El PSOE va plantegar llendes al usu de les llingües nel Senáu

|

La vocera socialista nel Senáu, Carmela Silva, anunció que'l so grupu va votar la próxima selmana a favor de tramitar la iniciativa pa xeneralizar l'usu de les llingües na Cámara.

Sicasí, alvirtió de que, mientres l'alderique que se produza tres l'aprobación nel Plenu d'esta toma en consideranza, va plantegar "llendes" al usu de les mesmes. En rueda de prensa na Cámara Alta, Silva esplicó que lo que'l PSOE va apoyar la selmana que vien ye debatir la propuesta y que, poro, nun ta diciendo que sí a lo que nella se propón. Ello ye que consideró que cualquier reforma del reglamentu del Senáu tien de facese con "consensu", pa lo qu'aseguró que va intentar que'l Grupu Popular s'una al debate.
  
Sicasí, avisó de que si nun se llogra esti consensu, el Grupu Socialista nun va almitir el vetu del PP, al que criticó por "nin siquier plantegar" la propuesta d'ampliar l'usu de les llingües cooficiales. "Ye poco entendible negase a avanzar. Nun entiendo la negativa total y absoluta d'usar llingües que son patrimoniu de tolos españoles", añadió.
  
En cualquier casu, y anque nun se punxo plazos pa la negociación de la iniciativa que se va aprobar el miércoles que vien, la vocera socialista aseguró que "hai tiempu pa siguir intentando que tolos grupos s'unan". Asina, aseguró qu'hai senadores del PP que ven "con simpatía" l'abertura d'esti debate, polo qu'espera qu'éstos convenzan al restu del grupu por que cambie la so postura y vote favorablemente a la tramitación de la propuesta.
  
A pesar de nun querer desvelar la posición final que van adoptar los socialistes na negociación porque eso "torgaría aspirar a la unanimidá", Silva dexó claro que la propuesta de los 34 senadores "nun tien nada que ver col sentir del Grupu Socialista", que, nel momentu oportunu, va plantegar "les llendes al usu de les llingües nesta Cámara".
 
llo ye que Silva esplicó que, desque se rexistró la iniciativa'l pasáu mes de xineru, los grupos fueron calteniendo contactos al respecto, polo que'l restu de senadores conocen yá la posición del Grupu Socialista. Va ser nel plazu de presentación d'enmiendes y nel debate posterior cuando'l PSOE fixe oficialmente la so postura.
 
En contra d'ampliar el presupuestu

Según s'estima na memoria económica qu'acompaña al proyectu de los 34 senadores, el fechu de que los parlamentarios puean espresase n'eusquera, castellán, catalán o valencianu en tolos ámbitos del Senáu tendría un costu añal de 120.000 euros.
  
Sobre esta cuestión, Silva mostróse en contra de "ampliar" el presupuestu de la Cámara Alta, polo qu'apostó por "reorganizalo", pese a qu'encamentó que'l costu d'una posible ampliación del usu de les llingües nun seya determinante na decisión que tomen los senadores.

Entesa cree que va haber debate tranquilu
  
Depués del anunciu de la vocera socialista d'aceptar tramitar la propuesta, el voceru de la Entesa Catalana de Progrés, Ramón Aleu (PSC), mostró la so "satisfaición" y contó que'l fechu de que'l PSOE vote a favor de la negociación va permitir un "debate tranquilu".
  
Aleu, miembru d'un grupu que s'unió por unanimidá a la iniciativa d'ampliar l'usu del eusquera, el catalán, el valencianu y el gallegu, afirmó qu'espera que'l PP súmese a los votos favorables porque l'acuerdu significaría "una ampliación de derechos y la normalidá nel usu de les llingües oficiales na Cámara territorial". Como Silva, el voceru de la Entesa dixo nun entender la negativa de los senadores billingües del PP a dexar el debate.

Contador Estadistiques