Pumares: “Vamos garantizar que'l que quiera utilizar la llingua asturiana pueda facelo ensin torga”

La etapa nueva de Foro, depués de la refundación, tien a Adrián Pumares (Llaviana, 1989) como l'apuesta del partíu pa la presidencia d'Asturies. Bien valoráu por compañeros y adversarios, el llavianés posiciónase a favor del asturianu y, ensin citar direutamente la pallabra 'oficialidá', comprométese a garantizar los derechos de los falantes “con toles implicaciones llegales” que conlleva.

Foro acude a les sos primeres eleiciones depués d’abandonar la pesada mochila de Francisco Álvarez-Cascos. ¿Cómo valora la ciudadanía esti procesu de llaváu internu del partíu?

Como mui positivu. La xente ta fartuco de que los partíos políticos nun denunciemos lo que se fai mal. Foro Asturies dio una lleición.

¿Qué espeutatives tien de cara al 28-M?

Mui positives tamién. Vamos gobernar en Xixón, entrar n’Uviéu y Avilés, y ser decisivos na Xunta Xeneral y nel Gobiernu.

¿Cree que salió reforzáu del alderique eleutoral de RTPA?

Ensin dulda. El restu de candidatos llevaron un discursu de cartón piedra que valía lo mesmo p'Asturies que pa Murcia.

El so partíu ye l’únicu con representación na Xunta Xeneral que nun depende de Madrid. ¿Por qué considera necesaria una formación del perfil de Foro nel Parllamentu?

Porque si un partíu como el nuestru nun ye decisivu vamos seguir con un Gobiernu qu’antepón los intereses de los sos xefes de Madrid a los d'Asturies.

Nuna entrevista na televisión pública confesó que s’equivocó na negociación de la reforma del Estatutu por nun esixir qu’ésta se desendolcara na Cámara.

El PSOE nun ye de fiar. La única forma de negociar con ellos ye con lluz y taquígrafos. Nun me va volver a pasar.

La so postura sobre la oficialidá ye clara: reconocimientu de derechos y non obligatoriedá. De sumar 27 diputaos favoratibles el 28-M que permita reformar l’Estatutu d’Autonomía, ¿qué papel va xugar Foro?

Vamos garantizar que cualquier persona que quiera utilizar la llingua asturiana lo pueda facer ensin nenguna torga, con toles implicaciones llegales. Y al mesmu tiempu, que los que nun quieran utilizar la llingua asturiana nun se vean obligaos.

Vusté vien siendo críticu cola política llingüística fecha por Berta Piñán nesta llexislatura. ¿Perdióse avanzar na normalización del asturianu y del gallego-asturiano nestos cuatro años?

La conseyera de Cultura acabó colo poco que se fizo na llexislatura de Javier Fernández. La política llingüística foi inesistente. Dende FORO Asturies tenemos claro qu’hai que trabayar na promoción y normalización de la llingua asturiana. Un exemplu: nun se ta respetando la toponimia oficial.

¿Qué polítiques cree que deberíen camudar n’Asturies p’avanzar nel so progresu?

Fai falta un cambiu de 180 graos nes polítiques, pero lo primero ye un Gobierno pal qu’Asturies sía lo primero. Por eso Foro Asturies tien que ser decisivu a partir del próximu 28 de mayu.