El Bloque pide respetu a la toponimia na Vuelta a Asturies

El Bloque pidió a Cristina Mendo, responsable de la Vuelta a Asturies, y al Direutor de la RTPA, José Ramón Pérez Ornia, que va tremitir la prueba, respetu a la toponimia oficial.

A finales d’esti mes escomencipia otra edición más de la Vuelta Ciclista a Asturies, ún de los acontecimientos deportivos más importantes que se celebren n’Asturies y que tien una repercusión a nivel mundial, por eso’l Bloque por Asturies, al traviés del so Secretariu Xeneral, Roberto Colunga, decidió igual que l’añu pasáu recordá-y a la organización de la prueba y la televisión pública asturiana qu’use la toponimia oficial, "por respetu a la llei y a los nomes tradicionales per onde pasa la carrera".

La organización apunta que la toponimia oficial ye’l resultáu del trabayu de campu que vien desenvolviendo estos últimos años con tantu esfuerzu y dedicación la Xunta Asesora de Toponimia del Principáu d’Asturies, "y paez normal qu’una prueba de la importancia de la Vuelta Ciclista a Asturies y qu’amás tolos años tien apoyu institucional respete los topónimos oficiales".
 
"No que cinca a la radio y la televisión pública asturiana sobra recordar la obligación que tienen, anque por desgracia la mayoría de les veces nun lo faigan, de respetar igual de pallabra que per escrito la toponimia aprobada por el Gobiernu asturianu", apunten pa finar..