Los carteros manifiéstense n'Uviéu pola viabilidá del sector

Ente 300 y 500 carteros manifestáronse güei n'Uviéu esixendo midíes p'asegurar la viabilidá de Correos pola lliberalización del sector a partir del 2011.

Calculen que la midida va suponer una perda del 30% de l'actual plantiya, que na comunidá suma unos 1.300 trabayadores. La manifestación taba convocada por CC.OO, CSIF, CGT y Sindicato Libre de Correos, y diba encabezada por una pancarta na que se lleía'l lema 'Por la viabilidad de Correos, contra el apagón postal', amás d'otres como 'Llangréu en Llucha', escrita n'asturianu, o 'Salvemos el correo público y el empleo'. Ente los asistentes, la mayoría carteros d'Uviéu, Xixón, Avilés y zones del centru d'Asturies, había munchos ataviaos col uniforme de trabayu del repartu postal, puesto que nun se trataba d'una xornada de fuelga, y munchos tuvieron qu'utilizar hores llaborales p'acudir a la movilización.

La manifestación entamó na Estación de Renfe y acabó na plaza de La Escandalera. Ente los asistentes, figuraba Antonio Pino, secretariu xeneral de CC.OO Asturies.
 
En rueda de prensa ayeri, los representantes de CSIF, Francisco Calero, de CCOO, José Manuel Domínguez, de CGT, Aida Vega y del Sindicato Libre, Antonio Santiago, señalaron los motivos de la movilización, reflexaos nun trípticu repartíu güei mientres la mesma. Denunciaron el "abandonu" al que'l Gobiernu sometió a la empresa cola consecuente perda d'emplegos y afirmaron que de siguir asina tán condenaos a un "apagón postal".

"Precisamos un plan estratéxicu que defina'l modelu postal porque nun sabemos que va ser de nós a partir de xineru del 2011, cuando se lliberalice'l sector", dixo Domínguez, que calcó na necesidá de poner en marcha midíes que faigan de Correos una empresa fuerte.
  
Los sindicatos recordaron que se trata de la empresa "más antigua, con más de 500 años, y de mayor volume, con 65.000 emplegaos", polo que nun consideren lóxico que se-yos dexe al marxe de cualquier planificación.
  
Al respeuto de la situación nel Principáu, los sindicatos destacaron que se produxo una "tisoriada" na inversión que traxo consecuencies nes plantiyes y nos servicios, llegando a incumplise la llei postal a valir.
  
Por too ello los sindicatos punxeron en marcha una campaña de protestes qu'inclúi, amás de la movilización de güei, paros de 20 minutos, asamblees y repartu d'información y que va acabar el 10 de xunu con una fuelga xeneral "si'l Gobiernu nun fai nada pa remedialo".