Suari: “La cuatriada tien la responsabilidá de facer de motor de tola familia bolística asturiana”

Los bolos foi’l deporte escoyíu pola Oficina de Normalización Llingüística de Xixón pa protagonizar el pallabreru d’esti añu. L’espertu Carlos Suari Rodrigue (Avilés, 1982) encargóse de la ellaboración del quintu llibru d’esta serie.

¿Cómo recibió la llamada del Conceyu de Xixón pa ellaborar los conteníos d’esti pallabreru sobre los bolos?

De primeres la propuesta yera pa revisar el trabayu que dende la propia Oficina de la Llingua diben dir sacando. Propúnxe-yos una perspectiva nueva y cuando quixi dame cuenta, taba faciéndolu yo.

La so primer decisión foi centrar el llibru sobre manera nes modalidaes que se xueguen en Xixón.

Sí, d’eso diba’l cambiu de perspectiva del trabayu. Pola inmensidá de la bolística asturiana lo único vidable yera zarrar el llibru a la estaya xixonesa. Dientro d’ella habría que falar de modalidaes que son xixoneses, podemos dicir, de siempre; y otres que vinieron de fuera va poques décades. Les de Xixón ‘de tola vida’ son la cuatriada y el dexabolu. El batiente paez ser que se tien llegao a xugar en Serín, pero lo que sabemos de xuru ye que hebo paisanos que, dende les parroquies de contactu con Carreño, diben xugar a les batientes de llugares como Tabaza o El Valle. El bolu celta aportó cola xente que vieno, sobre too, de Tinéu, igual que’l bolu llionés aportó cola emigración llionesa a la ciudá. El bowling, bien se sabe, ye más cosa de les sales recreatives y los centros comerciales.

Ún d’elles, el dexabolu, tien el so orixe na parroquia de L’Abadía Cenero.

L’orixe nunca nun se llega a saber, pero güei, nel segmentu bolísticu asturianu, sí podemos considerar que’l dexabolu ye un endemismu d’esa parroquia xixonesa. Esti xuegu pertenez a una ‘familia’ de bolos que los espertos llamen ‘bolos de 6’. Hailos n’Aragón, Bretaña o Castiella, por poner trés exemplos, pero esta variedá asturiana ye quiciabes la más diferenciada de toda esa ‘familia’. El dexabolu consiste en dos files de tres bolos caúna. El xugador tien trés bolos de tirar –nun son boles– pa consiguir valtar cinco y dexar ún de pie.

Incorpora tamién el ‘bowling’ o bolo americanu. ¿Pue considerase a esta modalidá como un competidor de los bolos asturianos?

Sí y non; ye como’l quesu. Anguaño ye probable que’l primer quesu que prebe un neñu sía un subquesu o paraquesu, d’esos que son tan malos de diferenciar del plásticu que los envuelve. A la llarga, y si too ye normal, el neñu, solu o con ayuda del entornu, sabrá qu’hai Afuega’l Pitu, Cabrales o Vidiagu, muncho meyores en tolos aspectos qu’aquello que con tantu cariñu-y dieren en casa la primer vegada. Lo de los bolos ye igual, güei munches families, con tol cariñu, lleven a los neños al centru comercial a xugar a los bolos. ¡Manca la madera! Esperemos qu’eses mesmes families o esos neños, nel futuru, sigan teniendo oportunidá de conocer les munches opciones de bolos qu’hai nesti país o, lo menos, la que por zona o costume seya referente.

Nel so trabayu ‘Atles de los Bolos Asturianos’ recueye 43 modalidaes de bolos n’Asturies.

Asina ye; delles que nun se practiquen dende cuantayá, otres que tán morriendo nesti momentu, otres más que se xueguen con una frecuencia mui baxa y, nel casu meyor, les que tienen bonvivir. Foi un trabayu que llevó alredor de tres años, l’últimu de muncha intensidá. Diego Barrio ayudóme a terminar de caleyar y sacar material, José Manuel Rodríguez a dibuxalo y María Xosé Martínez a ponelo n’orde. Otres persones como Rafa R. Valdés, Paco Álvarez, Xuacu Rodriguez o Xosé Ambás emprestáronme ayudes mui significatives.

De toes, la cuatriada sigue siendo que cuenta con un mayor númberu de siguidores.

Sí, ye la reina de bolos n’Asturies. Y diría más, la reina de toles modalidaes de deporte tradicional. Tien mui bonos datos: consiguió organizar bien les sos categoríes, tien torneos con formatos mui variaos, ye la que más continuidá da a la formación de xugadores nuevos y la incorporación de la muyer ta nun bon momentu. La so responsabilidá ye facer de motor de tola familia bolística asturiana. Hai qu’entender que si la cuatriada ye la que más se xuega ye porque ta nos territorios más poblaos d’Asturies. Si lo miramos en términos relativos, el bolu vaqueiru, nel suroccidente asturianu, tien un impactu 10 veces mayor sobre la población. Nun ando mui tresmanáu si digo que p’atopar una ficha federativa de cuatriada, habría que garrar cerca de 1000 habitantes de la so área, cuando p’atopar una de bolu vaqueiru na so área, habría que garrar menos de 100. Con esto, digo: ¿Lideralgu de la cuatriada? ¡Indiscutible!, ye la que representa a más asturianos, pero hai que potenciar el puxu de les demás.

Carlos Rubiera, na presentación del Pallabreru, pidió que se retomara la costume de contar los bolos n’asturianu. ¿Nótase una perda de la presencia de la llingua asturiana nel deporte de los bolos?

El mio tiempu d’estudiu nun da pa ver esa perda que, polo que cuenta muncha xente, ye indiscutible. Sicasí, yo creo que nos bolos tamos a tiempu de ‘reinyectar’ l’asturianu. Ye relativamente fácil d’entender pa un xugador o aficionáu a los bolos que nun podemos tar partiendo’l pechu por un deporte minoritariu que carez de tolos males propios de les manifestaciones culturales amenorgaes y, al empar, tar escaeciendo l’idioma.

¿Cómo estructuró’l 'Pallabreru de los Bolos de Xixón'?

Hai unes primeres fueyes d’introducción, alredor de los oríxenes del xuegu, la evolución, etcétera. Depués entramos a la realidá bolística asturiana pa dar pasu a la bolística xixonesa: los bolos que vinieron de fuera, el dexabolu y la cuatriada. El palabreru ta nes páxines finales.

¿Cuántes pallabres recueye?

Paezme que pasemos dalgo de les doscientes.

¿Pa quién ta destináu?

Siempre pensamos nos guaḥes, pero creo que va ser tanto o más interesante pa la xente adulto. La xente que quiera puede pasar a coyelu pela Oficina de la Llingua.

¿Tienen accesu los escolinos asturianos al deporte de los bolos?

Sí, el programa de Xuegos del Principáu ta activu y amás munches peñes tán naguando por recibir a xente nuevo nes sos boleres. La Federación organiza campeonatos en toles categoríes tolos años.

¿Cómo se podría potenciar más esti deporte?

Ye una cuestión de compromisu de les instituciones. El voluntarismu da pa lo que da y solemos llegar al so techu de posibilidaes. Hai que meter perres, non en grandes cantidaes, pero sí bien repartíes. Hai qu’ayudar a les peñes a aguapar y facer más llamatives les boleres, a que puedan desarrollar aules de recepción de guaḥes. A la Federación habríen llega-y llinies de financiación deportives y culturales, pa que nun se desdexe la promoción social d’estos deportes. Y nun taba de más crear dalgún otru mediu de difusión y estudiu de los bolos. Tenemos bien cerca un exemplu maraviosu: Madera de Ser, en Cantabria, un sitiu que ye muséu vivu, aula y centru d’estudiu, too al empar. Per ellí pasen miles d’escolinos al añu.

La TPA paez una ferramienta fundamental, pero la presentación del Pallabreru’l domingu pasáu nun tuvo nin una mención nel informativu mientres sí dedicaben espaciu al pasu d’oveyes pel centru de Madrid.

Munches veces el qué y el cómo de les coses que salen nos informativos de la televisión asturiana dependen de cómo tán colocaos los medios d’antemano. Ello conlleva qu’a veces nun s’entiendan determinaes coses. Falando de la rellación bolos-TPA, agora mesmo la suma del programa La Bolera colos espacios que se dediquen n’otros programes y dalguna migaya n’informativos, da como resultáu una bona cobertoria del panorama bolísticu asturianu.

¿Va a haber entregues nueves de La Bolera?

Esti añu Saltadera va entregar 42 capítulos y ta esperando indicaciones pal añu que vien.

¿Qué tal furrula esti programa del que ye responsable de conteníos?

La xente del deporte tradicional yá lu tien n’estima y ta esperando la visita de Milio y el restu l’equipu. Amás, lleguen bones palabres de munches persones que nada sabíen d’estos temes y qu’agora miren pa ellos con interés. Na TPA, La Bolera tamién ta bien valorada y tanto ye asina que s’atreven a ponenos a competir colos informativos de les estatales.

¿Cómo ye la situación anguaño de los bolos nel esterior?

Nos centros del esterior reside bona parte d’esi padremuñu bolísticu que pertenez a tolos asturianos y asturianes. Sicasí, la baxada de les ayudes nesti momentu de crisis, va facer que la conexón de los d’equí y los d’allá quede debilitada. Y esa ye una conexón perimportante.

Yá pa terminar, la xente adulto que quiera averase a la cuatriada o a cualquier otra modalidá de bolos asturianos, ¿cómo podría facelo?

Anguaño nun puedo dar pista de nengún cursu xenéricu de bolos nin nenguna acción de captación empobinada a xente adulto, pero nun hai problema: quién de verdá tenga ganes d’echar unes boles toles selmanes o, quién sabe, si llegar a sacar una ficha federativa, namás ha de buscar la peña más cercana, nun s’echar p’atrás y dicir a lo que se va. Toi convencíu de que toles peñes de toles modalidaes tienen siempre los brazos abiertos.