Xosé Antón González Riaño: “Tamos pensando n’enanchar l’actuación de la UABRA a lo llargo del añu”

La Universidá Asturiana de Branu (UABRA) clausuróse esti vienres tres dos selmanes d'actividaes. El so direutor, Xosé Antón González Riaño (Viella, 1956), faló con Asturies.com d’esta iniciativa que podría allargase pel cursu.

¿Qué valoración fai de la segunda edición de la UABRA?
 
Bono, yo soi’l direutor, asina que ¿qué voi dicir? Paezme, de toes formes, qu’hai fechos oxetivos y éstos amuesen que la idea de la UABRA cuayó dafechu. Ehí ta como una ferramienta d’análisis de la realidá asturiana, pensada dende Asturies y n’asturianu. Paezme qu’hai un enantes y un dempués de la UABRA no que cinca a les posibilidaes de la normalización del asturianu nel ámbitu académicu y de la divulgación científica.
 
Nella participaron cerca de 150 persones y munchos cursos tuvieron completos. ¿Tien manera la UABRA de siguir creciendo?
 
Abúltame que sí. Toi seguru que sí. De fechu yá tamos pensando n’enanchar la so actuación a lo llargo del añu… Ésta ye, por cierto, una demanda que xurde del propiu conceyu de Cangas del Narcea que significaría una mayor posibilidá d’incidir socialmente nel análisis de los fechos culturales que se xeneren n’Asturies pel añu. Amás, tenemos ‘in mente’ una propuesta de cursos y actividaes pa la próxima edición muncho ‘más potente’, por dicilo de dalgún mou…
 
 
¿Cuál ye’l secretu de la Universidá de Branu pa convocar a tanta xente?
 
Históricamente y a lo llargo de los años, los cursos de l’Academia dexaron ver cómo yera la institución y cuálos yeren los sos plantegamientos y enfotos. Nesti contautu estrenchu la xente entendiónos como somos, coles nueses virtúes y defeutos, pero siempres teniendo a Asturies como oxetivu. En fin, agora queremos que la UABRA supere esi espíritu abriendo muncho más los calces de participación y de debate sobro’l futuru cultural del País. Y esta ye, dende llueu, una xera apasionante pa munchos asturianos.
 
¿Qué supunxo la creación de la UABRA en comparanza colos cursos que l’Academia de la Llingua Asturiana (ALLA) entamaba enantes n’Ibias?
 
Hai que dicir, en primer llugar, que nós en Ibias alcontrámonos perbién. Ellí tenemos munchos amigos y de xuru que podremos siguir collaborando nun futuru. Agora bien, la UABRA necesita un marcu más ampliu: instalaciones, cobertoria informativa, facilidá d’accesu, etc. L’apertura, temática y estratéxica, de la UABRA necesitaba d’un llugar como Cangas que lo tien too: teatru, casa de la cultura y accesu a les nueves teunoloxíes, amás de naturaleza, hostelería, servicios…
 
Esta edición de la UABRA tamién celebró delles actividaes paraleles. ¿Cuáles foron les más destacaes?
 
Bono, tooes elles resultaron de muncho interés, dende la conferencia del Vicerrector d’Investigación, Santiago García Granda, hasta la de Berta Piñán. Dende’l puntu de vista del debate les más interesantes fueron les meses redondes al rodiu de la presencia del asturianu na televisión, la de los ‘indignaos’ y, de mou especial, la esposición que fexo Llera Ramo sobro la realidá socio-económica y política d’Asturies. En fin, a mi prestóme abondo l’actuación del grupu de folk Brandal…
 
¿Participa la población de Cangas nelles?
 
La mitá de la xente que foi a los actos del teatru y de la casa de la cultura yera del pueblu. Nes actividaes que ficimos nel salón d’actos del IES hubo presencia, que nós agradecemos, de la clas política y social de Cangas… Y por ciero, interveníen col mayor interés.
 
¿Qué cree qu’hai que meyorar de cara a ediciones próximes?
 
Pues, básicamente, los calces de comunicación a nivel de medios de prensa. Ye importante que la prensa sepa quién intervién cada día y la temática concreta que se va tratar. De toes formes, nesta edición tampoco ye qu’hubiere quexa nesti sen.
 
¿Cómo ye la rellación col Conceyu de Cangas tres el cambiu de gobiernu?
 
Pues ye tan bona como cola corporación anterior. Nun hai qu’escaecer que pa nós la cuestión de la llingua y la cultura ye una cuestión tresversal y non suxeta a una ideoloxía concreta. L’actitú del alcalde de Cangas foi d’un total interés y collaboración.
 
Tamién ye importante la collaboración de la Universidá d’Uviéu.
 
Cola Universidá d’Uviéu llogramos ponenos d’alcuerdu na idea básica, que ye la de la divulgación del conocimientu de los fechos sociales n’asturianu. A partir d’ehí la Universidá collabora, lleal y eficazmente, cola UABRA, por exemplu inxiriendo les actividaes dientro del so programa de cursos de branu. En fin, nós tamién collaboramos llealmente cola universidá pa que tou esti programa formativu seya un éxitu como vien siendo.
 
La Universidá ta dando pasos pa la normalización de la llingua dientro la institución. ¿Cómo los valora?
 
Hai que reconocer que dientro de la Universidá d’Uviéu diéronse pasos importantes: la ‘mención’ d’asturianu en Maxisteriu, el ‘minor’ nos estudios de Filoxía, la especialidá d’asturianu nel Máster d’Educación Secundaria…, too ello pa capacitar al profesoráu d’Educación Primaria y Secundaria. Otres actuaciones, como la posibilidá de rexistru d’escritos n’asturianu y el fechu de poder defender tesis n’asturianu tamién son valoratibles. ¿Qué ye lo que falta? Pues, paezme a mi, un compromisu más decidíu cola ‘visualización’ de la llingua na vida universitaria: denomación de la institución, rotulaciones, edición de materiales, convocatories, usu alministrativu, etc. Ye dicir, facer un usu del asturianu ensin ‘complexos’.
 
¿Tien confianza nel equipu de Gobiernu d’Álvarez-Cascos no que respeuta a la llingua asturiana?
 
El tiempu dirá si’l compromisu espresáu pol presidente se fai efeutivu o non. A mi paezme que, al marxe d’ideoloxíes, nun tendría por qué haber ‘rocees’ previes. Y, en cuantes a los nombramientos que tienen que ver cola llingua, tamién podremos comprobar si s’actúa d’un mou eficaz y non sectariu o non. Toi naguando por ver les primeres midíes nesti terrén.
 
Tres estes dos selmanes de duru trabayu al frente de la UABRA, ¿qué proyeutos tien en mente pal futuru?
 
Pues agora mesmo toi metíu nun estudiu, bien guapu por cierto, sobro les actitúes sociollingüístiques del alumnáu del Navia-Eo. El trabayu de campu yá ta fechu: visita a tolos centros educativos y recoyida direuta de la información… Hai qu’entamar la fase d’análisis de los datos y, darréu d’ello, plantegar les conclusiones. Paezme que podremos apurrir los resultaos, a l’alministración educativa y a la sociedá asturiana en xeneral, a principios d’añu. Pa mi’l compromisu cola llingua eonaviega y cola xente que trabaya pola cultura del Navia-Eo ye especialmente gratificante.