Marcelino Álvarez: “El CMPA tendría que tener un serviciu de normalización”

Marcelino Sánchez Álvarez, Llaviana (1987), ye estudiante de Ciencies Polítiques, militante en delles asociaciones de mocedá, culturales y vecinales, amás, dende fai un mes ye’l nuevu presidente del Conseyu de la Mocedá del Principáu d’Asturies.

¿Ta faciedo’l Principáu abondo pola mocedá d’Asturies?

Nós somos parte de l'Alministración Autonómica, polo tanto vémonos incluyíos nel Principáu d'Asturies. Somos un ente formáu por mozos y asociaciones. Quien toma les decisiones nel CMPA ye la propia mocedá.

El CMPA ye un intermediariu ente la mocedá asturiana, asociada y non asociada, y la mesma Alministración. Si un mozu tien cualesquier problema cola alministración, puede recurrir a nós, solicitar la nuesa ayuda. Pela nuesa parte nun hai nengún abandonu. Pa poder saber si realmente hai un abandonu dela mocedá, ye necesariu que se convoque al Conseyu Rector del Insitutu Asturianu de la Mocedá. Ye la única forma de valorar y analizar resultaos sobre les polítiques de mocedá tomaes n'Asturies nos últimos años y poder asina marcar nueves directrices pal futuru

Falen de facer de la vivienda y la participación xuvenil los grandes exes d'actuación del mandatu, ¿cómo van desendolcase estes iniciatives?

Unes llabores realizaos en materia d'emancipación según los resultaos periódicos del Observatoriu Mozu de Vivienda. Vamos collaborar cola Conseyería de Vivienda y Bienestar Social na realización de diverses campañes pa que los mozos puean conocer les distintes ayudes qu'ufierta l'alministración autonómica pal arriendu. Gracies en gran parte a la campaña de “Javi el Heavy”, realizada pol CMPA y la Conseyería de Vivienda y Bienestar social, consiguióse dar a conocer ente los mozos les ayudes al arriendu. Amuesa d'ello ye que les ayudes escosáronse na pasada convocatoria.

Sobre participación xuvenil, vamos fomentar la creación de nuevos conseyos locales de la mocedá, y vamos siguir col trabayu realizáu hasta'l momentu: asesoramientu, formación, dotar de recursos a les asociaciones. Tou ello recoyíu nel serviciu integral p'asociaciones “La Botica Asociativa”

¿Qué van facer dende’l Conseyu no que cinca a la llingua asturiana?

Vamos siguir participando y trabayando coles organizaciones en materia d'asturianu. Defendemos que tanto l'asturianu como'l castellán tengan el mesmu estatus. En materia d'asturianu, dientro de les nueses capacidaes, vamos intentar comunicanos y afayanos a la llingua que s’utilice

Pela mio parte, voi siguir col llabor que vengo realizando n'otres entidaes xuveniles: cualesquier mozu que quiera falar o escribime n'asturianu, nun va tener nengún tipu de problema. Ésti siempre tendrá respuesta na llingua que prefiera. Lo ideal sería qu'el CMPA tuviera una oficina de normalización pal Conseyu, les otres entidaes y la mocedá. El problema ye que nun tenemos la capacidá económica de costear un serviciu d'estes característiques, tamos intentando ser lo más billingües posible. Siempre colos escasos recursos colos que cuntamos.

¿Cómo ye la relación cola Alministración autonómica?

 El CMPA ye un ente autónomu de la mesma alministración del Principáu d'Asturies que depende de la Conseyería de Cultura. A pesar de qu'en delles ocasiones creemos qu'otros organismos de la mesma alministración nun entienden les nueses reivindicaciones, tamién consideramos que ye normal tener de xemes en cuando dalgún choque con éstos. Pela nuesa parte siempres vamos defender les midíes que se tomen democráticamente per parte de les asociaciones y la mocedá.

¿Por qué piensa qu’Areces nun se quier aconceyar col Conseyu de la Mocedá?

Nos últimos meses, siempres que dende'l CMPA se solicitó xunta col presidente del Principáu d'Asturies nunca se llogró respuesta dalguna. Siguirá solicitándose y reivindicando caltener una xunta con Areces. Nel Conseyu siempres vamos tar abiertos a dialogar tantu col Presidente como con cualesquier organismu o ciudadanu.

¿Qué supon que’l Conseyu Rector del Institutu Asturianu de la Mocedá, órganu coordinador de les  polítiques xuveniles del gobiernu, lleve ensin aconceyase dende 2007?

Creemos que ye necesariu que se convoque'l Conseyu Rector del IAM pa poder evaluar les acciones y el trabayu realizáu hasta l'actualidá en materia de mocedá, y d’esa forma marcar les directrices de les polítiques de mocedá pa los próximos meses. Tenemos que tener en cuenta que nos últimos años prodúxóse un cambiu social, cola crisis económica actual les esmoliciones de los mozos viéronse intensificaes, eses esmoliciones vienen marcando principalmente les materies de vivienda y empléu.

¿Cómo se coordina’l Conseyu del Principáu colos Conseyos locales d’Asturies y l’estatal?

Los Conseyos locales son federaciones independientes del CMPA que tienen la so propia autonomía pa trabayar. Toos ellos son entidaes miembro del propiu Conseyu de la Mocedá del Principau d’Asturies. El nuesu llabor ye la participación, asesoramientu y ayuda cuando éstos quieran; escuchalos y trabayar con ellos facilitándo-yos recursos. De la mesma el CMPA vien realizando un llabor dende va tiempu de fomentar la creación de nuevos conseyos. Nel pasáu añu y gracies al anterior equipu técnicu del CMPA consiguióse la creación del Conseyu de la Mocedá de Llaviana.

Al igual qu'un conseyu local ye entidá miembro del CMPA, nós somos miembros del Conseyu de la Mocedá d'España. Tamos encargaos de tresmitir la opinión y el puntu de vista de la mocedá asturiana, de les nueses entidaes miembru, nos distintos foros y asamblees del CME.