Beleño celebra les II Xornaes d'Estudiu

La capital de Ponga acueye'l 24 y el 25 d'abril les II Xornaes d'Estudiu 'Reconciliase cola tierra', empobinaes pola asociación Alfabetización y Deprendimientu del Asturianu.

Les xornaes entamen el sabadu 24 d’Abril a les 11 hores, la primer ponencia entamará media hora más tarde, de la mano del economista y profesor de la Universidá Autónoma de Madrid, David Rivas, qu'ufrirá una conferencia titulada 'Volver al campu: La custión rural, un debate inaplazable'.
 
Esi mesmu día, a les 17 hores, tendrá llugar 'Agricultura ecolóxica, fuente d’emplegu', por Norberto Ortega Gómez, técnicu de CADAE (Coordinadora asturiana de agricultura ecológica), na que tamién participaran dalgunos miembros d'ECOCESTU, grupu de consumu de productos ecolóxicos.

Al día siguiente, vuelven les conferencies de la mano del escritor Xandru Martino, qu'a les 11.30 falará del aprovechamientu económicu na toponimia de Ponga. A les 13 hores, Xuan Candamo y Nacho G. Pandavenes van presentar la revista 'Atlántica XXII'. Les xornaes tamién tendrán la so parte lúdica, asina, el sábadu a les doce de la nueche va baillase una Danza Prima.

Les actividaes tán empobinaes pola asociación cultural Alfabetización y Deprendimientu del Asturianu (AYDA), col sofitu del Gobiernu d'Asturies y el Conceyu de Ponga.