Iván Llera: “Tócanos trabayar más que nunca pa siguir enanchando'l consensu pola oficialidá del asturianu”

El periodista Iván Llera Huerta (Xixón, 1987) asocede a Inaciu Galán como presidente d’Iniciativa pol Asturianu, convirtiéndose nel segundu dirixente de l’asociaciación. Optimista colos xestos daos hasta’l momentu pol Gobiernu, espera qu’éstos “se traduzan en midíes concretes” y recuerda qu'ensin oficialidá "podemos dir avanzando".

Pasa de llevar los asuntos de Medios de Comunicación d’Iniciativa pol Asturianu a garrar la presidencia de la organización. ¿Cómo afronta’l retu?

Con ilusión. Tamos nun momentu bien importante pal futuru del asturianu. Tenemos una Xunta Xeneral con una mayoría mui clara a favor de la oficialidá; ye'l momentu de la hestoria na que más diputaos hai favoratibles a esta cuestión. Y, más allá de la oficialidá, eso tien de materializase en polítiques concretes.

Nestos ocho años Iniciativa pol Asturianu convirtióse nuna organización respetada y con pesu ente la sociedá asturiana. ¿Qué destacaríes d’esti tiempu?

Creo qu'esi ye precisamente ún de los grandes ésitos d'Iniciativa pol Asturianu. El movimientu de reivindicación llingüística yera percibíu como un movimientu agresivu; nun conectaba cola sociedá. Consiguimos demostrar que somos persones normales que namás queremos vivir n'asturianu. Na nuesa organización hai persones de toles sensibilidaes y trabayamos en comuña por esi oxetivu común. Esi ye'l camín.

¿Qué oxetivos se marca nel so mandatu?

Gustaríame acabar el mandatu con una meyor situación pa la llingua y con dalgunes cuestiones solucionaes, como la especialidá docente o la meyora de la situación de los SNL y los sos trabayadores. Ye dalgo polo que vamos siguir trabayando nos vinientes meses. A nivel internu, ún de los principales retos que tenemos ye trabayar p'algamar una mayor implantación nos conceyos. Ye una de les xeres que tenemos pendientes y na que vamos enfotanos nel futuru.

¿Quién-y acompaña na direutiva?

Na nueva directiva hai persones que yá formaran parte d'ella nel pasáu y persones nueves que yá veníen trabayando y comprometiéndose cola organización. Xuan Fernandi sigue como vicepresidente y incorpórense persones como Inaciu Iglesias, que va encargase de les relaciones coles empreses; Pilar Riesco Menéndez, qu'asume la vocalía d'Asturies Esterior; y Pablo Martín Delgado, que va ocupase de les cuestiones llegales.

¿Recibió conseyos del so predecesor y únicu presidente hasta la fecha, Inaciu Galán?

Recibílos y sigo recibiéndolos. Inaciu ye una persona a la qu'admiro personal y profesionalmente pol so compromisu y la so capacidá de trabayu. Siempres ta ehí pa echar un gabitu. Cuando entamemos a falar de la candidatura pidímos-y que siguiera na directiva como vocal de Rellaciones Institucionales ya Internacionales y aceptó. Ye un pegoyu perimportante pa la nuestra organización. El so llabor ye imprescindible.

Al igual qu’él, vusté ye periodista. ¿Ye importante la comunicación pa facer llegar el mensaxe que quier tresmitir Iniciativa pol Asturianu a la sociedá?

Ye una parte mui importante. Tener presencia mediática permítenos responder a cuestiones que surden nel día a día y marcar l'axenda. Pero comunicar nun lo ye too. Ensin el trabayu diariu y el compromisu de los socios esto nun sería posible.

Asturies tien Gobiernu nuevu y la so postura pa col asturianu ye diferente dafechu a la d’Executivos anteriores. ¿Ye optimista de cara a avanzar na normalización del idioma nestos cuatro años?

Adrián Barbón ye'l primer presidente qu'usa l'asturianu nel so discursu d'investidura. Tamién foi'l primer candidatu n'usar la nuesa llingua na so intervención nel Plenu. Too parez indicar que'l nuevu Gobiernu tien voluntá de dar pasos alantre na normalización del asturianu. Los xestos inviten al optimismu, falta ver si eso se traduz en midíes concretes.

Cultura incorpora Política Llingüística al nome, con Berta Piñán al frente. ¿Cómo recibe esti nomamientu?

Ye una mui bona noticia. Berta Piñán nun ye namás un referente de la lliteratura n'asturianu, sinón que ye tamién miembru de l'Academia de la Llingua. El so compromisu pa col asturianu ye incuestionable. Toi convencíu de que va facer tolo posible pa sacar alantre polítiques que valgan pa meyorar la situación de la nuesa llingua.

¿Qué llugar sería’l más afayadizu dientro del organigrama del Gobiernu pa dar pasos alantre na normalización?

Lo ideal sería que les competencies sobre política llingüística dependieran directamente de Presidencia y que tuvieren un calter tresversal. De toes maneres, nun convién enguedeyase neso. Ehí tenemos el precedente d'Uviéu, onde malapenes s'avanzó nos caberos cuatro años. Lo importante ye qu'haya un compromisu de tol Gobiernu y que les midides que se planteguen lleguen a toles conseyeríes.

El presidente de l’ALLA nun descarta la oficialidá esta llexislatura. ¿Cree que podría haber cambios de postura nos cuatro grupos de la derecha al respeuto?

La política asturiana y española cambiaron muncho, munchísimo nos caberos años. Si va unos años nos dixeren que díbemos tener un presidente socialista falando n'asturianu con normalidá nun lo creeríamos. Queden cuatro años per delantre. Tócanos trabayar más que nunca pa siguir enanchando'l consensu pola oficialidá del asturianu.

Mientres ésta llega, ¿qué pue facer el Gobiernu?

La oficialidá nun va llegar de güei pa mañana. Mientres, podemos dir avanzando. Política Llingüística rique d'una partida presupuestaria pa poder sacar alantre les sos midides. Lo más urxente ye ellaborar un Plan de Normalización Llingüística que pueda entrar en funcionamientu a principios del añu que vien y que recueya midíes propies y concretes pa cada estaya de gobiernu. Dempués hai cuestiones pendientes que nun tienen costu adicional, como da-y una mayor presencia a l'asturianu na RTPA.