Martín Poladura: “El primer trunfu de nueso na Liga Galega foi’l de toles bandes de gaites asturianes”

Nesti 2011 cúmplense 25 años del nacimientu d’una de les bandes con más renome dientro y fuera de les nueses llendes: la Banda Gaites Villaviciosa-El Gaitero. Martín Poladura Berros (Pueyes, 1979) ye’l so direutor dende agostu del 2003.

¿Llega esti aniversariu nel meyor momento de la banda?
 
Esti venticinco aniversariu llega, ensin dulda, nel meyor momentu como asociación. Son munches les etapes vivíes nestos años y guardamos de toes elles perbonos recuerdos. Ye muncha la xente que pasó per esta asociación y munches les persones coles que compartimos mui bonos momentos. Lo más duros siempres vinieren marcaos pola marcha de xente, pero a la vegada supuxeron incorporaciones nueves que fixeron que la banda seya lo que ye güei.
 
¿Cómo foron los anicios de l'asociación?
 
L’entamu de la banda, como casi tolos entamos, foi difícil. Dende los primeros momentos xurdieron puntos de vista mui estremaos de lo que tenía que ser la banda y hai que tener en cuenta que la de La Villa foi una de les pioneres n’Asturies. Viendo semeyes de los primeros años, vemos un cambiu casi constante en tolos aspeutos: nos instrumentos utilizaos, nos traxes… Pero sobre too, na xente que forma parte de la banda. Si dalgo carauterizó a esta agrupación dende l’entamu foi la so visión y la del so direutor por aquellos años pa sorprender y evolucionar a pasos axigantaos.
 
Güei Hevia ye ún de los gaiteros más conocíos a nivel mundial. ¿Ye la Banda Gaites Villaviciosa una bona cantera de músicos?
 
La Banda Gaites Villaviciosa tien una cantera importante y una ufierta mui amplia pa un conceyu como ye Villaviciosa. Nun sólo pue deprendese gaita y tambor na Escuela de Música Tradicional de Villaviciosa, dende fai unos años ampliamos la ufierta a otros instrumentos de la tradición asturiana, como’l curdión de botones, el panderu o la pandereta, la flauta travesera o’l bouzuki, ensin dexar de llau la gaita asturiana. La nuesa escuela ye la clave pa que la banda gaites furrule. Podríamos dicir que la banda ye’l másimu esponente de la Escuela de Música Tradicional. Esto supón un esfuerzu pergrande, yá que nengún de los maestros que tenemos dedícase de manera profesional a ello.
 
¿Cuánta xente compón la banda nestos momentos?
 
Na banda hai agora un mecigayu ente xente que llevamos na mesma dende los años 90 y xente que foi incorporándose en toos estos años. Esto débese a que la xente va colando y que gracies a la escuela vamos incorporando nuevos músicos casi costantemente. De toes formes, podemos presumir de tener 10-12 músicos que llevamos tocando xuntos unos 20 años y puedo asegurar qu’eso ye mui difícil.
 
Volviendo a mirar al pasáu, ¿cuál foi’l primer gran ésitu de l'agrupación?
 
La primera dómina onde pue dicise que destacamos foi nel entamu de los años 90. Nestos años, La Villa representó a Asturies nel Festival Intercélticu de Lorient (1990 y 1991) con gran ésitu. Nel añu 92 ganábamos el I Concursu de Bandes de Gaites Asturianes, organizáu pola Conseyería d’Educación y Cultura, y frutu d’ello grabamos nel añu 93 el primer discu de la banda, ‘Badarkablar’. Nos años posteriores ganamos les dos ediciones del Concurso y Muestra de Folklore Ciudad de Oviedo, na modalidá de bandes de gaites. Yá nel añu 95 grabamos el nuesu segundu discu, ‘Gaiteros de Maquilán. La islla de piedra’.
 
Llueu llegaríen los trunfos na Liga Galega.
 
La Liga Galega de Bandas de Gaitas ye una competición que yá lleva casi 20 años y na que nel añu 2005, que foi’l primeru que ganamos nós, llegaren a participar más de 100 bandes de gaites –nesti 2011 la participación llegó, escasemente, a 30–. Esta competición divídise en 5 categories de forma paecía a como se fai nel fútbol –Primera, Segunda, etc. – y hai trés fases de competición, qu’anguaño son dos. Nestes fases van sumándose los puntos algamaos en cauna d’elles, resultando ganador el que sume más puntos ente les trés fases. Pa nós y pa les bandes asturianes foi mui importante aquella victoria. Fuimos la primer banda asturiana n’algamar el trunfu. Amás yera’l segundu añu que participábamos y en pocu tiempu consiguimos xubir el nivel musical de forma mui significativa. Nun foi un trunfu sólo de la banda de La Villa, foi de toles bandes asturianes que víamos a años lluz a les bandes gallegues y, por primera vegada, demostramos que nós tamién podíamos aspirar a too.
 
Una trayeutoria espectacular pese a les males condiciones del vuesu llocal d’ensayu nestos tiempos últimos. ¿Solucionóse yá esta problemática?
 
El tema de los llocales d’ensayu ya tá solucionáu gracies al compromisu del anterior teniente d’alcalde de Villaviciosa, Juan Basilio González. Foi un tema mui desagradable. Les condiciones nes que trabayábamos nun yera que fuesen males, ye que yeren peligroses. El techu cayía a cachos por causa del agua, que nun paraba de filtrase cada vegada que llovía; el suelu taba enllenu furacos… Yera una situación que duró años y que namás solucionóse cuando se llevó a la prensa y la xente vio de primer mano cuáles yeren les condiciones nes que tábamos. Güei tenemos unos llocales recién terminaos. Foi esti mesmu agostu cuando la banda treslladóse otra vegada a les Escueles Graduaes, quedando toles actividaes de la Escuela de Música Tradicional na Escuela de Música d’Amandi, yá que nos llocales nuevos falten tabiques y una redistribución del espaciu.
 
¿Qué supón la banda de gaites pa Villaviciosa?
 
Creyemos qu’en toos estos años fuimos ganando’l sofitu y el respetu de la xente del conceyu. Yo pienso qu’a naide dexa indiferente. Pue ser qu’a la xente que nun tien un especial apreciu pola tradición-y preste de toes formes qu’un coleutivu como’l nuestru desarrolle la so actividá d’una forma tán intensa.
 
¿Tien la banda'l sofitu del Conceyu y de les instituciones?
 
Yo creo que nin el Conceyu nin l’Alministración asturiana sofiten a les bandes de gaites. Nel entamu de los años 90 hubo un concursu promovíu pol Gobiernu d’Asturies con un premiu que yera la grabación d’un discu. Naquellos años recuerdo subvenciones obteníes pola banda d’hasta un millón de les antigües pesetes. Nel añu 2011 nun esiste nenguna partida específica pa les bandes de gaites y la única ayuda que recibimos ye una subvención pal Festival Internacional de la Gaita (FIG), qu’escasamente llega al 3 por cientu del so presupuestu, y otra de la qu’entá nin siquiera sabemos la cuantía pa la Escuela de Música Tradicional, pero que n’anteriores años pasaba escasamente de los 2.000 euros. Pa que la xente se faiga una idea, una asociación como la nuesa tien un presupuestu que varía entre los 40.000 y los 60.000 euros añales, ensin tener en cuenta’l FIG, que tien un presupuestu específicu, anque ye organizáu pola banda. Dende l’Ayuntamientu entamen a dar pasos, pero dende’l mio puntu de vista, siguen ensin dase cuenta de cuála ye la verdadera función de la banda y de la escuela y quédense con datos del FIG. De toes formes, menos ye nada.
 
¿Cómo ye la rellación con El Gaitero?
 
La nuesa collaboración con Sidra El Gaitero ye de siempres, pero foi nel añu 2000 cuando s’afitó d’una forma más oficial, en forma de patrociniu. Puedo asegurar que munchos llogros d’esta banda foron gracies al sofitu incondicional d’esta empresa, que sigue apoyándomos añu tres añu.
 
 La Banda Gaites Villaviciosa-El Gaitero tien fama de ser la más internacional del país. ¿Quédavos dalgún sitiu o festival onde vos prestaría tocar?
 
Nun tenemos especial interés en tocar en nengún lláu en particular. Quiciabes el poder repetir nel Festival Intrercélticu de Lorient ye lo que más entusiasma a los componentes nuevos de la banda, pero nun depende de nós. Tamién tenemos en mente viaxar a Eslovaquia, yá que tenemos una invitación pendiente, pero va depender muncho del tema económicu.
 
Esti añu, con motivu del vuesu 25 aniversariu, prepararon un espectáculu que yá pudo vese nel FIG y va poco n’Uviéu.
 
Esti espectáculu preparóse con idea de ser dalgo qu’impautase al espectador. Un total de 32 músicos somos los que compartimos escenariu intentando sorprender con cada cantar. Tenemos a grandísimos músicos nes nueses files como son Héctor Braga, Orestes Barbachán, Ruben Mol, Jorge Ibáñez…, pero sobre too a Dani Álvarez, que fixo qu’esti suañu fora posible
 
¿Van llevalu a dalgún otru llugar?
 
Tenemos en mente facelu en Mieres el 16 d’avientu próximu.
 
¿Qué valoración fai del FIG d’esti añu?
 
Ellaboramos una riestra d’actividades mui ambicioses. La nuesa idea yera trayer a La Villa a los grupos más representativos de la música folk, nun sólo d’Asturies, sinón a nivel mundial. El gaiteru escocés Fred Morrison, Llan de Cubel, Corquiéu, La Tarrancha, Skama La Rede, la Bandina la Curuxa, Duerna, Spojené Huki (Eslovaquia), etc., compartieron escenariu los díes 8, 9, 10 y 12 de setiembre.
 
Decidimos enmarcar el Festival de Bandes de Gaites dientro del FIG, enllenando La Villa con 7 bandes: Banda de Gaitas Castro Bergidum (Ponferrada), Banda Gaitas La Reina del Truébano (Navia), Banda Gaites Villa de Mieres, Spojené Huki (Eslovaquia), Banda Gaites Corvera d’Asturies, Banda Gaites Villaviciosa y la bandina de la Escuela de Música Tradicional. Foron una gran cantidá d’actuaciones en La Villa, dende’l vienres pela tarde hasta’l domingu a meudía.
 
Tamién organizamos la primer edición del Memorial José Huerta Collada, un concursu de gaiteros solistes que mos fixo munchísima ilusión y que se celebró’l domingu día 11. Al mesmu tiempu que se desendolcaben toes estes actividades, organizamos un Mercáu Tradicional na zona del escenariu central del festival. Foron casi 40 los artesanos que participaron, una cifra nada despreciable si tenemos en cuenta que yera la nuesa primera edición y que coincidía cola celebración del Día d’Asturies.
 
¿Cuál va ser la llinia a siguir col festival?
 
Intentaremos, siempres que los presupuestos mos lo permitan, caltener el formatu d’esti añu. Lo más difícil y llaborioso siempres ye´l tema de perres.
 
Y con respeuto a la banda, ¿qué planes de futuru tienen?
 
Nel futuru más inmediatu ta’l grabar discu. Esperamos tenelo too preparao pa la primavera próxima.