'Os Reises' en Xixón

Vezos Astures,  presenta mañana 'Os Reises del Valledor, Úa mazcarada d’inverno nel occidente Asturiano' a les 19.30 hores nel xixonés Antiguu Institutu.

Esti documental, que yá foi presentado en La Puela y n’Uviéu, ellaboróse col material recoyíu na recuperación fecha pol grupu en xineru del añu 2009 nos pueblos de Vilalaín, Fonteta y San Salvador del Valledor, depués de más de 50 años ensin facese. Dellos vecinos collaboraron dando’l so testimoniu y les sos vivencies pa iguar esti documental.
 
Esti dvd ye amás d’un testimoniu de la propia recuperación, el material audiovisual más importante y únicu sobre les mazcaraes d’iviernu n’Asturies que anguaño existe. Cuntó amás cola collaboración de xente cabezalera de la cultura asturiana como Xosé Ambás, Diego Pangua o Naciu i Riguilón.
 
Dende Vezos Astures sorrayan l’interés d’etnógrafos propios y ayenos qu’ellí taben pa rexistralo, sobro manera’l portugués Helder Ferreira, responsable del Proyeutu Europeu pa la recuperación, promoción y mantenimientu de les mazcaraes, que recoyó abondu material y yá ta asoleyáu nel volume II de la espublización hispano-portuguesa 'La máscara ibérica', onde se fai un estudiu de les mazcaraes peninsulares y onde Asturies apaez representada con toles mazcaraes qu’anguaño se siguen faciendo.
 
Según indiquen dende Vezos Astures, el so llabor lleva años empobináu al espardimientu de la cultura tradicional y "amuesa d’ello ye esti documental sobre los Reises del Valledor, pero siguimos trabayando nesti sen con delles esposiciones sobre les mazcaraes d’iviernu n’Asturies que naguamos por llevar a tolos conceyos d’Asturies".