El Xulgáu d'Avilés archiva la denuncia sobre la güesa de Llaranes

El Xulgáu d’Instrucción númberu ún d’Avilés archivó la denuncia de ‘Memoria y República’ sobre la Güesa de Llaranes, al nun considerar el tema como penal, sinón alministrativu.

FAMYR nun comparte esta resolución, “la cual enmárcase nun clima xudicial bien adversu pa los xueces que quieran tener sensibilidá coles victimas del Franquismu, tres el procesamiento del Xuez Garzón, y dientro de les llendes d'una Llei de Memoria Histórica insuficiente, que nun estableció'l calter obligatoriu de la intervención xudicial pal llevantamientu y protección de les güeses”.

FAMYR ta valorando la posibilidá de recurrir l’autu xudicial, que considera un grave precedente, “d'equí p'arriba cualesquier pue asesinar a daquién, soterralu nuna finca, denunciar qu'atopó restos humanos provenientes d'una güesa común del franquismu, y automáticamente con ello evitar la intervención xudicial y la persecución penal”.

L’asociación considera qu'énte'l menor niciu d'esistencia d'un cadabre soterráu illegalmente tienen de ser los xueces el que intervengan ya investiguen, “lo demás ye una clara neglixencia que xenera indefensión nes victimas de cualesquier crime, máxime nel casu de les victimas del Franquismu”.

FAMYR, énte la negativa d'intervención de les autoridaes xudiciales y del Delegáu del Gobiernu, volvió unviar per tercer vegada, en menos d'un mes, petición de xunta al Viceconseyeru de Vivienda y Bienestar Social, Ángel González, ensin alcontrar respuesta.

L’asociación califica d’esmolecedor la llentitú y falta de voluntá política d'intervención del Principáu y del Conceyu d'Avilés, “qu'entendemos respuende a la mesma tibieza con que s'aprobó una insuficiente Llei de Memoria Hestórica, y que diches autoridaes son preses del so sofitu a la mesma”.

La Federación Asturiana de ‘Memoria y República’ preve empecipiar movilizaciones nes próximes selmanes si nun se tomen midíes efeutives poles autoridaes, “tantu pa evitar la destrucción de dicha fuesa per parte de les obres del PEPA, como pa llograr una exhumación, en debíes condiciones acordies con losprotocolos de Naciones Xuníes, de los cadabres ellí esistentes y l'aclaración de les circunstancies de diches muertes”.