Pulgar: “Hai que siguir manifestándose hasta que los que tán en contra de la oficialidá dexen de talo”

“Sólo pelos requexos más escuros, convenientemente amplificáu por determinaos medios, sobrevive’l discursu de la inorancia y la intransixencia”, espresa Carlos Pulgar García (Ḷḷena 1975), voceru nacional de la XDLA, enantes de la manifestación pola oficialidá del sábadu en Xixón. Va salir a les 18 hores de L’Humedal.

¿El sábadu 6 d’abril va ser otra xornada histórica pal movimientu de reivindicación llingüística?

Sí, tenemos la suerte de pertenecer a un movimientu social y reivindicativu que vien faciendo historia pasu ente pasu dende fai munches décades. Na llucha polos derechos y pol futuru del asturianu ye como nel deporte: tolos partíos son el partíu del sieglu.

¿Tienen dende la Xunta pola Defensa de la Llingua Asturiana (XDLA) espeutatives de superar lo vivío l’añu pasáu n’Uviéu?

Yá lo superemos. Pasó como l’añu pasaú. Nestos díes y selmanes enantes de la mani foron tantos los sofitos, la ilusión y el trabayu de persones, grupos, asociaciones, colectivos, etc., qu’a estes altures yá sabemos que la emoción, participación y visibilización de la nuestra causa xusta de la oficialidá ya llegó a munches persones de munchos sitios.

Son munchos los coleutivos que se sumaron a la promoción de la convocatoria.

Munchos y mui variaos. A lo llargo de los meses que lleva preparar una movilización d’esti calter son munches les persones y colectivos que trabayen. Como ta viendo la xente hai cantares, videos, xornaes de baille, de pandereta, bandones, charles, sofitos de colectivos, retos virales, etc. Como l’añu pasáu, en pasando la mani fadremos una retafila de les coses que s’entamaron y agradeceremos en trabayu a persones y organizaciones.

Les posiciones de los partíos sobre la oficialidá, tanto a favor como en contra, paecen yá afitaos y inamovibles. ¿Pa qué pue valir esta gran manifestación pola oficialidá?

Les posiciones de los favorables son favorables porque hai un movimientu reivindicativu detrás dende hai una eternidá. Los que nun yeren favorables y agora sí, pues lo mesmo. Y colos que tán en contra hai que siguir manifestándose hasta que dexen de tar en contra.

L’añu pasáu la Xunta Xeneral votó nun comenzar un procesu de reforma del Estatutu que nació d’una propuesta de vueso, el ‘Proyectu 2018 pola Oficialidá’. ¿Entendieron la postura de la FSA?

Al paecer creíemos nós más na democracia interna del PSOE que la propia executiva del la FSA. Quixeron más incumplir un alcuerdu aprobáu nel so últimu congresu que contrariar a dellos del so grupu parllamentariu saliente.

Les formaciones de la derecha asturiana son les qu’amuesen una rocea mayor respeuto a la igualdá de derechos ente falantes d’asturianu y gallego-asturiano colos de castellanu. Sicasí, ta anunciada l’asistencia d’una plataforma de lliberales a favor de la oficialidá con pancarta na manifestación.

Ta claro que ye una cuestión tresversal y que representa a sectores sociales amplios, variaos y democráticos. Sólo pelos requexos más escuros, convenientemente amplificáu por determinaos medios, sobrevive’l discursu de la inorancia y la intransixencia.

¿Algamaremos la oficialidá nesta llexislatura viniente?

Si hai la más mínima posibilidá tamos seguros de que’l movimientu reivindicativu tará, como siempre, preparáu pa dar lo meyor del so llabor y compromisu.