Gallego: “El día que vea 150 persones nel campu, marcho corriendo”

El Club Marino de Lluanco, fundáu nel 1931, ye un exemplu de bona xestión y bon facer. Luis Gallego González (Lluanco, 1952) consiguió situar al equipu d’esti pueblu de 5.000 habitantes en Segunda B pese a les dificultaes qu’atopa’l fútbol modestu.

Lleva toda una vida venceyáu al Club Marino.
 
Llegué hai 28 años, anque como presidente llevo 22 años. Los seis años anteriores tuve como vicepresidente con Montán. Depués tuve otros 10 años de xugador, asina que llevo 38 años venceyáu al club. Sí, ye toda una vida.
 
¿Cuál ye la clave del pasu de Marino de ser un club que xugaba en categoríes autonómiques a competir na Segunda División B?
 
Muncha dedicación. Equí nun hai milagros nin misterios, nin más llistos nin más tontos. Esto ye como too na vida: el cambiu nel Marino foi a base d’echar tiempu y tiempu.
 
Un cambiu que se dio na década de los 80.
 
En concreto nel añu 1984, con Montán como presidente y Piñera como secretariu. Ente los trés conseguimos avanzar nesi cambiu que llevó al Marino de xugar en primera preferente y dalgún añu en Tercera, con trés o cuatro años mui buenos na década de los 50 na que se compitió na liguilla p’ascender no que d’aquella yera Tercera División y na que los asturianos xugaben con equipos de Santander, pa consolidase depués en Tercera y xubir en delles ocasiones a Segunda División B.
 
Nel momentu qu’entramos nel club nun había publicidá nel campu y nun se buscaben recursos atípicos. Entós, lo que fiximos foi principiar a buscar esos recursos atípicos y la collaboración de los socios, por exemplu pa facer les valles. Prestaríame destacar el trabayu de Santiago Heres, que tuvo dellos años rotulando chapes, lo que foi un aforru más que considerable pal club. Y ési foi l’entamu del cambiu del Marino. Nel añu 84 tábemos en primera preferente y xubimos nuna liguilla d’ascensu en La Albericia, yá que d’aquella nes liguilles xugábemos con equipos cántabros. A los pocos años, xugando en Tercera, conseguimos clasificanos per primer vez pa la Copa, con Rogelio como entrenador, y yá na temporada 95-96 algamamos el primer ascensu del Marino a Segunda División B a les órdenes de Vicente González-Villamil. Nesa primer temporada baxamos, pero tornamos a xubir pa mantenenos dos años y algamar otru ascenso nuevu.
 
Esta época foi mui importante pal Marino, yá que nel añu 2001 quedamos quintos en Segunda División B y xugamos la Copa equí contra’l Deportivo, el SuperDepor, con 5.000 persones na grada, un fechu históricu. En Lliga quedamos a un puntu namái de xugar la liguilla, no que foi la meyor clasificación de la historia de Club. Llueu, tres baxar y xubir otra vuelta, con Quirós como entrenador, conseguimos mantenenos por 5 años, no que foi la época más brillante del Marino porque mantenese nesta categoría pa nós ye como quedar campeones de la ‘Champions’. Esti añu conseguimos retornar a la categoría y esperamos poder mantenos otra temporada más y siguir ayundando a dar a conocer el pueblu, yá que Lluanco ye mui conocíu pol Marino y tener un equipu de Segunda B ye perimportante pal pueblu.
 
¿El cambiu foi namái de mentalidá de trabayu o tamién hubo inyeición de perres?
 
El cambiu foi al traviés de trabayu y cambiu de pensamientu. Foi un cambiu de buscar los recursos atípicos, qu’enantes nun se buscaben. Cuando llegué a Miramar nel 84 había dos chapes de publicidá. Con eso yá digo bastante. Entós, decidimos que namás coles aportaciones de los socios nun se podía crecer. Agora tenemos 1.160 socios qu’aporten el 15 por cientu del presupuestu y de taquilles podemos sumar un 10 o un 11 por cientu más. Poro, lo qu’hai que facer ye buscar subvenciones y, per enriba de too, recursos atípicos; y d’aquella nun los había nel Marino. Con trabayu conseguimos camudar la situación y el club principió a tirar p’arriba.
 
Hasta llegar a ser una temporada el segundu equipu d’Asturies…
 
Yo siempre digo qu’hai una cosa que ta clara y ye fundamental: ciudaes como Siero, Llangréu, Mieres y Avilés, con Uviéu y Xixón a parte, siempre taben perriba del Marino. Y cuando estes ciudaes espierten, les coses pondránse nel so sitiu porque dalguna temporada pudimos ser el tercer equipu d’Asturies per cuestiones deportives, inclusive un añu fuimos el segundu porque una campaña descendió l’Uviéu tando nosotros en Segunda B, pero foi dalgo puntual. Lo que nun pue facer nunca’l Marino de Lluanco ye intentar o pensar ser más que’l Real Uviéu o’l Sporting. El día en que’l Marino lo intente, pegaráse un tortazu de los grandes, de los que nun se recuperaría nunca. Agora tamos xuntos col Uviéu y gustaríame que xubieren a Segunda, porque ye un equipu d’otra categoría, y que’l Marino se salvase; si fora nel penúltimu partíu, meyor que nel últimu. Esa sería la temporada completa, idónea y la que debe ser.
 
¿Nel fútbol actual hai munchos equipos que pretenden vivir perrriba de les sos posibilidaes?
 
Sí, dende la Primera División, onde vimos esta fuelga de los futbolistes. Entiendo que tolos futbolistes deben cobrar, pero lo que tienen que pensar los clubes ye qu’a lo meyor nun pueden pagar lo que quieren agora los xugadores. Hai que reestructurar el fútbol profesional. Nun pue ser que los clubes adeuden perres a Hacienda y a la Seguridá Social, un dineru que ye de toos, y que se tean dando 150 o 200 millones de les antigües pesetes a un xugador de Primera División. A mi preocúpame qu’a un obreru que gana 1.200 euros pase a ganar 900 porque ye’l so sustentu de vida, pero lo que tienen qu’entender los xugadores d’estes categoríes ye que de 150 millones han de baxar a 70, o de 70 a 40. Ye adaptase a lo que caún pueda pagar, porque por munchos ingresos qu’haya de televisión, si tu sigues aumentando’l gastu en xugadores por querer fichar el meyor y quedar arriba, vas creando deuda.
 
Y no que respeuta a la Segunda División B, considero que ye una categoría que tien que desapaecer. Que la llamen como quieran, pero tien que desapaecer. Nel fútbol asturianu, el presidente Maximino y yo, amás d’otra muncha xente d’otros llaos, sabe que la fórmula ye crear una Segunda División con dos grupos: norte y sur. Nella encaxaríen equipos de potencial, como l’Uviéu, habría más espectadores al haber desplazamientos más pequeños y muncha competitividá. ¿Por qué nun s’aprueba? Porque hai 42 equipos cobrando eses perres de la Lliga de Fútbol Profesional y d’esta manera aumentaríen a 60. Lo que nun piensen ye qu’a la llarga sería muncho más rentable. Llueu, esta Segunda División B quedaría formada por ocho grupos, pa depués tar la Tercera División, la Primera aficionada… Nós taríemos en Segunda B con equipos gallegos y cántabros, y llueu esistiría una Segunda A profesional de verdá, porque’l Marino nun ye un club profesional y otros equipos de la categoría tampoco lo son.
 
Munchos clubes perdieron esti añu la categoría por nun poder pagar les fiches. ¿Ye dalgo que se vía venir?
 
Claro. Esti añu baxaron 13 por estes causes, pero hai que tener en cuenta que l’añu pasáu yá foron 7 los que perdieron la categoría. Tuvieron que buscar equipos pa completar la categoría y a eso nun se pue dir. Nun me presta que se puedan comprar places nel fúbol nin que se castigue namái les deudes colos xugadores. Hai que tener en cuenta que munches empreses y comercios tán afectaos por nun poder cobrar de los clubes y dalgunos, inclusive, vense obligaos a pesllar. Eso nun pue ser. Dende Primera División, quien nun cumpla colos pagos, debe ser descendíu.
 
Son inxustos los casos qu’hai d’equipos que fichen, nun paguen y afeuten a terceros, como sucedió col Marino l’añu que casi nos metemos na liguilla d’ascensu a Segunda División A. El Compostela, yá desapaecíu como SAD, fichó cinco xugadores n’avientu y nos quitó la plaza. Aquellos xugadores nun cobraron y nós perdimos la posibilidá de xugar una liguilla d’ascensu, que sería lo máximo pal Marino. Creo, inclusive, qu’hasta’l presidente del club que tenga impagos debería ser responsable col so patrimoniu propiu porque les lleis concursales tán llevando a la ruina a munches empreses.
 
¿Va españar el fútbol en cuatro o cinco años de siguir asina les coses?
 
Enantes. En dos años pue que veamos les consecuencies de tolo que tamos presenciando nestos últimos tiempos. Lo que nun pue ser ye querer cobrar a les emisores de radio cuando tán espardiendo’l deporte. Deberíen ser les emisores les que cobraren por promocionar el fútbol. Equí ta convirtiéndose too en dineru, dineru, dineru... El presidente de la Lliga de Fútbol Profesional (LFP) recibe 600.000 euros... Ta too nunes cifres imposibles y lo único que se fai ye buscar más perres, nuevos horarios…, y los perxudicaos somos los dirixentes de los equipos del fútbol modestu. Vamos cansar y vamos marchar nel día menos pensáu, polo qu’esto va reventar. Nel Marino somos seis na direutiva, que lo facemos too, hasta tar na entrada, y la xente marchó por estes circunstancies. Esto muerre, la xente dexa de dir a los campos y se queda en casa viendo los partíos por televisión. El fútbol va reventar, dalgunes persones ganarán munches perres, pero’l fútbol va quedar tiráu. Entós, cuando a nivel UEFA vean los descensos d’afluencia nos campos, el pasu siguiente va ser la creación d’una Lliga Europea.
 
¿Ye necesaria una fuelga del fútbol modesto?
 
Va haber pronto una reunión y ye posible que pare’l fútbol. Nun veo otra solución como respuesta al tema de los horarios de la televisión. Si nos dan perres, 10.000 o 15.000 euros por equipu, eso nun va valir pa nada porque al tener el campu vacíu la xente pierde la ilusión de xugar nun equipu como’l Marino. De xugar con 750 espectadores por partíu a tener 150 na grada… Yo lo tengo claro. El día que vea a 150 persones nel campu, marcho corriendo.
 
¿Son les televisiones el cáncanu del fúbol?
 
Sí, porque tán a lo suyo y tán afeutando a tol fútbol modestu. Amás, el repartu de los derechos televisivos en Primera División provoca una desigualdá que fai que’l fútbol pierda tol interés pal aficionáu. La LFP ta mirando a güei y nun piensa nada nel mañana, y el mañana nel mundu del fútbol va ser mui cruel.
 
¿Qué opina de la fuelga de futbolistes profesionales?
 
Yo veo correuto que la faigan, pero deberíen ser más realistes y pensar cuánto deben de cobrar pa nun tener problemes pa facelo. Enantes de firmar un contratu deben de mirar qué tien esi equipu y cuánto-y pue dar. Otra manera, dalgo que veo bien del alcuerdu ente los futbolistes y la LFP ye qu’a los trés meses de nun cobrar el xugador pueda marchar, pero tengo la impresión de que nengún va colar del equipu porque si ye un figura’l club va paga-y lo que-y debe, y si ye un futbolista del montón, nun va querer dir a otru club ganando menos perres pese a que nun xuegue nin cobre.
 
No que respeuta’l tema deportivo, ¿cómo ve l’aniciu de la temporada del Marino?
 
Empezamos mui bien con una victoria en San Sebatián de los Reyes, un equipu de la nuesa lliga, y un empate ante un güesu de la categoría, el Leganés. Principiamos con cuatro puntos, pero hai que ser realista y pensar que’l nuesu equipu ye pa mantenese. Nós tenemos una lliga con otros ocho equipos y tenemos que dexar a cinco per debaxo. Llueu ta la otra lliga, onde tán tolos favoritos: Uviéu, Albacete, Tenerife, Lugo, Real Madrid Castilla y Leganés.
 
La continuidá de José Luis Quirós como entrenador, ¿ye daqué importante p’algamar l’oxetivu de la permanencia?
 
Ye dalgo importantísimo. Quirós tuvo equí cinco años consecutivos y, tres tomase un descansu, tornó pa facer un favor a un collaciu y entrenar al Marino en Tercera y xubilu. Agora torna a faceme un favor entrenando esta temporada en Segunda División B, dalgo clave pa llegar a bon puertu porque Quirós ye la base deportiva d’esti club. Él mesmu fixo esti equipu y acoplólu, y les coses funciones perfectamente. A parte, sabe onde ta, sabe lo que tenemos y sabe lo que queremos.
 
¿Cómo ye la política de fichaxes del Marino?
 
Bien cenciella. Hai que pretender que toos sean d’Asturies porque nun tenemos pa pagar vivienda nin manutenciones, namái los gastos de desplazamientu. Entós somos toos asturianos, a esceición del casu de Carnero porque yera un puestu, el de delanteru, que nun atopábamos n’Asturies tres la lesión de Carlos. Hablamos con Blaya y con Miguel, pero por una serie de circunstancies nun pudo ser. Tamién buscamos una mezcla d’esperiencia y mocedá, fórmula que lleva dándonos bonos resultaos, amás de ser realista coles coses.
 
¿Tien el Marino apoyu de l’afición de Lluanco?
 
L’afición ta totalmente volcada col equipu. En Tercera División nunca baxamos de 500 persones y en Segunda B de 700 nun vamos descender. Hai que tener en cuenta que Lluanco tien 5.000 habitantes y que’l Marino tien 1.160 socios, munchos de fuera d’Asturies que braneen equí y quieren collaborar col club.
 
¿Qué opina del grupu de Segunda B nel que metió la Federación Española a los equipos asturianos?
 
El cambiu de grupu matónos. Esti añu vamos a percorrer 26.000 quilómetros, cuando la mayoría d’equipos de la categoría, como los castellano-lleones o vascos, van facer 8.000. Ello supón un gastu de 15.000 o 20.000 euros más. Pero nun queda ehí la cosa, porque tar nesti grupu con castellano-manchegos y madrileños fai que mengüen les perres de les taquilles d’equipos que podríen traer aficionaos, como la Ponferradina, el Salamanca, el Mirandés o’l Zamora, lo que supondríen 4.000 persones más na grada de Miramar y 60.000 euros de caxa. Polo tanto, son 80.000 euros los que se te van y qu’hai que buscar, porque tenemos un presupuestu de 370.000 euros.