Lobo: “N’Asturies nun hai compromisu nin militancia musical”

‘Al altu la lleva’ ye’l nome del EP que pon a la venta Fala non Caduca esta selmana coincidiendo cola celebración de dos conciertos de presentación. Asturies.com faló col so cantante, Adrián González Pérez ‘Lobo’ (La Pola Ḷḷena, 1987).
 
¿Qué supón esti trabayu na trayeutoria de Fala non Caduca?
 
Supón un cambiu de formación na banda y un cambiu de rumbu a la hora de componer ya iguar los nuevos temes. Quiciabes ye un discu nun tonu mas ska-rockeru qu’al principiu, allá pel 2007, pero coles mesmes ganes y enfotu. Ún cambiu estructural, música mas cenciella y estribillu facilón, básicamente.
 
¿Tán contentos col resultáu final?
 
La verdá ye que la producción nun yera la deseada, pero tenemos qu’asumir que nesi intre nun habia perres y que se trabayó a contrarreló. El discu, en llinies xenerales, espeya perbien la etiqueta del ‘D.I.Y.’ (Do it yourself/Failo tu): poques perres pa grabación, pal diseñu y pa la distribución. Sicasí, tamos arguyosos del resultáu d’esti discu pese a toles torgues que se nos pusieron per delantre.
 
Al igual qu’otros grupos de la escena, apuesten por un formatu EP. ¿A qué se debe esta tendencia?
 
Yo creo que’l formatu EP ye un apuesta de futuru pa los grupos pol mor de que‘l mundu musical ye mui duru pa colos grupos mozos como nós. Nun hai una apuesta seria por parte de discográfiques, productores, managements, sales de conciertos, etc. Polo tanto, escoyer un formatu EP ye lo más amañoso agora mesmo. D’otra parte, ye una carta de presentación mui cenciella, guapa y económica pa que un grupu espeye les sos inquietúes al traviés de la ‘música económica’, qu’anguaño ye mui urxente y vital.
 
‘Al altu la lleva’ ta compuestu por seis cantares.
 
Apostamos nesta entrega nueva pol ska-rock, ensin escaecer los nuesos raigaños folkis y, como non, punkis. Son seis cantares en llingua asturiana sacaos de dellos y delles escritores que va tiempu yá ellaboraben lletres con cierta visión futurista; temes agora actuales como la crisis, problemas coles llingues, inxusticies o la folixa. Axuntámos y entemecemos lliteratura, poesia, rock, ska y llingua asturiana.
 
Pa esti discu contamos con delles collaboraciones de xente importante pa nós, empicipiando pol asesoramientu llinguisticu, asina como correición de les lletres, de Penélope Miranda. José Luis Fernandez ‘Pepelu’ andechó con nós a la gaita; Fabián Diez, de La Tarrancha y Patrulla Dixie, que yá participara en dellos conciertos y na grabación del anterior trabayu, ‘Tiempu de povisa’, tamién nos ayudó; Llorián Garcia, de Dixebra, tocó’l violín; y el productor Dani G., que se ocupó de parte de la producción del discu, metió guitarres y baxu. Mentes, tamién contamos col sofitu de Pablo Quiroga, productor executivu d’Algamar Producciones.
 
¿Qué respuesta tuvo ente los vuesos seguidores el cantar adelantu del discu, ‘Escoyer el camín’, que puede sentise nel vuesu myspace?
 
De momento paez que tien bona acoyida polos comentarios que me llegaron. Esperamos tener una bona critica y poder llegar a más xente, yá que col otru, siendo realistes, costó abondo.
 
¿Quiénes componen Fala non Caduca anguaño?
 
Somos Carlos Casado, al saxu y la gaita; Mateo García, a la trompeta; Juan García, a la batería; Carlos García, a la guitarra; les dos incorporaciones nueves, David Rodriguez, al baxu, y Daniel Gutiérrez, a les tecles; y yo mesmu, a la voz. Amás de los que formamos el grupu anguaño, per Fala non Caduca pasó muncha xente ente los que tocaron, probaron, aidaron y collaboraron. Podiemos facer una banda gaites. (rises)
 
El xueves van presentar ‘Al altu la lleva’ nel Tierra Astur de Cualloto y el sábadu en casa, en La Pola Ḷḷena. ¿Tienen preparao dalgo espacial pa estos dos conciertos?
 
Nun disponemos d’infraestructura y, muncho menos, de perres, pa entamar daqué especial pa esta presententación. Namái podemos ufiertar un conciertu prestosu y con un soníu bien cuidáu. El xueves tocamos nel Tierra Astur de Cualloto a eso de les 23 hores tres la espicha, que tien un preciu de 16,50 euros. El sábadu, yá en casa, en La Pola Ḷḷena (Sala La Palmera), vamos blincar y sudar pa facer saltar al públicu más folixeru a partir de les 23.30 hores con una actuación de baldre.
 
Esti branu ta marcáu poles dificultaes qu’atopen los grupos pa conseguir feches por mor de la crisis. ¿Aféutavos tamién esta situación?
 
Lo mesmo te da agora sacar un CD , un DVD o un Box Set porque nun esiste compromisu nin militancia musical, en xeneral. Yá ni te cuento si falamos de compromisu políticu. Asturies vive nuna situación d’apalanque enforma sospechosa. Col tema de la crisis naide nun apurre nin un duru. Los ayuntamientos tán empufaos y les asociaciones barren pa sí mesmes y apuesten polo de siempre, que paez ser lo ‘tradicional’, esto ye, orquestina o grupu conociu.
 
Hugo Fuente, cantante de Sambre, afirmaba n’Asturies.com hai unes selmanes que nun había relevu xeneracional na escena rock n’asturianu. ¿Comparte esa visión?
 
En cierta parte ye verdá, pero yo quiero quedame colo positivo. Los pocos grupos qu’hai tan trabayando y faciendo coses pol asturianu y l’asturianismu. Esi ye’l casu de grupos nuevos como Bristol Bulldogs, Vinagre de Sidra, Octopus Garage, Zona Oscura, Griescas… Ye un piñu de xente mozo que s’esmolez pola situación tan inxusta que vive la nuesa llingua.
 
En Ḷḷena tamién paez qu’hai una bona cantera de bandes.
 
Y mui bones. Tenemos jazz, folk, pop, heavy, electro, ska, hardcore, rap y muncha xente anónima qu’ ensaya y estudia‘l so intrumentu.
 
Fala non Caduca ye un grupu mozu que se ta ganando un nome na escena asturiana. ¿Asocede lo mesmo fuera de les nueses llendes?
 
Al publicu asturianu falta-y enerxía, compromisu y vitalidá. L’espeyu al que tantu se miren, y falo del País Vascu, ye totalmente distintu. Ehí tienen cierta base y organización, cosa que n’Asturies les bandes echamos tanto en falta. Esi públicu ye más comprensible y ta más concienzáu cola problemática de la llingua asturiana qu’equi. Hasta‘l momentu pudimos dir a tocar a Lleón, Pais Vascu y Cantabria, y en nengún llau nos pusieron torgues por cantar n’asturianu. Inclusive animáronnos a siguir faciendo música en llingua asturiana, yá que-yos paecía dalgo orixinal.
 
¿Qué proyeutos de futuru tien la banda tres asoleyar esti discu?
 
Intentaremos facer dalgún intercambiu con dalgún grupu gallegu o catalán, y siguiremos cola mesma gana puesta nesti proyeutu sonoru. Pa despidime, prestábame facer un llamamientu a la conciencia, yá qu’ente toos podemos facer país, y felicitavos polos 15 años de prensa n’asturianu.