Xune: “Nestos tiempos modernos, onde paez que ta desfaciéndose tolo creao, nun queda más que resistir”

Nos momentos nos que l’aire sopla a la escontra, lo que toca ye siguir p'alantre. Ésa ye la filosofía de Xune Elipe (Villalegre, 1962), que faló con Asturies.com del trabayu últimu de Dixebra, ‘Tiempos modernos’, y de la situación de la música asturiana.

¿Ye ‘Tiempos modernos’ la respuesta de Dixebra a la situación que nos toca vivir anguaño?

Siempre fuimos un grupu mui apegáu a la realidá y nesta ocasión nun diba ser menos. Tol procesu de creación del discu –composición, ensayos, arreglos, grabación...– desenvolvióse nun contestu de crisis mui fondu y, lóxicamente, tuvo’l so reflexu nesti trabayu. Ye una especie de crónica de lo que ta pasando, onde’l pasáu y el presente s’entemecen; ehí tán les referencies a la Fuelgona del 62, a Mayu del 68, a la creación d’Ensidesa, a la represión franquista, pero tamién al 15M, a les movilizaciones mineres, a la represión policial actual... Trátase de conocer cómo foron les coses n’otru tiempu pa entender y, en cierta midida, dar respuesta a ésti nel que tamos.

El discu toma’l nome de la película de Chaplin, filmada nel 1936, en plena crisis económica mundial. ¿Qué paralelismos atopa cola época actual?

Cada ciertu tiempu’l sistema capitalista carez lo que llamen crisis cícliques. Esto d’agora nun ye más qu’eso. N’otros periodos hestóricos la salida de les élites dominantes a eses situaciones yera la guerra; na crisis actual optóse tamién por ella, pero non ente estaos, sinón ente clases sociales. La semeyanza ente lo que describe Chaplin en ‘Tiempos modernos’ y lo que tamos viviendo anguaño ye más que clara: alienación, paru, represión... Pero tamién llucha, compromisu, solidaridá...

¿Sorprende-y l’actitú pasiva de la sociedá énte los recortes y los ataques continuos al estáu del bienestar?

Tampoco ye que se pueda falar d’una pasividá xeneralizada. Siempre hubo una parte más o menos grande de la sociedá anestesiada o alienada, pero xunto a ella hai otra concienciada, combativa, con ganes de resistir y avanzar. Cómo sinón pueden entendese les distintes ‘marees’ –verde, blanca, malva, etc.– que tamos viendo nestos años. A midida que se vayan viendo llogros –tán ehí la paralización de los desallugos, lo de Gamonal, la sanidá madrilana, etc– va dir xuntándose más xente. Pasín a pasu tamos viendo cómo se pasa del ‘nun hai nada que facer’ al ‘sí se pue’. Lo que sí que sorprende ye la situación concreta de la sociedá asturiana, más averada al inmovilismu –sacante escepciones mui meritories– qu’a la respuesta de llucha, estraña nun país con una trayectoria de combate y rebeldía como’l nuestru, con unes clases populares que n’otru tiempu foron exemplu. Nesti procesu d’esmantelamientu ideolóxicu tuvieron muncho que ver los responsables políticos, supuestamente d’esquierdes, que gobernaron –o ayudaron a gobernar– Asturies nos últimos trenta años.

Los quince cantares de ‘Tiempos modernos’ desprenden enerxía y crítica per tolos llaos. ¿Ye ésti’l discu más ellaboráu de los doce que lleva’l grupu hasta la fecha?

Probablemente sí. El procesu partía xeneralmente del trabayu de composición previu de Primi (guitarrista), que llegaba al ensayu con temes que depués, ente toos, díbemos perfilando, tresformando, dándo-yos forma, aportando caún na so propia parte y tamién na de toos. Foi un trabayu fechu mui a comuña onde toos opinábemos de too. Tamién inflúi nesa sensación de fuercia que desprende’l discu la manera en cómo se grabó, rexistrando lo que ye la base –batería, baxu, guitarres y mesmamente dalguna voz– tocando al empar, eso dio-y lo que n’inglés se conoz como ‘punch’ –aplicáu al mundu de la música– y qu’a nós préstanos llamalu ‘puxu’.

Nes lletres repasen l’actualidá asturiana y tamién mundial, con un plizcu a la situación del pueblu griegu.

Como yá comentemos enantes, Dixebra ye una banda que quier reflexar (y reflexonar) sobre lo que pasa al nuestru alredor, fundamentalmente n’Asturies, pero tamién fuera d’ella. La nuestra fonte d’inspiración lletrística ta, por supuestu, no que tenemos más cerca, pero eso nun quita pa que nun nos interese y influya la realidá mundial. N’otros discos falemos de los neños de la cai brasileños, de la situación en Palestina o del ‘corralito’ arxentín. Nésti falamos sobre lo que ta pasando en Grecia dende una óptica mui crítica.

Amás, inclúin un tema dedicáu a la ciudá que vio nacer a Dixebra, Avilés. ¿Yera un momentu afayadizu pa ello?

Bono..., yera una especie de cuenta pendiente que teníemos. N’otres canciones anteriores yá falábemos de manera tanxencial de la nuestra ciudá –anque más bien habría que dicir comarca porque, fundamentalmente, los miembros de Dixebra repartímonos ente Avilés y Corvera–, pero nunca fixéremos una tema centráu esplícitamente nella. Con  ‘Química inorgánica’ nun facemos otro que describir l’ambiente y circunstancies nes que les nuestres xeneraciones medraron –Ensidesa, inmigración, contaminación, reconversión...–. En cierta manera ye un homenaxe a la ciudá y al tiempu en que crecimos.

Como ye vezu, na grabación contaron con un númberu ampliu de collaboradores.

Una de les característiques de los nuestros trabayos ye que siempre llamamos a un bon garrapiellu d’amigos y amigues pa qu’andechen con nós nellos. Nesta ocasión foron unos cuantos: Vito Álvarez (voz), Ariadna Valdivié (voz), Irene Muñiz (voz), Shalom (voz), Javier Tejedor (acordión), Lisardo Prieto (violín), Toño Gómez (trombón) y Ángel Ruiz (banjo). Ente toos ellos dan mayor diversidá y atractivu al discu.

El CD vien nun formatu novedosu, con un llibrín percompletu nel que dexen bien nidio l’espíritu de ‘Tiempos Modernos’. ¿Ye necesario aportar un plus a los trabayos discográficos pa llegar al públicu?

Paecíanos qu’un grupu cola trayectoria de Dixebra nun podía sacar un discu ‘normal’: tenía que ser daqué especial. L’esfuerzu fechu pa llevar alantre esti trabayu merecía una bona presentación. Amás fuimos conscientes de qu’había lletres que nun yeren tan esplícites y necesitaben una esplicación fonda. D’ehí surdieron los testos del llibrín, que creemos ayuden a entender dafechu’l sentíu de lo que queremos espresar con cada canción. Por último’l trabayu creativu del diseñador, Navarro, dio-y esi toque d’elegancia y prestancia que tien en conxuntu ‘Tiempos modernos’... Y por supuestu, esa semeya de FranGB que vieno a pone-y la guinda. Con too ello queremos que la xente tenga ganes de tener el discu físicu pa llegar a atalantar del too l’espíritu d’esti trabayu, que fuere un oxetu guapu y conservable. Somos conscientes de que la música pue consíguise facilmente, pero si quiés disfrutar de tolo demás que conlleva esti discu tienes que facete con una copia física.

¿Ta contentu cola respuesta que tuvo’l discu nestos primeros meses?

La verdá ye que sí. Ta funcionando a nivel de ventes –teniendo en cuenta cómo ta’l mercáu– y tamién en cuantes a les crítiques que tuvo hasta agora, con repercusión dientro y fuera d’Asturies. Nesti sen, ehí tán les allabances que nos fixeron en medios como Hipersónica, Mondo Sonoro, Enderrock, Celtic-Punk-Rock...

En febreru principien cola xira 2014 con dos actuaciones, n’Uviéu y Madrid. ¿Qué espectatives tienen pa esti añu?

El discu presentábemoslu en payares nel Auditoriu de la Casa de la Cultura d’Avilés con un conciertu especial, y agora toca dir presentándolu con conciertos de los de siempre, que ye lo que más nos presta y onde siempre nos movimos perbién. Nes próximes selmanes vamos tar n’Uviéu (sábadu 15 de febreru, na sala Whippoorwill) y en Madrid (vienres 21 de febreru, na sala Lemon). Amás tamos preparando la xira d’esti añu, concretando feches, falando con festivales y promotores, too ello col aquel de poder llevar ‘Tiempos modernos’ a escenarios d’Asturies y de fuera.

¿Obliga la situación actual a salir fuera d’Asturies a buscar actuaciones?

Nun queda otro. La baxada nos últimos años de festivales n’Asturies –sobre manera de les llamaes ‘Nueches Celtes’– como consecuencia de la llexislación, de la falta de recursos económicos, de la desaparición de les ayudes públiques, de la situación deficitaria de la mayoría de Conceyos asturianos..., llévate a buscar una salida fuera d’Asturies, onde la competencia ye descomanada. Pero ye lo qu’hai; tenemos qu’aceptalo y trabayar lo meyor posible nesi contestu.

Otra manera, va poco salió’l ‘Anuariu de la Música Asturiana 2013’, del qu’usté ye direutor.

Sí, fai’l volume númberu catorce d’esta publicación que recueye l’actividá de la música asturiana a lo llargo del añu. Supón un esfuerzu bien grande pero creemos que nun se pue tirar la toballa. Nestos momentos en que paez que tán esmantelándose bona parte de les infraestructures creaes a lo llargo d’años por parte del movimientu de defensa de la llingua y cultura del país nun queda más aquello que resistir. Con esta filosofía encaramos cada númberu nuevu del ‘Anuariu de la Música Asturiana’. Paeznos que ye necesariu pa una meyor cohesión, difusión y afitamientu del fechu musical asturianu.

¿Cómo ye la salú de la música asturiana pese a la crisis?

Ta amalicada, pero d’ésta nun van poder con nós. Nótase cierta ralentización –baxada nos conciertos, nes producciones o na presencia mediática– y menor repercusión social, pero ehí siguimos los credores musicales asturianos trabayando como podemos, porque hai daqué que nos diferencia d’otres escenes que se dan nel país: la ideoloxía, entendiendo por ésta la consciencia de que tamos somorguiaos nun movimientu más ampliu que tresciende lo meramente musical. Falamos de la supervivencia d’una llingua, d’una cultura… D’una entidá llamada Asturies.

Nel editorial d’esti númberu fai una reflexón sobre’l mercáu musical asturianu, nel que pide más implicación a les instituciones y nel que solicita resistencia a los sos colegues pa que nun amenorguen la so creatividá.

Efectivamente. Nestos tiempos modernos que nos tocó vivir, onde como dicíemos enantes paez que ta desfaciéndose, nel panorama asturianista, lo que se foi creando con muncho esfuerzu a lo llargo d’años, facemos un llamáu a los músicos a la resistencia, a que nun dexen de crear. La música asturiana ye un verdaderu milagru, creáu practicamente de la nada pol llabor de muncha xente –músicos, productores, promotores... –, con una implicación más bien escasa de los poderes públicos. Poro, pidimos mayor apoyu por parte de los responsables políticos y, per otru llau, que los sos protagonistes principales, los creadores, nun desdexen la so xera.