Entamen un cursu d’asturianu faláu pa profesionales de la RTPA

La Direición Xeneral de Política Llingüística y la RTPA entamen un cursu online de formación en llingua asturiana dirixíu a los profesionales de la radiotelevisión pública asturiana.

El plazu de matrícula remata'l 26 d'abril y el cursu va desenvolvese ente'l 10 de mayu y el 21 de xunu, con una duración total de 60 hores y la collaboración del Institutu Asturianu d'Alministración Pública (IAAP) 'Adolfo Posada'.

El cursu tien una orientación práutica y quier animar, al traviés de numberosos exercicios y situaciones, al usu oral y escritu de la llingua asturiana. Recueye los normes básiques de la correcta escritura del asturianu y fai posible un acercamientu prácticu al so usu n'ámbitos cotidianos: el trabayu, el mediu urbanu, los viaxes o les nueves tecnoloxíes, con especial atención al llinguaxe periodísticu.

Esti cursu, denomináu "Falar y más falar", va tar dirixíu por profesionales na materia, que van realizar una tutoría personalizada a caún de los participantes. Cola organización d'esti cursu, según la Conseyería de Cultura, dan cumplimientu a ún de los oxetivos de normalización social del asturianu nos medios de comunicación.