Buendía apuesta pola modernización de la llinia de Feve

Francisco González Buendía, indicó en referencia al proyeutu pal mini-AVE del Cantábricu que "ye bienveníu" y añadió que consideren más apropiao la modernización de Feve que l'AVE.

En declaraciones a los medios enantes d'entamar la Comisión d'Infraestructures, Medioambiente y Ordenación del Territoriu na Xunta Xeneral del Principáu d'Asturies destacó que'l Principáu siempre defendió que "nun quieren un AVE del Cantábricu de toes toes", y añadió que siempre apostaron pola modernización de Feve, que yá cuenta con una percorríu pela mariña.

"Sabemos que Feve nun ye un sustitutu del AVE pero creemos que ye una infraestructura correcta pa cohesionar el territoriu y el so modernización sería meyor que l'AVE", dixo'l conseyeru d'Infraestructures, Medioambiente y Ordenación del Territoriu, refiriéndose al proyeutu anunciáu pol ministru de Fomentu, José Blanco,
  
El conseyeru recordó amás que la prioridá pal Executivu asturianu siempre foi la conexón ferroviaria cola meseta.