El PAS pide a IU que salga del Gobiernu “si ye que-y queda dignidá”

El PAS diz nun entender como IU pue tar nun executivu como’l d’Areces y denuncia que nun hai más que silenciu "ente los atropellos sobre los derechos de los funcionarios”.

El Partíu Asturianista vien siguiendo la “incoherente ya indigna presencia d'Izquierda Xunida-Bloque por Asturies nel Gobiernu d’Asturies y nun entendió nunca cómo ye posible convivir nun gobiernu nel que se ye cómpliz de la marxinación llingüística que sufren munchos asturianos, diciendo defender a éstos”.

La organización diz que nos últimos tiempos, esta situación fíxose inda más inesplicable, una y bones el Gobiernu d’Asturies, “del que nun s'escaezan, forma parte tamién IU-Bloque por Asturias”, felicítase porque los funcionarios nun puedan usar l'asturianu cola alministración.

Poro, el Partíu Asturianista, pide a esta formación, que si inda tienen un pocu de dignidá, abandone'l Gobiernu. “¿O ye qu'acasu tán nel executivu asturianu namá p'asitiar a los sos dirixentes en puestos bien remunerados ensin importar lo que faigan los sos collacios de Gobiernu?”, entruguen dende la formación.
 
Pal PAS, en toos estos años de Gobiernu de coalición nun se fixo más que dar pasos de tras na normalización del asturianu, “cuestionando inclusive agora la Llei d’Usu del asturianu, que consiguió'l PAS nel tiempu del Gobiernu de Marqués, y que a día de güei sigue siendo'l mayor llogru pa la nuesa llingua, y l'única base llegal que dexa que el so usuarios defendan ante los tribunales d’ataques como'l sufríu pol funcionariu Xurde Blanco”.