Ún de Grao: “Hai qu'apostar por modernizar la tradición; atrevese a amestala con tou, con cualquier estilu”

José Martínez Álvarez, nacíu nel 1978, ye Ún de Grao, músicu qu’esplora na evolución de la tonada asturiana. ‘Pelo segao’ ye’l so primer LP, tres la espublización hai más d’un añu d’un EP, que’l moscón yá tien a la venta.

¿Esperaba cuando echó a andar Ún de Grao que la so propuesta musical en solitariu diba tener esti percorríu? Nun para de tocar.

Sí que contaba que la mio propuesta fuera aceutada por determinaos sectores, como’l folk, pero sorprendióme’l fechu de que fuera tan bien recibío por un públicu munchu mayor del que pudiera suponer.

Primero foi un EP y agora llega esti llarga duración, ‘Pelo segao’.

L’EP foi casique un amiestu ente un exerciciu de torna al mio entamu como músicu –tocando la guitarra y cantando en solitariu– y una prueba o una encuesta llanzada al públicu; daqué como entrugar a la sociedá: ¿Prestavos esto qu’acabo facer? ¿Paezvos que paga la pena que siga per esti camín? ¿Tien xacíu pa vos el plantegase la tonada y la tradición dende otros falaxes musicales?

Enfoqué la grabación como una maqueta, entamé a grabala nel Taller de Músicos del Antiguu Instituto de Xixón y dempués grabé les voces nos Estudios 15:40, onde tamién se fizo la mezcla. Ye un trabayu bastante homoxeneu falando d’arreglos, y tien un soníu mui natural, pocu maníu. La producción d'esti EP buscaba la llaneza.

Col LP el plantegamientu yá de mano yera mui estremáu. Depués de dos años furrulando col proyectu taba claro qu'había aceptación del públicu y que facía falta enfocar una grabación un pocu más ambiciosa en cuanto a llargor, igües, collaboradores y producción. Una de les mayores diferencies col EP foi el trabayu de Xavier Foks como productor, gran conocedor del proyectu, yá que vieno como técnicu de sonido a una montonera de bolos d'Ún de Grao.

Munchu enantes d'entrar a grabar yá entamamos a trabayar los efectos de guitarra y a pulir les igües de les pieces. El so sofitu mentantu la grabación valió muncho, y el trabayu de mezcla y post-producción que fizo al par de Luis Senén Fernández foi perbuenu. Tamién cuntamos con collaboradores de lo meyor como’l mesmu Luis Senén a la batería y el baxu llétricu, René Ispierto al Contrabaxo, Pepín de Muñalén al saxo y Rubén Álvarez a la guitarra llétrica, ensin dexar de llau a Xavier Foks al órganu Hammond.

Per otru llau, el LP tien muncha más variedá nel enfoque de les igües, con rexistros mui estremaos nes 10 canciones qu’incluye, dende lo intimista d’una añada a dalguna propuesta que torna la tonada en swing o hard rock.

¿Qué evolución vivió vusté nesti tiempu?

Les primeres igües yeren toes arpexiaes. Llevóme tiempu entamar a rasgar cola púa, y a trabayar otros ritmos, con harmoníes más movíes.

Al entamar también trabayaba cola guitarra llimpia. Dempués ya fuí metiendo delays y overdrive, y anguaño amiesto una montonera d'efectos.

Nel campu personal el proyectu entamó como una prueba; casi xubíes al escenariu entrugándote a tí mesmu y a los demás si aquello tenía xacíu o non. Col tiempu fueron diluyéndose les duldes y les inseguridaes fueron tornando en bientar, n’esfrute. Préstame pola vida tocar los mios arreglos y siéntolos como dalgo mui personal que me presta compartir colos demás.

La so música bebe de la tonada tradicional. ¿En qué se basa pa escoyer les pieces qu’interpreta?

Per un llau el criteriu puramente artísticu. Hai pieces que te presten más qu'otres y hai canciones que te llamen, que te piden que les toques. De sópitu sientes una tonada y  imaxínesla con una harmonía de rock o de jazz... Con otres simplemente nun te pasa tal cosa, nun te llamen la atención.

Falando de  lletres siempre hai canciones que te presta lo que dicen y otres que non.

Al final escueyes aquellos contenios que t'apetez cantar, colos que t'identifiques. Tamién por contraposición tengo dalguna pieza nel repertoriu que diz coses coles que nun comulgo y aprovecho pa comentalo nos conciertos como una invitación a la reflexón.

¿Son munches les posibilidaes qu’ufre la tonada?

Ye una música ensin una pulsación rítmica marcada, lo qu’abre munchu l'abanicu de posibilidaes a la hora d'enfocar el ritmu de les harmoníes. Per otru llau hai un repertoriu pergrande de tonaes, con muncha bayura de melodíes, coles sos vueltes y cadencies. Yo dediquéme a probar igües de tonaes tirando de falaxes musicales mui estremaos, como pudiera ser el country, el hard rock, la bossa nova o’l jazz, y paezme que tolos que probé furrulen bien.

Toi xuru que se puede trabayar acompañando la tonada con lletrónica, y nun tengo dulda que faciendo les coses con un mínimu de cariñu puede fusionase con cualesquier otru estilu.

¿Qué-y dicen los veteranos del xéneru a la hora de sentir la so propuesta?

Toi topando muncha aceptación nel mundu de los concursos y de la xente cola que fui a clase, y yá van delles veces que me dicen que-yos presta que tea faciendo esti trabayu dando-y otru enfoque a la tonada. Afálenme pa que siga con ello.

¿Hacia ónde ha de caminar la música tradicional asturiana?

Hai munchos caminos que se pueden andar y paezme que hai munchu trabayu por facer tovía. Pa min, nun hai dulda, hai qu'apostar por modernizar la tradición; atrevese a amestala con tou, con cualesquier estilu de música; tirar d'otros falaxes p'acompañala; echa-y un pocu d'imaxinación y dexar de llau cualesquier atadura, complexu o esquema preconcebíu.

¿Cómo ve’l panorama actual de la música asturiana?

Paezme que podría abrise l’abanicu munchu más de lo que se fai. Sigo viendo munches formaciones folk que se basen en modelos que yá conocemos, pero veo poques que faigan dalgo estremao; que se llancen a percorrer otros caminos. Prestaríame ver munches más formaciones na llinia de L-R, Antón Menchaca, el proyectu d’Anabel Santiago con llétrónica, l'Aldu, Vrienden o Blima, y tamién creo que cualesquiera d’elles merecen más presencia na escena asturiana.

En direuto pudimos velu esti añu nun formatu tríu. ¿Camienta apostar por ello nun futuru o Ún de Grao va siguir siendo namái ‘ún’?

El proyectu tá claro que ye una formación en solitariu y la idea ye que siga siéndolo,  pero sí que ye verdá que lo mesmu nos trabayos discográficos como en determinaos conciertos esti añu, incorporóse a dalgunos collaboradores.

Nel casu de los conciertos, yá van dos ocasiones nas que toco con Pepín de Muñalén al saxo y xiblata, Tony Cruz al contrabaxu y Xavier Foks al soníu, y tengo zarraes otres dos feches con ellos. El resultáu entrambes ocasiones foi espectacular, quedamos toos encantaos, y la idea ye reservar esta formación pa ciertes ocasiones especiales, calteniendo la formación en solitariu pal restu de les actuaciones.