Morís: “Creyemos de verdá que la sociedá tien que ser partícipe de les decisiones que l'afeuten”

La formación nacionalista Andecha Astur presenta una cara nueva a estes eleiciones. Ye Diego Morís (Xixón, 1978), trabayador d’ArcelorMittal que ta viviendo una campaña eleutoral marcada pola llucha del partíu coles xuntes eleutorales pa validar les papeletes n’asturianu, pa lo que presentaron un escritu en catalán al ser refugáu ésti nun primer momentu al tar en llingua asturiana.

Andecha Astur repite nuna cita eleutoral. ¿Qué espeutatives tien pal 28-M?

Andecha Astur siempre sal con enormes enerxíes a les cites eleutorales. Asina, el nuesu oxetivu, como siempres, ye llegar a les instituciones pa poder entamar a camudar la pésima realidá que güei se vive n’Asturies.

Creyemos realmente qu'Asturies tien futuru y queremos trabayar pa facer d'Asturies un gran país, nel que poder vivir y trabayar con dignidá.

¿Por qué un votante debería decidise pol so partíu?

Por dellos motivos. El primeru ye porque somos l’únicu partíu que se presenta a estes eleiciones que ye 100 por cien asturianu, qu’a les úniques persones a les que-yos debe obediencia son aquelles que viven equí; nun recibimos nengún mandatu dende Madrid.

Amás, somos un partíu que creye de verdá que la sociedá asturiana tien que ser partícipe de les decisiones que l'afeuten: creyemos nuna democracia participativa. Y somos un partíu que conoz la realidá social, llaboral, cultural…, d'Asturies, porque nos implicamos activamente nes aiciones con que los coleutivos lluchen nestes estayes pol so futuru.

La so campaña eleutoral tuvo marcada pola negativa de les xuntes eleutorales central y de Xixón y Uviéu a aceptar escritos n’asturianu nel que reclamaben el derechu a votar n’asturianu.

El conflictu les papeletes vien dau por una única causa: la falta d’oficialidá de la llingua asturiana. Al final la falta d’avances en drechos llingüísticos reales demientres toes estes décades déxate a espenses de la bona fe y la imparcialidá procedimental de les distintes xuntes eleutorales, y d’eso anden más bien escases.

La situación llegal actual del asturianu sólo permite dirixite na nuesa llingua a les alministraciones asturianes y les xuntes elleutorales son alministraciones españoles. Asina, esti añu consiguimos llevar a l’Alministración española al ridículu más absolutu de la so rueda represiva: qu’una xunta eleutoral almita en catalán el mesmu escritu que primero prohibió n’asturianu.

Al final de munches lluches y reclamaciones, vense forciaes a acatar la sentencia que ganemos nel Constitucional nel añu 2000 y acaben por damos la razón. Eso sí, dexándomos, como esti añu, el menor tiempu posible pa distribuyir les papeletes n’asturianu, qu'al final ye de lo que se trata: garantizar el drechu al votu n’asturianu. Pero, como se ve, sigue reprimiéndose con dureza a los asturfalantes.

¿Cómo van facer el repartu de papeletes?

Tenemos de facelu nós personalmente. Consiguimos el drechu a votar n’asturianu, pero la situación de represión ye tan evidente y tan ridícula que ta prohibío depositar papeletes n’asturianu nes meses y nes cabines eleutorales, como sería lo deseyable y normal. Pero, bono, les guerres gánense con pequeñes batalles. Lo llamentable ye qu’estes batalles, nel ámbetu políticu y eleutoral, sólo les vien plantegando Andecha Astur, namái.

Dende Andecha Astur, magar too ello, facemos un llamáu al restu los partíos que dicen defender l’asturianu pa que sofiten esta llexítima llucha, presentando ellos tamién papeletes validaes n'asturianu.

Va un añu amosaron la so intención de crear un frente común asturianu d’izquierda. ¿Hebo negociaciones?

Y siguimos pensando que ye l’únicu camín. Hebo contautos con organizaciones, claro ta, pero de cara a estos comicios nun foi posible cuayar nada, quiciás porque nun yera'l momentu. Pero qu’a naide-y quede la menor dulda que vamos siguir trabayando p’algamar esi frente común con organizaciones asturianes y d’esquierdes, siempres cola meyor voluntá de costruyir y avanzar. Onde de xuru nun mos va alcontrar naide ye nel enfrentanientu coles organizaciones coles que compartimos oxetivos.

¿Qué polítiques considera más importante p’aplicar con urxencia pa garantizar un futuru pal país?

Les polítiques más urxentes anguaño n’Asturies son aquelles que permitiríen normalizar la vida les asturianes y asturianos en materia de participación na xestión pública, calidá de vida y drechos como clas y como pueblu. Regulación de mecanismos estables pa la participación popular na orientación política de l’aición de gobiernu a nivel asturianu y municipal, esto ye, democracia participativa real.

Polítiques de xusticia social y repartu la riqueza, entamando por garantizar un salariu míninu más altu y garantíes nel acesu a la vivienda. Rediseñar los servicios públicos de sanidá y enseñu p’asegurar que son de calidá y tán a disposición de toes. Midíes pa garantizar la estabilidá demográfica, l’acabu la emigración forciá y favorecer el retornu los espatriaos. Iniciatives pa impulsar un modelu económicu que nun se sofite nes grandes corporaciones, sinón nes pymes, nel coperativismu y nel emprendimientu social.

Entamar polítiques de compensación nel occidente y oriente d’Asturies p’algamar asina una xestión equilibrad de tol territoriu. Reformular la política de tresportes y comunicaciones n’Asturies, desfaciendo’l casoriu con ALSA y apostando por una rede pública potente y con precios sociales, que pue tener como base’l ferrocarril de vía estrencha. Reconocer la oficialidá del asturianu. Planes efeutivos pa caltener el padremuñu cultural y hestóricu d’Asturies. Diseñar el marcu normativu qu’asegure un turismu caltenible. Superar l’actual marcu estatutariu... En fin, qu’hai xera abondo pa facer país.

¿Cómo analiza Andecha Astur el fracasu de les negociaciones pa reformar l’Estatutu d’Autonomía y la declaración d’oficialidá?

Cuando nun hai voluntá d’algamar alcuerdos ye imposible facelo. El PSOE y los sos socios nunca tuvieron voluntá de camudar l’Estatutu, nin mucho menos de facer oficial l’asturianu. Sólo pretendieron rascar unos cuantos votos a base d'engaños.

Nós pensamos qu’esti estatutu nun ye válidu. Ye un estatutu impuestu por Madrid, ensin tener en cuenta a les asturianes y asturianos.

A nivel estatal y européu caltienen el pautu coles formaciones presentes n’Agora Repúbliques. ¿Qué balance fai del mesmu?

Facemos un balance perpositivu. Tovía nun hai muncho tuvimos la oportunidá de facer en Madrid un alcuentru ente trabayadores asturianos d’empreses en crisis y una representación de diputaos d’EH Bildu, pa facilitar la presentación nel Congresu d’iniciatives en defensa de la clase trabayaora asturiana.

Tamos bramente arguyosos de pertenecer a esta coalición, que permite llevar al Congresu español y al Parllamentu européu propuestes y denuncies pa meyorar la vida de les asturianes y asturianos, énte la inaición d’aquelles organizaciones que foron votaes pa defender los intereses d'Asturies, pero que lo único que faen ye claudicar énte aquellos que los manden dende Madrid, a los que, dende llueu, impórta-yos poco lo que pase n'Asturies. Coses como esta coalición a nivel estatal y européu amuesen bien que’l votu a Andecha Astur ye un votu útil.