Sidoro Villa Costales: “La LOMCE ta estrada de midíes dañibles pa la enseñanza público”

La Casa la Cultura de La Pola Siero acueye la esposición ‘Bacu y otra xente (retratos con mensaxe)’ de Sidoro Villa Costales (Lieres, 1962). L’ilustrador, escritor y profesor sierense faló con Asturies.com de la muestra y de la nomada ‘Llei Wert’.

¿Qué van atopar les persones que s’averen a la esposición que protagoniza na Casa Cultura de La Pola Siero?

Venticuatro retratos de persones d’edaes estremaes, polesos o non, pintaos al acrílucu sobre papel, caún con un pequeñu poema a la so vera.

¿Por qué’l nome de ‘Bacu y otra xente (retratos con mensaxe)’?

Bacu ye l’únicu personaxe non humanu de la serie. Un perru especial qu’acompaña a ún de los modelos nún de los retratos. Lo del mensaxe ye, lóxicamente, pol pequeñu testu averáu a cada retratáu.

¿Cómo escoyó los personaxes?

Son toos amigos o xente conocío que m’abultaben afayadizos pa pintalos, poles característiques de la so cara o la so xestualidá.

¿Qué tal recibieron éstos la so propuesta?

Hubo de too. Por supuesto, yo namás fixi’l retratu a los qu’aceptaron.

¿Gustó-yos el so reflexu?

A la mayoría sí, porque entendieron el sentíu artísticu del asuntu. Dellos protestaron o nun se reconocieron, seguramente porque esperaben un retratu clásicu, como los que-yos faen a los políticos, que d’otra manera son mui meritorios porque hasta Cascos o Tini Areces queden guapos nellos.

Cada obra va acompañada d’un poema.

Sí, vencéyense col retratáu o la retratada de diferentes formes. Namás dalgún ye descriptivu –pero non físicamente–. En xeneral son poemes inspiraos nel modelu y na mio rellación con esa persona, no que sé d’ella. Unos son fondos, otros más superficiales.

Y xunta nelles les sos dos facetes, la d’ilustrador y la d’escritor.

Vengo faciéndolo va tiempu: nos mios llibros infantiles axunto poemes y dibuxos tamién.

¿Hasta cuándo va tar abierta al públicu la muestra?

Hasta’l 19 de xunetu, de 18 a 20 hores –sábados y domingos non–. De mano, nun tán previstes otres esposiciones de la serie.

Na Casa la Cultura comparte espaciu con Carlos Sempere.

Lo de Sempere son óleos sobre llenzu de diversos tamaños, dellos bien grandes, de paisaxes de los Picos d’Europa.  Sempere ye un gran paisaxista con una técnica ablucante, tien feches munches esposiciones n’otros llugares del Estáu; ye un pintor reconocíu. La so pintura ye de corte clásicu.

Como profesor de Primaria, ¿ta esmolecíu pola LOMCE?

Tóilo, claro. Ta estrada de midíes dañibles pa la enseñanza público. Pero, cola sida de la  crisis, yera esperable qu’un gobiernu de la derecha lliberal como esti, afitáu con mayoría absoluta, presentare daqué tan retrógado. Ente los que nos manifestamos contra ella hai munchu pinín que los voto nel so día, y tamién munchos progres, sindicalistes y políticos d’izquierda que marafundiaron y estrozaron bastante la educación de toos y pa toos, dando-y razones a la derechona pa iguar agora esti muertu a la so siniestra manera.

¿Cree que’l Gobiernu va aprovechar esta llei pa meyorar la situación de la materia de Llingua Asturiana y de los profesores que la imparten?

Non, pero quixera enquivocame.

La conseyera prometió la especialidá pa esta llexislatura. ¿Cumplirá cola so pallabra?

Nun creo, pero quixera enquivocame.

Vusté tien escrites delles obres, la mayor parte enfocaes al públicu xuvenil y infantil.

Tengo publicaos dos poemarios ilustraos pa neños, ‘Nun-yos tengas perceguera’ y ‘Llibru de los suaños’; una novela xuvenil, ‘Mael al debalu’; y una biografía pa rapazos, ‘Evaristo Valle, el pintor del antroxu’, amás d’otra obra espublizao en revistes lliteraries o antoloxíes. Escribo tamién davezu artículos en prensa.

¿Cómo ve la salú de la lliteratura pa xente mozo?

Tien una mala salú de fierro, como dicía Churchill de sí mesmu. Hai tovía bien de llectores infantiles, en parte pol llabor de les escueles, que puxen por da-yos sentíu a les biblioteques escolares. Pero col saltu a la Secundaria pámique los guah.es pierden munchu interés llector. La lliteratura n’asturiano tien, aparte d’estes torgues, les sos llaceries particulares, como la invisibilidá, la falta de promoción, el desenfotu de los poderes públicos; en fin, lo que toos sabemos de siempre.

¿Tien dalgún proyeutu en mente anguaño?

Esti asuntu de los retratos, nel que llevo más de dos años, desinflóme un migayu. Agora, col veranu per delantre, quiero entrar, paradóxicamente, n’ivernación creativa. Pero de la galbana encesa siempre pueden viñar guapos proyectos a la llarga. A ver.

Pronto repite esperiencia nel ‘Veranu Lliterariu’ qu’entama’l Conceyu de  Corvera.

Foi una prestosa esperiencia, colos neños entregaos a la causa lliteraria. Y esta vez nun tien por qué resultar peor. La iniciativa abúltame emponderable dafechu; oxalá hubiere bien d’elles asina n’otros conceyos, per toda Asturies.