Areces recordó a Belarmino Tomás na Universidá Autónoma de Méxicu

“Equí acoyeron a Belarmino Tomás, Presidente del Conseyu Interprovincial d'Asturies y Lleón, precedente democráticu de les nueses instituciones autonómiques”, dixo Areces.

Asina faló’l pasáu vienres 16 d’abril el presidente del Principáu nuna conferencia qu’ufrió na Universidá Autónoma Nacional de Méxicu, Premiu Principe d’Asturies de Comunicación y Humanidaes 2009. Na mesma faló d’economía, crisis ya innovación, anque nel entamu del so discursu quixo recordar les rellaciones ente Asturies y Méxicu.

Areces recordó l'exiliu d’asturianos na ciudá de Méxicu, mentando a Belarmino Tomás, figura clave del Conseyu Interprovincial, anque nun fixo referencia a la proclamación de soberanía del Conseyu tres quedar aisllada Asturies de los otros territorios fieles a la República, viéndose obligáu’l Gobiernu a asumir competencias, como’l mandu del exércitu o la emisión de monedes y sellos.

El Conseyu Soberanu foi presidíu por Belarmino Tomás, tando representaes toles organizaciones polítiques y sindicales del bandu republicanu n’Asturies. Sicasí, el PCE, parte de la CNT y dirixentes d’UXT ya Izquierda Republicana criticaron la declaración. La idea del Conseyu Soberanu foi afitada por Belarmino Tomás y la mayoría de dirixentes de la FSA, anque Rafael Fernández criticó la decisión.

Dirixente pal que tamién tuvo pallabres Areces: “D'esta ciudá partió pal so regresu a la España democrática Rafael Fernández, el nuesu primer presidente del Principáu d'Asturies”. En referencia a qu’en 1978, ésti convertirióse nel presidente del Conseyu Rexonal d’Asturies, órganu provisional preautonómicu.