Lieberman avisa de los efeutos violentos d'una de paz forzada

El ministru d'Asuntos Esteriores alvirtió que cualquier intentu de "forzar" una solución de paz va derivar n'incidentes violentos y nun agravamientu del conflictu n'Oriente Próximu.

"Cualquier intentu de forzar una solución ente les partes ensin establecer los fundamentos d'una confianza mutua namás van afondar el conflictu", declaró Avigdor Lieberman, mientres un discursu nuna recepción diplomática con motivu del Día de la Independencia. Anque nun se refirió directamente a Estaos Xuníos, la valoración paez una alusión velada, depués de que s'especulara con que l'alministración norteamericana puea proponer el so propiu plan a falta d'un proyeutu concretu ente israelinos y palestinos.

Pa Lieberman, enantes de cualquier negociación tien d'establecese una "nueva realidá" na qu'Israel tenga seguridá, los palestinos ganen prosperidá y ambes partes refuercen la so estabilidá.
  
Sicasí, el xefe de la diplomacia hebrea repitió que sobre la mesa nun pue debatise la división de Xerusalén, plantegada nel marcu d'una solución de dos estaos. "Ye la nuesa capital indivisible y eterna", sorrayó. "Ye'l nuesu derechu reafirmar, nel día d'alcordanza de la nuesa independencia nacional, que la ciudá, norte y sur, este y oeste, ta baxo soberanía d'Israel dafechu", añadió.
  
Coles mesmes, Lieberman declaró qu'a lo llargo de la so historia, Israel, que definió como una "isla de democracia" na rexón, robló dellos acuerdos de paz con "compañeros sinceros", como asocedió nel so momentu con Exiptu o con Xordania. Al so xuiciu, estos "históricos alcuerdos de paz" fueron posibles "tamién pol collaborador contestu internacional", según informaciones del diariu 'Yedioth Ahronoth'.
  
"L'Estáu d'Israel demostró en delles ocasiones que ta preparáu pa pagar un altu preciu pola paz colos sos vecinos y yá desocupó territorios que suponen trés veces el so tamañu", añadió. El ministru añadió que "nel últimu añu, el Gobiernu actual, de centru derecha, fizo munchos xestos significativos y midíes de construcción de confianza hacia los palestinos".