del llibru, hasta qu’hacia 1980, el cura de Santogenia –actualmente párrocu de Nava-, Eduardo Solís, atopólu casualmente y púnxolo en conocimientu del tamién profesor y miembru de l’Academia de la Llingua, Roberto González-Quevedo durante la so estancia nel conceyu. Poco depués –en 1981- l’ALLA volvía a asoleyar el vieyu catecismu, añadiendo-y un prólogu del cura de La Pola, Carlos Sánchez Martino, natural de Vallés, y un epílogu de González-Quevedo, contestualizando la obra.