Pablo X. Suárez: “La poesía salme desordenao y namás depués de dir acumulándoseme poemes soi quien p'acolumbrar una estructura”

El so nome ye Pablo Suárez Fernández, que podría pasar desapercibíu al llector, al contrario que'l so nome artísticu, Pablo X. Suárez (Samartindianes, 1981). Y ye qu’esti escritor yá ganó un sitiu ente los creadores d’anguaño en llingua asturiana, como amuesa la so trayeutoria, los reconocimientos algamaos o’l disfrute de la beca ‘Asturies’ na Residencia Literaria 1863 d’A Coruña pa desenvolver el proyeutu de "una novela coral de realismu contemporaneu" que saldá a lo llargo del 2024.

Ta acabante de ganar el Fernán-Coronas. ¿Cómo lo recibe?

Mui prestosamente, más cuando ye un premiu que yá tien llevao xente qu’aprecio muncho como poetes como ye’l casu de Laura Marcos, Daniel G. Granda o Miguel Monteavaro.

¿Qué tal la esperiencia de recibir el premiu na fiesta de La Regalina?

Mui prestoso. Yá tuviera n’otra ocasión, cuando ganó’l premiu Laura Marcos, y el sitiu ye espectacular. Esti añu descubrí que xusto en Cadavéu ta la frontera ente’l país de la pizarra y el de la teya, y hai cases vieyes onde se combinen los dos materiales, pero de Cadavéu al oeste ye to pizarra y de Cadavéu al este too teya. Y ye qu’esti pequeñu país con tolos sos pequeños matices nunca va dexar de sorprendeme.

El poemariu llámase ‘Entamos d’onomástica’.

El nome nun ye nada orixinal, como’l del autor, pero val un poco d’homenaxe a ún de los mios maestros na Filoloxía Asturiana como ye’l profesor Xulio Viejo que nel añu 92 asoleyó los sos ‘Entamos d’onomástica asturiana’. Aparte de pola musicalidá, escoyílu porque resume perfecto la tensión ente abstracción y concreción pela que gravita’l poemariu. Si vas a lo que pon el DALLA de la pallabra ‘entamu’ apaecen otres diez acepciones aparte de la qu’usa Xulio, que van dende ‘baruyu’, ‘desorde’, ‘caldar de la vaca’, ‘pezón’, ‘pechu de la muyer’, ‘coses que van cayendo al dir una persona mui cargada’... Válenme toes. Pela cueta nun topónimu o nome de persona nun esiste tal ambigüedá yá qu’apela a un espaciu o cuerpu individualizáu frente a tolo demás a traviés del nome, col que forma una unidá indisoluble. Lo que nun quita pa qu’haya un cientu de Pablos o Davices na mio xeneración o que en cada valle haya un pueblu que llamen Vega.

Yá cuenta con un Xuan María Acebal, el de cuentos de Cangas… ¿Qué supón pa un escritor estos reconocimientos?

Supón cierta validación per parte de la comunidá lliteraria asturiana que ye la que fai parte de los xuraos, aparte d’un estímulu económicu que, viniendo d’un arte del que poco espero nesi aspectu, siempre contemplo como un regalu.

N’avientu tuvo na Residencia Literaria 1863 d’A Coruña cola Beca Asturies de Lliteratura Asturiana en Residencia. ¿Cómo foi la esperiencia?

Mui positiva porque fízome echar alantre un proyectu narrativu pal que me costaba sacar tiempu. Yolanda Castaño, amás, ye una gran anfitriona que t’abre les puertes de la ciudá.

¿En qué tuvo trabayando?

Nuna triba de novela coral de realismu contemporaneu de la que tovía nun quería adelantar detalles.

¿Cuándo podremos ver el resultáu final?

Espero qu’a lo llargo de 2024 haya manera.

¿Ye l’únicu proyeutu que ta desendolviendo nestos momentos?

L’únicu sistemáticu. La poesía salme de manera más desordenada y namás cuando empiecen a acumulase poemes soi quien a acolumbrar una estructura.

Amás de contar con un espaciu afayadizu y tiempu pa la creación, la beca n’A Coruña permitó-y conocer de primer mano la vida cultural de la ciudá.

Pues sí, anque avientu probablemente nun seya’l meyor mes pa disfrutar de la programación cultural de la ciudá. Ésta ye igualmente mui dinámica y, como equí, ye’l tiempu en que se xunta la diáspora, lo cual fai qu’haya movimientu. Sorprendióme como A Coruña conserva un gran ecosistema de bares alternativos de distintos palos qu’equí ta en franca decadencia frente al imperiu de la terracina qu’invade les places.

¿Cree positivo que tenga continuidá?

Pues sí... Lo más de la xente qu’escribimos n’asturianu tenemos otres ocupaciones y, pa quien se pueda permitir esi paréntesis d’un mes, permite centrase y avanzar proyectos que tardarían muncho más tiempu en salir d’otra miente. Sobre manera pa xente mozo pue ser un incentivu.

¿Qué recomendaría a los escritores que tean en mente presentar dalgún proyeutu?

Qu'echaren un proyectu bien concretu y razonáu y, a ser posible, fuera del xéneru poéticu, pal que cuento que nun ye tan productiva esa esclusividá del tiempu pa escribir que t’apurre la beca.

Vusté foi promotor de les timbes poétikes. ¿Qué supunxeron pa la revitalización de la poesía n’Asturies?

La poesía nun taba por revitalizar, namás la faceta oral y pública de la mesma. Creo que coincidió nel tiempu con esa vuelta a la plaza que supunxo’l 15 M y, igual qu’esti, pa ser posible dependió muncho de la capacidá d’interacción y difusión qu’apurríen les redes sociales como novedá, aparte del descontentu con cierta cultura oficial, lo mismo poética que política, qu’abultaba distante. La cosa ye que’l procesu que se dio n’Asturies coles timbes poétikes asocedió al mesmu tiempu n’otres partes del reinu ensin alcuerdu previu, y ello ye porque se daben unes necesidaes y circunstancies comunes que lo propiciaben.

¿Cómo definiría la poesía que ta faciendo agora la xente mozo n’Asturies?

Difícil de definir la variedá ensin perspectiva histórica. En tou casu hai renuevu y ello yá de por sí ye gratificante.

Semeya (recortada) de María Arce.