Neños de Gambia van recrear un derbi ente'l Sporting y l'Uviéu

La ONG Asturies por África entama un partíu de fútbol ente neños de Gambia, nel que los mozos ente 15 y 17 años van recrear un derbi ente los equipos del Sporting y l'Uviéu.

L'alcuentru celebraráse'l próximu 6 de xunu na población de Ndungu Kebbeh. El lema del partíu va ser 'El derbi que mos une'. Miembros de Asturies per África yá empecipiaron los contactos con responsables de los dos equipos de fútbol asturianu pa pidi-yos les correspondientes equipaciones, pa que puedan lluciles los neños africanos nel so particular derbi.
  
L'actor y presentador de la Televisión del Principáu d'Asturies, Joaquin Pajarón, y el direutor d'Épica Films y ex concursante de Gran Hermano, Iván Armesto, van representar a les aficiones azul y roxiblanca respectivamente nel derbi ente'l Sporting de Xixón de Aljamdu y el Real Uviéu de Ndungu Kebbeh. Son les dos escueles que contribuyó a construyir la ONG.
  
Según informó la organización a Europa Press, los uniformes de los árbitros va facilitalos el colexáu internacional asturianu Manuel Enrique Mejuto González. Al acabar el partíu, ta prevista una comida de confraternización, compartiendo arroz y corderu pa tolos participantes y pal pueblu.
  
Nos próximos díes dirán perfilándose más detalles del alcuentru, que van dir faciéndose públicos a midida que s'avere la fecha del partíu. Va haber una 'Fila cero' pa recaudar fondos pa los proyeutos que desarrolle Asturies por África, una ONG de Cooperación al Desarrollu ñacida a primeros del 2008 coles mires de dotar a les zones deprimíes d'África instrumentos pal so desarrollu al traviés de proyectos sociales, educativos y sanitarios.