En 2009 namás hubo una quexa a la Procuradora sobre l'asturianu

La Procuradora Xeneral, Mª A. Fernández Felgueroso, namás recibió una quexa sobre l’asturianu en 2009; un ciudadanu de Llangréu que denunció l’incumplimientu de la toponimia.

El ciudadanu quexóse a la Procuradora denunciando'l incumplimientu del Decretu del Principáu d'Asturies 73/2005, del 7 de xunu, pol que se determinen los topónimos oficiales del Conceyu de Llangréu, “yá que les señales de carretera dependientes del Principáu namás s'especifiquen en castellán, escaeciendo les denominaciones de los topónimos establecíes nel citáu decretu”

Felgueroso admitió a tramite la quexa, dictándose resolución de conclusión formulando a la Conseyería de Mediu, Ambiente, Ordenación Territorial ya Infraestructures la suxerencia que de manera progresiva, “acordies coles sos disponibilidades presupuestaries y nel momentu de la so anotación”, adecuen les señalizaciones de les carreteres del conceyu de Llangréu, conforme a les denominaciones toponímiques oficiales.

Suxerencia que foi formalmente aceptada pola Alministración Autonómica y qu’anguaño ta en siguimientu pola Procuradora Xeneral. Sicasí, dende la Conseyeróa d’Infraestructures, indicaron que los camudamientos nes señalizaciones namás se facíen cuando tolos conceyos polos que circula la carretera tienen aprobaos la so toponimia.

Nel procesu, Felgueroso solicitó un informe a la Conseyería de Cultura, qu’indicó que’l procesu de recuperación toponímicu ye gradual, qu’amás la Conseyería desenvuelve diverses campañes informatives p'animar a vecinos ya instituciones a emplegar los nomes tradicionales, “estes campañes van dando progresivamente los sos frutos, como amuesa'l fechu de que les guíes telefóniques editaes pal periodu 2007-2008 contemplen yá la toponimia oficializada”.

Dende Cultura afitaron amás que l’anovación de la rotulación toponímica de víes públiques y carreteres d'Asturies, nun ye competencia de so. Polo que la Procuradora solicitó un nuevu informe a la Conseyería d'Infraestructures, Política Territorial y Vivienda (anguaño, Conseyería de Mediu Ambiente, Ordenación Territorial ya Infraestructures) y tres delles reiteraciones, finalmente tien entrada, señalando que: “vien siendo práutica habitual d'esta Conseyería proceder al camudamientu de señalización namás cuando tolos Conceyos polos que circule la carretera tienen aprobaos la relación de los topónimos oficiales correspondientes”.

Felgueroso apuntó na resolución que’l Decretu 73/2005, pol que se determinen los topónimos oficiales del Conceyu de Llangréu, nun establez nes sos disposiciones la necesidá d'adecuación progresiva, acordies coles sos disponibilidades presupuestaries y nel momentu de la so anovación, de les rotulaciones en víes públiques y carreteres, lo mesmo que de mapes y planos oficiales a les formes toponímiques aprobaes, tal que sí s'establez nos distintos decretos de toponimia aprobaos pa otros conceyos.

Pero señala que “nun ye menos ciertu que debe llevase a cabu, dáu'l calter oficial de les denominaciones, polo que trescurriendo 4 años dende l'aprobación del Decretu pal conceyu de Llangréu, faise aconseyable que dicha sustitución vaya realizándose de xeitu progresivu y conforme a les disponibilidades presupuestaries”.