Suatea esixe una convocatoria de negociación sobre les oposiciones

|

Suatea esixe la convocatoria d'una mesa de negociación sobre la ufierta pública de places de Secundaria, “pues  hai munchos aspeutos que ye necesariu correxir y ameyorar”.

Ente les coses que quieren plantegar destaquen la so oposición a la ufierta, “por ser dafechu insuficiente daes les necesidaes reales de Asturies, onde tán rexistrándose un eleváu númberu de xubilaciones que nun se van a cubrir, y amás desdexándose la convocatoria de la mayoría d'especialidaes de secundaria, incluyida tola FP, yá que namás hai ufierta en cinco árees en total”.

Pal sindicatu, Asturies queda la última na ufierta de places y ye la convocatoria del Estáu más exigua, “convirtiendo Asturies nel paraísu de la precariedá, y provocando inevitablemente la fuga d'opositores mientres rexistramos la más alta tasa d'avieyamientu ente'l profesoráu”. Amás, señalen que siguen ensin ver per nenguna parte un pautu d'estabilidá qu’amenorgue'l porcentaxe de interinidá, “como tamién ye una realidá n'otros territorios del estáu”.

Tamién falen de situaciones inaceptables dende'l sentíu de la imparcialidá, “como’l sistema entamáu n’Asturies de la mano del ineficaz y ayenu al mundu educativu Institutu Adolfo Posada o les consecuencies d'una presunta parcialidá nel  tema del nomamientu de los vocales que conformen los distintos tribunales”.

Dende Suatea esixen que la próxima convocatoria d'oposiciones enmiende afechiscamente esos aspeutos, “evitando asina que de nuevu puean dexar cayer acusaciones de falta de tresparencia ya irregularidaes de diversa índole, que pa nada ayuden a crear un clima afechu nes condiciones de la enseñanza pública asturiana”.

 

Contador Estadistiques