Rafael Cofiño: “Xugámonos qu’haya un Gobiernu PPVOX que suponga un retrocesu de derechos sociales y llibertaes”

De persona clave na xestión de la pandemia de COVID-19 nel país nos primeros momentos, los más duros, dende la Direición Xeneral de Salú Pública, qu’abandonó n’avientu del 2021, a candidatu de Sumar al Congresu por Asturies. Rafael Cofiño Fernández (Xixón, 1969) incorporóse al proyeutu lideráu por Yolanda Díaz nel so entamu, en setiembre, como coordinador de Sanidá y Salú Mental, y ye optimista en poder frenar una victoria de la derecha nes eleiciones del domingu.

¿Qué sensaciones tien pal 23-X?

Les sensaciones son mui favorables. Ta siendo una campaña mui guapa, mui intensa, con muncha participación de munches persones y l’actu de Xixón con Yolanda foi de muncha emoción, con una gran movilización y compromisu de persones que tamién llegaben de fuera de partíos políticos.

Vusté vien participando en Sumar dende l’entamu. ¿Por qué se decidió por esti proyeutu?

La decisión foi lo que comentaba va unos díes nel actu de campaña con Yolanda, énte una entruga sobre’l tipu de país que querríamos pa España, dalgo que nos esmolez muncho y, nesi sen, pesó esa posibilidá de poder ofrecer aportaciones dende’l puntu de vista téunicu sobre cómo llogralo.

Yolanda Díaz presentólu en Xixón como “el referente en España de la sanidá pública”.

Agradezo-y muncho’l tema del referente d’España. Agradezo-y les pallabres y lo que quier dicir, pero yo soi una persona más cenciella y humilde y nun diría eso. Agradezse, pero creo qu’hai munchos referentes n’España agora mesmo en sanidá pública. Inclusive, nel grupu de trabayu tenemos polo menos 50 persones que son referente. Nun se trata tanto de ser un referente, sinón una persona que sepa coordinar o liderar procesos y equipos, y eso sí creo que ye un elementu clave.

¿Qué se xuega la ciudadanía esti domingu?

Xugámonos volver a polítiques non progresistes; qu’haya un Gobiernu de PPVOX que nun sepa xenerar emplegu, que podemos perder emplegu; que nun se va disminuyir la precariedá; que nun se revaloricen les pensiones col IPC; o que nun haya polítiques valientes p’ameyorar la compra diaria de les persones. Too eso ye lo que nos xugamos. Y xugámonos, amás, una allianza que yá sabemos que va ser segura si gobiernen PPVOX, que supón un retrocesu en derechos sociales y les llibertaes de les persones.

¿Esiste peligru real de qu’entre la ultraderecha nel Gobienu del Estáu?

Sí, el riesgu ye claru nel casu de que gane’l PP. El nuesu oxetivu ye que nun gane de nenguna forma. De fechu comentáronnos munches persones conservadores que tienen mieu de que la entrada del PP al Gobiernu suponga, claramente, pautar con VOX. Esto lo vimos en Xixón, vímoslo en diferentes comunidaes autónomes y vimos les repercusiones de lo que ye la política de VOX, qu’atenta contra los derechos sociales y les llibertaes de la xente.

Va resultar clave la movilización del votante d’izquierda pa dar la vuelta a la mayoría de les encuestes espublizaes estes selmanes.

Sí, la movilización ye fundamental: de los votantes d’izquierda, de los votantes progresistas, de los votantes conservadores. L’otru día pidíamos el votu al sector conservador. Creo que toles persones que tengan na so cabeza que’l país pueda ameyorar, qu’haya propuestes reales de meyora, ensin crispación, ensin mentires, el so referente, agora mesmo, en votu, tien que ser Sumar, porque Yolanda Díaz demostró que ye quien a aportar eses polítiques pa esti país.

¿Cuáles son los temes prioritarios p’Asturies que tien marcaos na so axenda pa llevar a Madrid?

Hai dellos temes prioritarios, ún mui rellacionáu cola financiación autonómica, otru cola importancia de les infraestructures. L’emplegu ye una cuestión clave, queremos qu’Asturies sía de nuevo’l corazón industrial d’España; que sía un tractor en xeneración d’emplegu. Queremos una transición ecolóxica que respete la industria y que caltenga plenu emplegu. Nin un trabayador pue perder el so puestu de trabayu.

Xuníes Podemos, con Sofía Castañón como diputada, dio una gran visibilidá a la llingua asturiana nel Congresu. ¿Va siguir vusté la mesma llinia?

Nel tema de la llingua coincidimos plenamente con Sofía Castañón: ye patrimoniu, ye cultura, ye identidá. Ye la capacidá de xenerar emplegu, de xenerar una identidá que faiga atractiva la nuesa comunidá autónoma. De la mesma forma que se recupera y cuidamos el nuesu patrimoniu natural, históricu o’l patrimoniu prerrománicu, la llingua forma parte d’esa entidá qu’hai que caltener, renovar, y pue ser una defensa clara de lo que ye la oficialidá.

La creación de la especialidá docente de Llingua Asturiana y Gallego-asturiano ye ún de los temes que se deciden en Madrid. ¿La entrada de Sumar nel Gobiernu podría desbloquiar la situación?

Analizaremos con detalle cuáles son los procedimientos pa desbloquiar la situación y va haber una cosa clara nesi sen: tanto dende’l Gobiernu rexonal, tamos seguros, como dende’l Congresu, los diputaos progresistas van tar pendientes d’ello.

Pa finar, termine esta frase: Un votu a Sumar ye...

Ye ameyorar el país. Ye facer el país, un país de futuru, d’ilusión, pensando nos beneficios comunes; pensando nes mayoríes.