Zapico: “Los asuntos públicos tán en manes de grupos de presión que tienen captaos a determinaos políticos”

“O entramos nel Gobiernu o hai temes que nun se toquen”, reflexona Ovidio Zapico (La Pola Llaviana, 1971). El candidatu a la presidencia d'Asturies de Convocatoria por Asturies, la coalición que conformen Izquierda Xunida (IX), Más País y Izquierda Asturiana (IAS), afirma que “el PSOE nun cambia”, polo que pretende condicionar la so aición política siendo relevante depués de la cita eleutoral del 28-M.

Les encuestes paecen dar un meyor resultáu a la coalición que nel 2019. ¿Tienen bones espeutatives pal 28-M?

Siempre dicimos que tenemos el vientu de cola. La perceición ye perbona. Los actos nos conceyos tán saliendo mui bien. Hai ilusión, que ye la materia prima del ésitu.

Nel alderique eleutoral y nes selmanes últimes vien dexando bien clara la so intención d’entrar nel Gobiernu próximu d’Asturies. ¿Por qué?

¿Quién nun se presenta pa gobernar? Sería realmente sorprendente. Nun sé si esiste un partíu con vocación permanente de ser irrelevante. Dende que se firma’l Gobiernu de coalición n’España queda clara la vocación que tien esta izquierda. Queremos dar utilidá a los nuesos votos, queremos cambiar les coses. El Gobiernu nun ye sólo privativu de les mayoríes, les fuercies non mayoritaries pueden aspirar a ser útiles. La teoría de la muleta quedó obsoleta llueu de los alcuerdos de Yolanda Díaz.

Cola FSA-PSOE hai puntos en común, pero tamién diferencies grandes con asuntos como Llei de Calidá Ambiental.

Queremos entrar al Gobiernu porque hai poco en común con cómo aborda’l PSOE los asuntos d’Asturies. Queremos entrar al Gobiernu porque’l PSOE nun cambia. Hai un cinturón d’intereses empresariales que queremos romper. Nun se va a un Gobiernu porque nos seduza’l proyeutu del PSOE, vase porque o IX-Convocatoria entra o hai temes que nun se toquen. La Llei de Calidá Ambiental ye l’exemplu de cómo’l dineru apodera al PSOE y determina la so actuación. Tenemos una alministración ambiental en manes de los grupos de presión. Nunca pasó, queremos entrar pa cambialo.

Nesta cita eleutoral el so partíu incorpora a Más País al alcuerdu que teníen con Izquierda Asturiana (IAS). ¿Qué aporten estes formaciones a la coalición?

Nun ye qu’aporten, ye que conformen la coalición que ye’l xerme d’un proyeutu. IAS ye una fuercia nacionalista, con trayeutoria y credibilidá; el so pensamientu teóricu sobre la izquierda ye de primer nivel. Más Asturies ye una fuercia política que llega a persones y coleutivos que la izquierda tradicional a veces nun somos quien a entender. Si miramos a Más País o Más Madrid vemos qu’un pensamientu nuevu enraigonó nel campu progresista y que tien vocación y capacidá de ser mayoritariu na izquierda porque, enraigonáu nella, tresciéndela. La suma de los trés partíos, más les persones independientes, xenerará un proyeutu políticu nuevu que pue madurar en mui pocu tiempu. Y repito, con vocación mayoritaria. El futuru d’Asturies nun s’escribirá coles organizaciones del presente, aunque sí dende elles.

Convocatoria defende un gran alcuerdu ciudadanu pa superar los problemes qu’afronta anguaño Asturies.

La perda del millón d’habitantes ye’l primer retu, tenemos que torgala convirtiéndonos en tierra d’acoyida y eso namái se consigue per aciu de la xeneración d’industria y emplegu. Ta na nuesa historia. L’actividá económica también nel campu ye necesaria y posible.

La nuesa Sanidá, l’atención primaria y l’atención social requieren una reforma de l’Alministración pa reordenar los recursos. Nun podemos perder los derechos sanitarios y sociales de los que disfrutamos. Yá mencioné’l medioambiente y la calidá ambiental que ta deteriorándose. La oficialidá ye una fonte de riqueza económica a la que tamos arrenunciando, porque la identidá impulsa a un pueblu en tolos sos aspeutos.

En definitiva, hai que decidir dende’l Gobiernu toos estos asuntos que son los que proporcionen una vida segura a la nuesa ciudadanía. La principal dificultá ya la mencioné: los asuntos públicos tán en manes de grupos de presión que tienen captaos a determinaos políticos.

La reforma del Estatutu d’Autonomía ye ún de los puntos principales del so programa eleutoral. ¿Cuáles son les cuestiones fundamentales a incluyir na nueva norma institucional?

La oficialidá y el blindaxe de los derechos sociales. Llueu habrá que facer toda una revisión d’una norma que lleva décades ensin actualizar. Oxalá sía frutu d’un alcuerdu de toa Asturies, incluyida la conservadora; nun se pue promulgar una norma básica ensin el concursu de toos y esto implica cesiones. Sólo deben quedar fuera los radicalismos escluyentes.

¿Por que nun salió alantre nesta llexislatura?

El Gobiernu nun lideró como correspuende al que tiene esa responsabilidá. Toos cometimos errores, pero’l del Gobiernu ye’l fundamental porque son mayoría. El procesu políticu foi chambón y entamáu per aciu de la intriga y les medies verdaes, tolo contrario al procesu que tanto allabamos que se fixo va cuarenta años. Amuesa a qué altor quedó esta llexislatura.

IX guarda un importante músculu municipal n’Asturies. ¿Qué oxetivos principales se marquen nos conceyos nesta cita eleutoral?

Tener más alcaldíes, que son el buque insinia del nuesu proyeutu políticu. Elles dannos fuercia material y estructura.