Lozano: "Inténtase anular la identidá con métodos poco llimpios"

Tino Lozano (Lleón, 1951) ye presidente de la Tertulia Cultural ‘El Garrapiellu’. La so asociación lleva venti años dinamizando la llingua y cultura en Xixón, Conceyu que-y va premiar cola Medalla de Plata.

Yá son 20 años trabayando pola cultura y llingua nel conceyu de Xixón, pero ¿Qué fizo que surdiera 'El Garrapiellu?
Reuníamonos nun chigre del Polígonu de Pumarin unos cuantos amigos que veníemos de diferentes ámbitos políticos y culturales, d’izquierdes y asturianistes. Así surde ‘El Garrapiellu’ col enfotu de facer actividaes orientaes a la promoción y defensa del patrimoniu y de la cultura asturiana.

La so asociación defínese como 'Tertulia Cultural' ¿Pue afondar nel significáu d'esta etiqueta?
Pues polo indicao anteriormente. Daquella lo que taba de moda yeren les tertulies, facíamos charres, invitábamos a xente y debatíamos los temes. Tuvimos más de diez años faciéndoles, dempués baxamos pal centru de Xixón y ficímosles nel café del Carmen, hasta que cerró, dempués en la Galería del Vino. Díbemos onde tuviéramos un sitiu afayadizu.

Ente les vueses últimes actividaes tán la marcha a Cuadonga y los concursos lliterarios ¿Qué más actividaes desendolcó 'El Garrapiellu' en too esti tiempu?
Munches, ye verdá que la ruta Xixón-Cuadonga ye una actividá señera non solo pa la nuestra asociación, sinón pa tolos grupos de montaña y senderismu y pa muncha xente que se pon como retu facela. Sicasí, fueron más les rutes de ‘El Garrapiellu’: la ruta de los molinos del Profundu col nuestru collaciu desapaecíu prematuramente Rafa Balbín, etnografu de la Villa; la Ruta del románicu xixonés; llevamos a bien de xente per rutes de dólmenes, túmulos, castros…; fuimos a ver fontes, llavaderos, torres, arquitectura tradicional y sobre too collaboramos con otres asociaciones na defensa de too esti patrimoniu amenazáu.

Tamién ficimos xuegos y deportes tradicionales, collaboramos cola federación de Deportes Tradicionales y ficimos cursos de monitores; llevamoslos pelos colexos y fiestes de prau. 

Amás participamos en  movimientos sociales al rodiu l’asturianu; tuvimos nel grupu Faciendo País, nel CAO, tamos collaborando na defensa del pobláu astur de Lancia, collaboramos tamién colos Amigos de Abamia y tamos na asociación de Amigos de los Texos.

Pa nós una actividá bien importante foi l’asistencia a la II Sesión Estraordinaria del Comité Intergubernamental de la UNESCO pa la salvaguarda del Patrimoniu Inmaterial que se celebró en Sofía en febreru del 2008. Participamos con una ponencia sobre la llingua asturiana en collaboración cola ALLA. Hai más coses; pero esto ye una amuesa de les nuestres actividaes, que non siempre salen en prensa, anque movémonos.

Venti años tamién da pa muncho. Por comparar toos estos años ¿Cómo ve la evolución de la participación y el compromisu de la xente pa cola cultura y llingua asturiana en too esti tiempu?
Hubo unos años en que paez que la xente comprometiase más y vese bien na música, na lliteratura y en toles iniciatives de defensa de la llingua y cultura. Agora paez que’l movimientu ta un pocu adormecíu, pero tamién ye verdá que la mocedá nun lo tien fácil: munchos tán pa fuera y nun ye momentu d’altruismos cuando hai que buscase la vida en condiciones difíciles. Y tamién pesa l’ambiente antiasturianu de los gobiernos y la clase política que  tenemos.
 
¿Y la mocedá d'anguaño? ¿Existe un compromisu bultable per parte d'ella? a la fin, la mocedá ye la que tien que facer per tresmitir la nuesa cultura pal futuru...
Hai una parte de la mocedá que responde. Nun ye mayoritaria, pero confío nella. Tenémoslos con nós en delles actividaes.

El Conceyu de Xixón anunció esta selmana que va distinguivos cola Medalla de Plata ¿Qué opinión merez-y?
Pareznos bien porque consideramos que la medalla va pal asociacionismu xixonés que foi bien activu munchos años. Ye una parte de la sociedá civil crítica que cumple venti años la que distinguen. Nós cellebramos esti añu l’aniversariu ensin tener un local municipal onde facer una esposición, pesie a que pedímoslu y denegáronnoslu; anque igual agora podemos.

¿Y no referente a la normalización llingüística nel so Conceyu?
Dexa bastante que desear, aunque se dieron pasos.

Pal 2011 el Presupuestu de la Conseyería de Cultura pa política llingüística va baxar nun 6,3%...
La política que lleva la Conseyería de Cultura dende va unos años ye la de dar la impresión de que se fai pola cultura sin facer. Con un 6,3% menos van seguir faciendo lo mesmo. Nosotros buscámonos la vida aparte de les subvenciones porque, como a tou’l mundu, deniéguennos munches coses o dannos calderilla.

En rellación a la política llingüistica, usté declaró que coles subvenciones "paez que tán toos callaos" ¿Quédanos voz entá pa reclamar?
A nosotros si. Llevamos 20 años d’independencia política. ‘El Garrapiellu’ nun ta afiliáu a nada, a los socios nun-yos preguntamos pa apuntase, y ye esa independencia la que nos da la voz pa protestar cuando nos paez mal dalgo.

Con venti años d'esperiencia nel dar puxu a les señes d'identidá asturianes dende l'asociacionismu ¿Cuál cree que son los aspectos claves que se tendríen que desendolcar pa normalizar y espardir la nuesa llingua y cultura?
Hai que ponela en valor. Nin la llingua nin la cultura ye un saber que desmerez nin qu’avergoña y amás pue ser rentable. Y ye fundamental dignificala na escuela. Lo que avergoña ye ver que son mui pocos los asturianos que son capaces de poner los conceyos nun mapa, por dar un exemplu. Esti desconocimientu ye interesáu; ye imposible que sea natural. Nosotros durante esti tiempu intentamos, dientro les nuestres posibilidaes, dar a conocer Asturies a los asturianos porque pensamos que lo que se conoz valórase y llúchase por ello.

La zona rural xixonesa tamién cuntó siempre col sofitu de 'El Garrapiellu' ¿Cómo s'alcuentren anguaño estes zones? Paez que cada vegada ye más difícil caltener la existencia d'estes poblaciones tradicionales…
Xixón ye un exemplu bultable de que la so identidá y la so historia alcuéntrense na zona rural del conceyu. Dende la época del desarrollismu intentase per tolos medios anular esa identidá con métodos poco llimpios. Catramúndiase too. Sólo hai que mirar pa lo que ta pasando cola toponimia. Ciares, la parroquia más antigua y mayor de Xixón, agora llámase Puerta de Viesques. O la Braña, qu’agora ye Altu los Ferranes.

Nin que decir tien que toes estes actuaciones tampoco cunten con estudios arqueolóxicos, nin se paren ante horros, o fontes, o llavaderos, o cualquier elementu patrimonial.

P'acabar ¿Podría falar de dalgunos de los planes de futuru de la Tertulia Cultural 'El Garrapiellu'?
Llegar a cumplir otros 20 años polo menos.