Rubiera: “L’apueste del Festival Arcu Atlánticu va ser abrir el certame a los conceyos asturianos”

José Carlos Rubiera Tuya (Cabueñes, 1956) nun oculta la so satisfaición por cómo se desarrolló la primer edición del Festival Arcu Atlánticu. L’edil xixonés de Cultura pretende agora abrir el certame a los conceyos del país.

¿Qué balance fai de la primer edición del Festival Arcu Atlánticu?

Los propios téunicos de la casa tienen fechu un balance nel que pue vese que foi un festival que tuvo una considerable repercusión mediática, una afluencia de públicu que pa ser una primer edición ye mui valoratible –pasamos de les 100.000 persones ente tolos eventos programaos– y una cierta repercusión económica en ventes de productos tanto nos establecimientos collaboradores de les xornaes gastronómiques como direutamente nos puestos de la delegación portuguesa nel Campu Valdés, a lo qu’hai que sumar más de 9.000 consumiciones nos puestos qu’hubo en Poniente. Lo qu’hai que ver ye que tamos falando d’una primer edición d’un festival que se tien que dir consolidando como una gran apuesta de futuru. Yo creo que pa ser el primer añu, el balance non sólo ye positivu, sinón que superó bastante les previsiones iniciales que teníemos.

Y too pese a que’l festival tuvo qu’axustar el so presupuestu inicial.

Lo que fiximos foi poner en marcha un modelu de xestión que permite facer un gran festival con un presupuestu mui axustáu. Esti modelu consiste en varies coses, en primer llugar n’implicar a varios organismos municipales como la Fundación Municipal de Cultura, que ye la que coordina y diseña’l festival, el Teatru Xovellanos, la Empresa Mesta de Turismu y el Xardín Botánicu de manera qu’estes cuatro instituciones municipales, dientro de la so programación xeneral anual, planifiquen coses que tengan, por asina dicilo, un enfoque temáticu que cuadre nel ámbitu del Festival Arcu Atlánticu. Son gastos previstos a los que-yos das un enfoque a propósito del certame, faciendo que’l festival crezca ensin qu’eso signifique qu’haya que poner enriba la mesa un presupuestu mui abultáu especialmente pa él.

Per otru llau, conseguimos tamién que s’implicaren na realización del festival un númberu considerable d’entidaes ciudadanes que trabayen ensin ánimu d’arriquecimientu, lo que nun significa que nun tenga coste, pero sí un coste menor que si s’encargara a otru tipu d’entidaes. Too ello permitió facer un festival d’una dimensión mui considerable con un presupuestu axustáu.

¿Quedaron contentos col trabayu de tolos coleutivos que participaron?

Fundamentalmente sí. Ye verdá qu’hubo coleutivos que trabayaron realmente d’una manera modélica y dalgún otru qu’a lo meyor nun foi tan esquisitu a la hora d’axustase a los tiempos o coses pol estilu, pero en xeneral la satisfaición ye mui alta y dende llueu ye p’agradecer l’enfotu que punxeron los coleutivos que collaboraron.

¿El modelu va continuar pal añu qu’entra?

El modelu funcionó y sí, tenemos la previsión de facer una revisión a mayores, por asina dicilo. L’enfotu ye que nel Festival Arcu Atlánticu del añu que vien tengan participación dellos conceyos; en concreto toi faciendo yá xestiones direutes. De momento entrevistéme col alcalde y la conceyala de Cultura de Siero, y voi facelo nes selmanes próximes con Villaviciosa y Carreño pa invitalos a que participen na edición próxima. La idea ye que’l certame nun sía namás un festival pa Xixón. L’Arcu Atlánticu trátase d’un gran festival p’Asturies, un escaparate d’Asturies nel arcu atlánticu européu. Sería ‘pueblerino’ plantegalu como un festival solu de Xixón; tien que ser un festival del país.

Nesi sen, queremos dir abriéndolu a otros conceyos, de mano a esos trés, y tamién a un par d’ellos que tán un poco como cabeza de ponte n’oriente y occidente, que serán Ribeseya y Valdés. Esa ye l’apueste d’ampliación pa esti añu. Amás, como vamos facer coincidir la clausura del festival col Día d’Asturies en Xixón, el 4 d’agostu, vamos invitar a tolos conceyos d’Asturies que quieran venir a tar el fin de selmana colos sos puestos cola so oferta turística, gastronómica, industrial… Y too ello venceyao col Día d’Asturies en Xixón, día tradicional que yá teníamos la idea de convertilo nel Día de los Conceyos d’Asturies, pero rellacionao tamién col pieslle del Festival Arcu Atlánticu. Si eso funciona, va da-y una dimensión tovía mayor ensin que, barrunto yo, implique aumentar ampliamente l’aportación municipal.

¿Entendió les crítiques de la oposición al festival?

Les crítiques de la oposición entiéndense perfeutamente. Son estríctamente polítiques. Daba-yos munchísima rabia, o mieu, nun sé cómo dicilo, que l’equipu de gobiernu de Foro sacara alantre una gran iniciativa absolutamente propia. Hasta agora tábemos básicamente xestionando coses que yá funcionaben, seguramente xestionaes meyor, ensin espilfarros, pero yera por asina dicilo la so política xestionada por otros. Eso yá-yos daba de por sí muncha rabia, pero lo que yá yera’l colmo de la rabia ye que, encima, Foro tuviese tamién la so política y los sos proyeutos. Entós punxeron toles zancadielles del mundu de mano y, depués, el festival salió alantre y nun teníen más remediu que dicir que nun tuvo repercusión, lo que yé una falsedá absoluta y evidente.

¿Cuála foi la parte más esitosa del certame?

En xeneral, paezme que lo más esitoso ye’l modelu de xestión. De toes maneres, a tenor de la rempuesta popular y mediática, les xornaes gastronómiques funcionaron realmente bien; en Poniente hebo una rempuesta popular mui considerable; y les actuaciones musicales, especialmente les de cai, funcionaron bien. Tuvimos un pinchazu col que nun contábamos, l’actuación d’Hevia nel Xovellanos, que foi un conciertu estraordinariamente bono dende’l puntu de vista artísticu, pero que nun tuvo la respuesta de públicu qu’esperábamos. El resto funcionó dientro de les previsiones o meyor de lo previsto, por exemplo los xuegos tradicionales o los desfiles de mázcara ibérica, el gran aciertu d’esti festival.

A pie de cai, ún de los aspeutos más criticaos pola xente foi la falta d’información sobre’l programa.

Tenemos qu’ameyorar munches coses, ente elles la publicidá. Quiciabes la propia disposición del programa yera escesivamente farragosa o difícil de lleer nuna primera vista. Los téunicos yá tomaron nota y, dende llueu, va intentar ameyorase esi aspeutu. Tamién hai que tener en cuenta que la publicidá depende del dineru que tengas y tamos trabayando con un presupuestu mui axustáu. Tamos na primer edición del festival y tamos faciendo crítiques, qu’hai que faceles, pero visto como si tuviéremos un gran festival yá consolidáu, pidiendo casi la escelencia. Ta bien tender a la escelencia, pero nuna primer edición hai qu’axustar munches coses, cuadrar munches coses, y siempre depués de fecho ye cuando te das cuenta de si sería meyor facelo d’una manera o d’otra. Pero insisto siempre neso: el Festival Arcu Atlánticu nun será lo que tien que ser hasta que nun pasen cinco o seis ediciones; un gran escaparate mediáticu y d’alcuentru de cultures y de pueblos que propicie non sólo l’intercambiu cultural, sinón tamién económicu. Por eso, la edición del 2013 va tar enfocada hacia Francia, a la fachada atlántica francesa, n’especial al departamentu del Loira Atlánticu, col que tenemos la conexón per mar. Vamos intentar que seya la ocasión, con un festival que yá nació, que tien una carta de presentación, pa principiar un intercambiu cultural y económicu con esa zona.

El Loira Atlánticu ye parte del territoriu históricu de Breizh y, l’añu qu’entra, Asturies va ser el país convidáu del Festival Interceltique de Lorient. ¿Va falar con Lisardo Lombardía pa entamar dalgún tipu de collaboración ente los dos festivales?

Con Lisardo siempre ta’l filu abiertu. Dafechu, el direutor de la Fundación Municipal de Cultura tien una rellación fluida col direutor del Intercélticu de Lorient. Si se da la oportunidá d’afitar dalgún tipu de collaboración ente los dos festivales, bienveníu seya.

Esti añu, el Festival Arcu Atlánticu tuvo dedicáu a Portugal. ¿Funcionó l’intercambiu económicu que se pretendía cuando s’anunció’l certame?

La delegación comercial portuguesa, que tuvo doce carpes nel Campu Valdés, pidió a última hora una ampliación de díes porque taben mui contentos de la respuesta que tuvieron. Quédanos por zarrar un conveniu estable de collaboración ente la ciudá de Lisboa y Xixón en materia cultural y turística. Ési ye otru de los enfotos del festival: que cada añu se pueda afitar una collaboración permanente colos países invitaos o con ciudaes concretes de los países convidaos. Esti añu foi con Portugal y l’añu que vien con Nantes. Posiblemente habilitaremos más espacios pa la presencia tanto de la delegación francesa como d’otros conceyos asturianos. Asina, ye posible que nun sólo seya Campu Valdés y Poniente, sinón tamién la fachada de los Xardinos de la Reina y d’El Muelle.

Ésti ye’l primer añu suyu al frente dafechu de los festexos del branu xixonés. ¿Ta contentu col resultáu final?

Yo creo qu’oxetivamente tuvimos el branu más densu que yo recuerde. Xixón tien un branéu mui afitáu n’agostu, alredor de la Feria de Muestres, la feria taurina, les fiestes… Actividaes que faen que Xixón se llene siempre n’agostu dende va munchos años. Nesta ocasión fiximos tamién l’ampliación del branu a xunetu, con la Semana Negra a medios y el Festival Arcu Atlánticu a finales. Y eso notóse. La segunda quincena de xunetu, Xixón taba casi tán llenu como suel tar n’agostu.

Los hosteleros quéxense de que baxó’l monto de los ingresos, pero eso non quier dicir qu’hubiera menos xente, sinón que la xente tien munches menos perres. Dende l’Ayuntamientu fixomos tolo posible pa que Xixón se llenare, pero nun tenemos la posibilidá de meter perres en bolsu a los turistes y visitantes pa que gasten. El branu yo creo que foi redondu n’actividaes.

¿Van tornar los grandes conciertos a Xixón, como se rumorea?

Nós siempre diximos que nun dibemos facer una política de persiguir traer grandes conciertos, pero tamién se dixo qu’esti equipu nun renunciaba a grandes eventos. Si apaez una posibilidá que seya asumible y que tenga visos de ser importante o interesante pa la ciudá, ehí taremos. Nesti casu conseguimos traer la Copa Davis en setiembre, qu’aumentó quince díes más el branéu de Xixón, lo que saben mui bien los hosteleros. Traximos a Xixón un gran eventu de magnitú internacional y lo mesmo podría pasar con dalgún gran conciertu que pudiese tener interés y ser viable. Lo que nun vamos facer, o vamos tratar d’evitar por tolos medios, ye convertir esa política de grandes conciertos que tuvieron los equipos socialistes nuna ruina pa la ciudá. Yo, como conceyal de Festexos, nun m’embarcaría nunca nuna operación como la que montaron, por poner un casu, con Paul McCartney, que se saldó con una pérdiga nun solu conciertu d’un millón d’euros. Eso me paez que sería motivu suficiente pa marchar pa casa inmediatamente.

Otra manera, nos últimos meses ta notándose una mengua de la visibilización de la llingua asturiana dende ámbitos municipales, tal como denunciaron recién dalgunos coleutivos.

Seguramente n’aspeutos puntuales les quexes nesti sentíu pueden tar fundaes. L’Ayuntamientu de Xixon ye una entidá mui amplia, con otres entidaes satélites, por asina dicilo, y realmente ye difícil qu’en tolos sitios se sigan les instrucciones d’una manera puntual. Hai dalgo que depende de mi de manera direuta, y nesi sentíu tengo que reconocer la mea culpa, yá que va cuantayá que tengo nel ordenador empezáu un archivu con unes instrucciones sobre l’usu de la llingua nel ayuntamientu a la lluz del Estatutu d’Autonomía, de la Llei d’Usu y Promoción del Asturianu y inclusive de la Carta Europea de les Llingües Minoritaries o la Constitución. Voi facer una especie de guía o resume llegal de lo qu’hai llexislao sobre’l tema y remitilo a los departamentos municipales pa que lo consideren como referencia y actúen en consecuencia na midida de que yo nun puedo tomar decisiones qu’afeuten a otres conceyalíes más allá de la mía.

Per otru llau, tamién se ve n’actuaciones concretes esa voluntá de dar presencia al asturianu, como nel Festival Arcu Atlánticu por exemplu na gala d’inauguración. Nella, la llingua oficial foi l’asturianu. La presentadora, Esther Fonseca, fíxolo mui bien, y utilizó, por encargu míu, tamién otros idiomes como’l castellanu, francés, inglés y portugués. Y precisamente facelo en cinco idiomes, col asturianu como llingua vehicular, ye lo que-y da esa categoría de normalidá, per un lláu, y de prestancia al asturianu; ye dicir, l’asturianu, la nuesa llingua, ye la llingua oficial del Festival Arcu Atlánticu, polo menos la simbólicamente oficial, y al mesmu tiempu n’igualdá de condiciones con otres llingües internacionales.

Les coses van faciéndose poco a poco. Equí, na Fundación Municipal de Cultura, y no que depende direutamente de la mio conceyalía, procuramos que la toponimia se siga, anque tamos teniendo un problema colos logos. El de Gijón y el de Xixón tán fechos por separtao y eso ta dificultando les coses. Seguramente habrá que dir a la revisión de los logos que s’utilicen, porque nun hai logu billingüe.