Santianes: "Contamos con acollechar los mesmos ésitos que n'años anteriores"

Esti vienres comienza'l XLVI Festival Interceltique de Lorient, el mayor eventu mundial al rodiu de la cultura celta. Iñaki Sánchez Santianes (Uviéu, 1982) ye'l responsable de la delegación asturiana qu'esti xueves garra carretera hacia Breizh pa representar al nuesu país nun certame que nesta ocasión ta dedicáu a Australia. 

¿Cómo van los preparativos de la delegación?

Yá tamos descontando los díes pa qu'arranque el festival depués d'un añu duru de trabayu tanto equí como en Bretaña. Güei parte la delegación asturiana hacia Lorient pa participar nun certame qu'esti añu va desendolcase ente los díes 5 y 14 del mes d'agostu y nel que contamos con acollechar los mesmo ésitos que n'años anteriores.

Asturies torna a llevar una bona representación.

La d'esti añu ye mui variada y numberosa. Les agrupaciones que nos van representar en les Nueches Intercéltiques y nel Gran Desfile de les Naciones Celtes son la Banda de Gaites La Laguna del Torollu, d'Uviéu, y el Grupo Folklórico Trebeyu, de Xixón. El grupu Muyeres, mentes, llevará'l so espectáculu 'País Malva' al escenariu del Grand Théâtre y l'acordionista Marcos García presentará 'Errai' sobre les tablas del Palais des Congrès.

Otru representante asturianu ye Corquiéu, que regresa al festival depués d'unos años d'ausencia, con dos conciertos que fadrán vibrar al públicu bretón. Por último, esti añu contaremos cola presencia del grupu Salón Bombé, que participará nel Trophée Loïc Raison de grupos folk.

Los últimos años del Trophée Mac Crimmon foron esitosos pal nuesu país. ¿Hai posibilidaes de repetir trunfu nesta edición?

Llevamos una bona representación, encabezada pol vencedor del Memorial Remis Ovalle, Jesús Fernández, que yá sabe lo que ye ganar nesti troféu. Tamién contamos con un gaiteru mozu debutante como ye Jaime Álvarez y con otros dos intérpretes d'altor, Fernando Vázquez y Jorge Suarez, que yá participaron n'otres ocasiones y que completen una representación que nos fai ser mui optimistes.

Ún de los grandes reclamos que tien Asturies nel festival ye'l chigre.

El pabellón d'Asturies ye ún de los espacios más visitaos dientro de la Quai des Pays Celtes. Ye un puntu de referencia no gastronómicu y no musical, y yá ye un clásicu pal públicu del festival.

¿Va contar esti añu con un stand de promoción turística acorde a la magnitú del eventu?

Esti añu contaremos con un espaciu de promoción turística en collaboración col Principáu d'Asturies qu'aspiramos que, añu a añu, vaya creciendo pola importancia del eventu y l'apertura de la nuesa tierra al turista estranxeru.

¿Hai previsto dalguna otra presencia asturiana fuera del ámbitu musical?

Fuera del apartáu musical esti añu contaremos con una esposición del artista Jacobo Bugarin, ganador del Premio Asturies Mozo d'Artes Plástiques 2015 del Principáu d'Asturies, que se podrá ver nel Hôtel Gabriel dientro la Euro Celtic Art. D'igual forma, va proyeutse mientres el festival el llargumetraxe-documental 'ReMine', del direutor asturianu Marcos M. Merino.

Esti añu l'Interceltique ta dedicáu a Australia. ¿Cuáles son los platos fuertes del certame?

Los cabeza del cartelu d’esti año son la banda irlandesa The Corrs, Joan Baez, Dan ar Braz y los australianos Claymore.