Vallina: “De la influencia que tenga IX dependerá un gobiernu d’izquierdes o ún del PSOE con Ciudadanos”

Izquierda Xunida (IX) y Izquierda Asturiana (IAS) van a les eleiciones d’esti domingu en coalición como Asturies pela Izquierda. La so candidata ye Ángela Rosa Vallina de la Noval (Naveces, 1959), que defende una reforma fonda del Estatutu na que s’incluya, ente otros aspeutos, la oficialidá del asturianu y gallego-asturiano.

¿Qué se xuega Asturies el 26-M?

Xuégase’l ser o nun ser. Nun tamos falando d’unos diputaos, d’un Gobiernu d’Asturies o unos gobiernos municipales. De lo que falamos ye de l’Asturies pa les décades próximes; de lo que falamos ye de la comunidá autónoma y los conceyos nos que van a vivir los nuesos fíos y fíes, y les xeneraciones futures.
Asturias xuégase un gobiernu de la izquierda real, un gobiernu qu’esixa en Madrid, y un executivu que, de verdá, tenga l’impulsu suficiente pa refundar la comunidá autónoma na década próxima, finando cola actitú psicosocial de sumisión y sucursalismu de los gobiernos socialistes, y cola actitú burocrática del Gobiernu de Javier Fernández nos cuatro años últimos. Izquierda Xunida tien esperiencia de llucha social, pero tamién de gobiernu. De la influencia que tenga IX dependerá un gobiernu d’izquierdes, colloráu, o ún del PSOE anaranxáu con Ciudadanos.

¿Fai falta poner a Asturies nel centru del alderique políticu tres meses falando de Catalunya?

Por supuesto. Nesta campaña falamos d’Asturies. L’alderique de Cataluña ye importante, pero dalgunos falen de Cataluña por oportunismu pa nun falar de los problemes reales de la xente. Nun se diz nada de la reforma llaboral, de la precariedá, de los problemes de la industria, de les llistes d’espera sanitaries, de la educación, del despoblamientu, o del déficit d’infraestructures n’Asturies, por exemplu.

Les encuestes dan una mayoría amplia a la izquierda y la derecha acude a estes eleiciones más fragmentada que nunca. ¿Hai que confiase?

Confiase nunca. Ye cierto que la derecha nun tien posibilidaes de gobernar n’Asturies y ye necesario recordar les esperiencies nefastes que supunxeron les sos etapes breves de gobiernu. Sicasí, el voto útil nesta ocasión ye a Izquierda Xunida, a Asturies pela Izquierda; a la izquierda dialogante, que ye quien a llegar a alcuerdos, a aprobar presupuestos en pro de la actividá económica y social de los asturianos, de sacar alantre un salariu social que supunxo qu’Asturies resistiese meyor la enorme crisis económica, de llevar al PSOE a reconocer la contaminación como un problema d’Asturies, a impulsar l’área metropolitana, a rebaxar a la metá’l preciu de los centros de cero a trés años y, al empar, demandar les infraestructures qu’Asturies necesita o planta-y cara al Gobiernu de Pedro Sánchez por una descarbonización express que ta poniendo la industria asturiana contra les cuerdes por pretender ser los primeros de la clase.

L’añu pasau propuxeron l’apertura de la reforma del Estatutu. ¿Tiénenla na axenda pa esta llexislatura próxima?

Sí, claro, pero los númberos tienen que dar. IX lleva munchos años proponiéndola en solitariu, dando voces en castañéu pa que l'asturianu sía oficial, pero tamién p’alcanzar mayores cuotes d’autonomía. Afitaremos d’una vez la oficialidá de la llingua asturiana, y de la fala o gallego-asturiano nel so ámbitu territorial, tanto pa garantizar la conservación d’ún de los más importantes patrimonios culturales de los que gociamos como pa reconocer los derechos llingüísticos de los y les falantes. Esperamos qu’Adrián Barbón y el so grupu parllamentariu cumplan cola so pallabra y esta llexislatura próxima suponga, de fechu, la conversión del asturianu en llingua oficial como lo son el gallegu, l’eusquera o’l catalán.

Nesi nuevu estatutu definiremos Asturias como una comunidá histórica qu’exerce’l so autogobiernu nel marcu d’un modelu d’Estáu solidariu col restu de les nacionalidaes y rexones. Incorporaremos una Declaración de Derechos Básicos de tolos asturianos y asturianes que habrán de ser garantizaos polos poderes públicos de la comunidá autónoma. Tamién propondremos que la nuesa norma institucional básica elleve a la categoría de suxetivos, y por tanto esixibles nel marcu del so desarrollu llexislativu, los derechos a la Educación, incluyendo la Educación Superior, la proteición de la salú, el salariu social y el restu de les prestaciones sociales básiques y l’accesu a la vivienda.

Nel nuevu estatuto recoyeremos la potestá de disolución del Parllamentu ensin les llendes temporales qu’agora esisten. En materia social, asumiremos p’Asturies les competencies en polítiques integrales d’emplegu, tanto actives como pasives, y la xestión del sistema de proteición social por desemplegu nel marcu de lo dispuesto nel artículu 149.1.17 de la CE.  Coles mesmes, asumiráse la xestión de les prestaciones de Seguridá Social y de les funciones accesories de les mesmes ensin poner en riesgu’l criteriu de solidaridá nel sistema, el principiu básicu de xunidá de caxa, asina como les competencies de la inspeición de trabayu.

Nel estatutu nuevu garantizaremos tamién un espaciu de proyeición esterior d’Asturies y definiremos la so participación nel ámbitu européu no que se refiere a contribuyir a la conformación de la voluntá del Estáu respeuto a esi asuntu. D’igual mou, pretendemos  estableces competencies nueves en materia de función pública, tanto autonómica como llocal, en Proteición Civil, Salvamentu Marítimu y aeropuertos, asina como favorecer  la participación de la nuesa comunidá autónoma n’organismos y instituciones de caráuter estatal como’l Tribunal Constitucional y el Conseyu Xeneral del Poder Xudicial, ente otros.

Y por si fora poco, queremos introducir nel so articuláu un conxunto de derechos, deberes, competencies y orientaciones que reflexen de manera nidia’l compromisu colos recursos naturales, el bienestar animal y el desarrollu sostenible d’Asturies. 

¿Cuenten col cambiu de postura de la FSA no que respeuta a la oficialidá?

Les pallabres tán pa cumpliles. Las bases del PSOE asina lo decidieron y los dirixentes nun tendríen por qué incumplir un compromisu claru que xeneró muncha ilusión nuna gran parte d’un movimientu social que lleva cuarenta años lluchando por la sobrevivencia de la llingua. Por IX, dende llueu, nun va a ser.

De dase nestes eleiciones unos resultaos asemeyaos a l’anterior van ser necesarios pautos pa llograr un Gobiernu estable. ¿Vense nel Executivu o valoren llegar a alcuerdos puntuales?

IX ye una fuercia preparada pa gobernar y asina lo amosaron tanto nos conceyos como na comunidad autónoma, anque evidentemente habrá qu’esperar a los resultaos del domingu próximu. En too casu nós yá mostramos la nuesa disponibilidá pa constituyir un gobiernu fuerte de la izquierda y dar estabilidá a una comunidá autónoma que necesita d’esfuerciu, trabayu y habilidá pa enfrentase a los importantes retos qu’en materia económica, llaboral y social nos esperen na llexislatura próxima.

No personal, vusté lidera la candidatura d’Asturies pela Izquierda depués de 5 años como europarllamentaria.

El Parllamentu ye una esperiencia que nun te dexa indiferente. Ellí daste cuenta de que la Xunión Europea necesita un cambiu pa que realmente se convierta nesi espaciu de progresu, de sociedá más xusta, d’exemplu na defensa y promoción del bienestar y de los derechos humanos. El Parllamentu realmente tien un poder mui llendáu, y anque munchos crean que ye onde se tomen les decisiones, al final éstes tómense na Comisión y nel Conseyu, que son los que verdaderamente tienen la capacidá d’iniciativa llexislativa.

En cualesquier casu, la Xunión Europea tien que servinos pa promover cambios que lleguen a la ciudadanía. La esperiencia toi convencida de que va servime tamién n’Asturies porque de xemes en cuando sólo nos lleguen decisiones que nos afeuten negativamente tomaes en Bruxeles, cuando en realidá tamién hai una pila d’oportunidaes que, desgraciadamente, n’Asturias tán dexándose escapar. Podría dici-y, por exemplu, qu’esisten miles de millones pa facer una transición enerxética xusta y que’l so algame dependerá  de los nuesos proyeutos. La Xunión Europea ye imprescindible nun mundu globalizáu, pero necesitamos qu’esa xunión sía como siempre defendió IX: una Europa de los pueblos, onde les persones sían el centru de toles polítiques frente a los intereses parciales y egoístes de los grandes grupos económicos, productivos y empresariales.