El diputáu d'Amaiur Jon Iñarritu ta n'Asturies pa facer campaña de Los Pueblos Deciden

Andecha Astur va contar col sofitu de Jon Iñarritu, diputáu del Congresu por Amaiur, nos primeros díes de campaña pa les eleiciones europees del 25 de mayu. El vascu va tar presente esta tarde na manifestación pola oficialidá qu'entama la Xunta pola Defensa de la Llingua Asturiana, nel actu académicu del Teatru Campoamor y na espicha qu'organiza l'Academia de la Llingua Asturiana nel Llagar Herminio de Cualloto.

 

Mañana, Iñarritu y los candidatos d'Andecha Astur na coalición Los Pueblos Deciden, nel qu'Amaiur ta integrada al traviés d'EH Bildu, van aconceyar cola Asamblea de Trabayadores de Tenneco, con un representante del comité d'empresa d'El Musel y colos vecinos de San Andrés de los Tacones. Por último, el domingu va collaborar nel repartu de propaganda previsto polos nacionalistes nel Rastru de Xixón a partir de les 11 hores.

 

Andecha Astur caltién una perbona rellación con Amaiur tres les negociaciones pa formar parte de la coalición Los Pueblos Deciden. Hai un mes, el diputáu Rafael Larreina treslladó a la cámara delles entruges de la organización asturiana sobre El Musel al Congresu y esta selmana fixo lo propio con cuestiones sobre la oficialidá del idioma y la especialidá docente.