Marcelino Marcos

Queríos llectores, ye pa mi una enorme satisfacción poder aprovechar la oportunidá que me brinda Asturies.com, por cuenta del so 25 aniversariu, pa dirixi-yos unes palabres nesta publicación conmemorativa; y ye una satisfacción porque si tán lleendo estes ringleres, toi seguru dafechu de que tenemos munchos puntos de vista en común. El primeru, ente dalgunos otros que darréu-yos voi treslladar, ye qu’una llingua ye un rasgu fundamental de la identidá individual y colectiva, amás d’un mecanismu esencial pa espresar los valores culturales.

Un idioma ye como una especie de depósitu de memoria colectiva d’una comunidá, ye’l reflexu de les nuestres tradiciones, de les nuestres rellaciones sociales y de los nuestros valores morales; ensin escaecenos de que pue convertise nuna oportunidá y un instrumentu d’apoyu al desenvolvimientu.

Ye una ferramienta de comunicación y de cultura, lo que significa, polo menos pa mi, que nun hai idiomes de primera o de segunda; toles llingües tienen el mesmu valor, por muncho qu’intenten dalgunos amarutar el tema con consideraciones pseudointelectuales relatives a la utilidá y eficiencia comunicativa. Cualquier idioma ye igual de válidu como vehículu de divulgación y de comunicación, nun hai llingües más eficaces o más eficientes pa consiguir esti oxetivu. Un exemplu claru tenémoslu n’Asturies.com y los sos 25 años de vida, 25 ameritaos años d’actividá periodística en llingua asturiana. La mio felicitación y la mio más sincera norabona por eso.

A los detractores acérrimos de les llingües minoritaries yo diría-yos que despreciar y, sobre manera, desprestixar una llingua ye facelo colos sos falantes, porque l’idioma tresmite, ensin dulda, sabiduría, pero ye qu’amás ye una forma de vida; ye patrimoniu, pero tamién seña d’identidá.

Por too esto, creo, firmemente, que tenemos que facer tolo lo posible por caltener la nuestra llingua asturiana. ¿Cómo podemos facelo? Aprendiéndola, utilizándola, cultivándola, protexéndola, difundiéndola y, sobre manera, prestixándola dende tolos ámbitos y por tolos medios posibles. Nun teníemos que perder nunca de vista que’l fomentu de la diversidá cultural y llingüística humaniza’l fríu procesu de la globalización, siempre, ta claro, que tenga como oxetivu favorecer la comprensión mutua y el respetu.

Conteníos políticos al delláu, pienso que’l tema de les llingües ha ser tratáu, fundamentalmente, con criterios llingüísticos y culturales emitíos dende la tolerancia, l’autoidentificación y la consideración. Espero que la mio vocación política nun me llevare, nes mios reflexones, a salime muncho d’esi guión.

Un saludu afectuosu a toes y a toos.

Marcelino Marcos Líndez

Presidente de la Xunta Xeneral del Principáu d’Asturies