Ferreira: “Asturies tien fecho un trabayu exemplar na recuperación y promoción de les mazcaraes”

Portugal ye’l país convidáu na primer edición del Festival Arcu Atlánticu que ta celebrándose en Xixón. Gran parte de les actividaes venceyaes al país lusu tán entamaes por Progestur, asociación presidida por Hélder Ferreira (Loures, 1964).

¿Qué van atopar los asturianos que s’averen, nel Festival Arcu Atlánticu, al Campu Valdés?

La representación portuguesa va tar al más altu nivel, yá sía n’artesanía, productos rexonales, gastronomía o animación, llevando lo meyor de Portugal. Van ser 20 carpes onde atopar una ufierta turística y cultural estructurada y de calidá.

Las Aldeias do Xisto, la Rota do Românico, l’Asociación de Artesanos de la Sierra de la Estrella, el Sabor Serrano, Ginjinha de Óbidos, el Ayuntamiento de Coruche, vinos del Alentejo, de la cooperativa Granja – Amareleja, y del Duero– Quinta Nova N.S do Carmo, Ramos Pinto, Adega Cooperativa de Favaios, Delta y Sagres, son dalgunes de les entidaes/marques que van llevar y promover la calidá de la producción nacional. Los productos son variaos y de tol territoriu nacional, dende’l testil de la Sierra de la Estrella, corchu de Coruche y peles de Santarém, dulces tradicionales d’Amarante, con presencia fuerte de la Dolmen, conserves Nero y de Peniche, ‘fumeiro’ del Minho, vinos, aceites y compotes del Alentejo y Duero, pastel de nata Panike, artesanía de la Madeira, naranja del Algarve, ente munchos otros.

La animación ye dinámica y apelativa con delles degustaciones gastronómiques y prebes de vinos conducíes pol enólogu Virgílio Loureiro. Mentes, l’animación va traela un grupu de percusión y una cantante de fadu, y van sortease fines de selmana na Quinta Nova N.S. do Carmo.

¿Cómo surdió la oportunidad de participar nel certame?

Por convite del Conceyu de Xixón y gracies a una rellación yá llarga con Asturies mentes el proyeutu ‘Máscara Ibérica’ y otras iniciatives d’intercambiu cultural, como la Rede Ibérica de la Mázcara que tenemos desendolcao a lo llargo d’estos años últimos.

¿Qué supón pa Progestur y pa la cultura portuguesa esta presencia destacada a lo llargo d’esta selmana en Xixón?

Ye, ensin dulda, una oportunidá de promoción y visibilidá de la marca Portugal: dende los sos productos a la so artesanía, y claro ta, al propiu país como destín turísticu. Amás, somos el país convidáu y gran destacáu nesta primer edición.
Esta presencia va fortalecer les rellaciones ente los países del arcu atlánticu, potenciando les sos rellaciones y creando más oportunidaes d’intercambiu y de collaboración cultural y económica. Nuna época na que ye necesario muncha imaxinación pa superar la coyuntura económica, son les iniciatives d’esti tipu les que podrán reanimar la economía.

¿Hai similitúes ente la cultura portuguesa y l'asturiana?

Podríemos falar de la gastronomía, cola similitú ente la fabada asturiana y la ‘feijoada’ portuguesa, o’l vuesu arroz con lleche col nuesu arroz dulce, asina como otros exemplos como los escelentes embutíos y quesos que dambos tenemos. Y tamién cómo apreciamos estes delicies gastronómiques y gustamos de comer bien.

Sicasí, lo que de verdá nos xune son los raigaños d’estos dos países. Y les rutes comerciales pela mar dende mui atrás na historia. Una xunión cultural que fai qu’esista un espontaneu y sinceru entendimientu ente los portugueses y los asturianos, más fuerte y verdadera que cola mayoría de territorios d’España. Y, quiciabes, el motivu principal sía la temática que preside’l Festival Arcu Atlánticu, yá que dambos tamos influenciaos pola proximidá col Oceánu Atlánticu.

¿Qué se conoz d’Asturies en Portugal?

Los portugueses, en xeneral, tienen conocimientu y identifiquen les Asturies. Sicasí, son pocos los que realmente la visiten, tal como son pocos los asturianos que nos visiten. Pero son yá munchos los portugueses que viaxen pa conocer dalgunos de los principales puntos d’esti territoriu, como los Picos d’Europa o les ciudaes d’Uviéu y Xixón. Asturies ye conocida pola naturaleza, la costa fenomenal que tien y la so gastronomía rica, amás de pola amabilidá de la so xente. Agora, colos vuelos direutos ente Asturies y Lisboa, tamos convencido de que va surdir una oportunidá de conocenos más y meyor.

Progestur ye un coleutivu que ta impulsando en tola Península Ibérica la recuperación de les mazcaraes d’iviernu.

Ye una de les tradiciones más antigües en términos universales. La mázcara apaez dende qu’hai referencia al ser humanu y la so evolución. Ye una de les temátiques más universales y tresversales qu’esiste na cultura. Y el proyeutu ‘Máscara Ibérica’ ayudó muncho a la difusión d’esti tema. Col Festival Internacional de la Máscara Ibérica en Lisboa conseguimos más de mil noticies per añu a nivel nacional y internacional. Y ye qu’esti proyeutu ye internacional, yá que tamién hai un certame en Zamora.

Al traviés d’esta iniciativa tenemos la esposición homónima que viaxó per tola Península Ibérica y qu’agora ta n’Asturies. Tamién como resultáu d’esti proyeutu creóse la Rede Ibérica de la Mázcara (RIM), na qu'un grupu d’espertos van facer l’estudiu pa convertir los rituales d’iviernu en Patrimoniu Inmaterial de la Humanidá de la UNESCO. Amás, contribuyó a la recuperación de dalgunos rituales y grupos que se perdieren. Tamién algamamos incluyir la mázcara en dellos proyeutos europeos que nos permiten servir d’enllaz con dellos países d’Europa, proporcionando un intercambiu mui fuerte con esta temática o otres.

¿En qué consiste la muestra ‘Máscara Ibérica’ del Muséu de Pueblu d’Asturies?

Amás de dellos rexistros fotográficos y testos esplicativos, hai una muestra representativa de les indumentaries y mázcares utilizaes nos rituales, asina como videos, soníos y materiales del proyeutu qu’ufren una dinámica mui fuerte a la esposición. Tán representaes cerca de 50 imáxenes de rituales con mázcara en Portugal y España. De Portugal atopamos los Caretos de Lagoa, nel conceyu de Mira; los Cardadores de Vale de Ílhavo; laBugiada de Valongo; l’Entrudo de Lazarim y les mázcaraes d’iviernu del Nordeste Tresmontanu. Mentes, d’España tenemos imáxenes de los Entrudos, de la provincia d’Ourense –como los de Xinzo de Limia, Verín o Manzaneda–, los Entrudos de Lleón –colos toros y los guirrios de Velilla de la Reina y Llamas de la Ribera– y de los rituales d’iviernu de les provincies de Zamora y Cáceres –como jarramplas y carantoña–. Los países del Cantábricu tán representaos colos carnavales d’Alsasua, de la Comunidá Foral de Navarra; la Vijanera, de Silió (Cantabria); Os Reises d’El Valledor y Tormaleo, Los Sidros y Les Comedies de Valdesoto y el Guirria de Ponga, toos éstos d’Asturies.

¿Cómo nació la idea d’entamar esta esposición itinerante?

Tien el so orixe nos llibros de ‘Máscara Ibérica’, que yá cuenta con dos ediciones y ta camín d’una tercera. Tres pasar per Lisboa, Porto, Zamora, Coimbra, Faro y otres ciudaes peninsulares, ye pa Progestur una satisfaición grande presentar agora la esposición n’Asturies, territoriu que tien fechu un trabayu exemplar na recuperación y promoción de les tradiciones rellataes col usu y práutica de la mázcara.

¿Ye Asturies ún de los territorios onde más vitalidá tienen les mazcaraes d’iviernu?

Asturies tien Los Sidros de Valdesoto (Siero); Os Reises de Tormaleo (Ibias); Os Reises d’El Valledor (Ayande) y el Guirria (Ponga). Préstame la xente d’Asturies, que siempre amosó'l so interés en collaborar n’iniciatives de promoción, valoración y salvaguardia de la tradición de la mázcara. Un exemplu de la recuperación y vitalidá de les mazcaraes n’Asturies ye que, dende hai dalgunos años, hai presencia de delles agrupaciones del Principáu nel desfile ‘Máscara Ibérica’, que se celebren tolos años en Lisboa y en Zamora, amás de n’otres iniciatives con otres rexones, consecuencia direuta del intercambiu ente los grupos qu’entames les mazcaraes.

¿Sorprende-y dalguna pecualiaridá d’estes fiestes asturianes?

La más particular y única que tien Asturies ye la mazcarada del Guirria, en San Xuan de Beleño (Ponga). Nun hai nada similar en tol mundu. Los Sidros de Valdesoto tamién son mui carauterísticos y les sos mázcares son úniques, pero la representación que faen de la comedia ye similar a la d'otres celebraciones. Os Reises de Tormaleo y El Valledor tamién tienen una representación teatral que s’asemeya bastante a otres fiestes d’esti tipu n’otros llugares del mundu.

¿En qué situación ta agora la Rede de la Máscara Ibérica?

La RIM ye una iniciativa de PRODESTUR, una asociación ensin ánimu d’arriquecimientu que quier presentar ante la UNESCO un proyeutu pa que se declaren Patrimoniu de la Humanidá les fiestes tradicionales de mázcaraes d’iviernu de la Península Ibérica. Ente los miembros –conceyos, asociaciones de turismu, coleutivos culturales y espertos– destaca un grupu d’espertos, responsable del estudiu pa la presentación ante la UNESCO, y una comisión que permitirá empezar los trabayos de la oficialización de la RIM, constituyida pol Ayuntamientu de Valongo, la Diputación Provincial de Cáceres, la Diputación Provincial de Zamora y PRODESTUR. Queremos crear una plataforma que permita a los miembros d’organizaciones rellacionaes coles mázcares ibériques tradicionales conocese y compartir conocimientos y información, amás de los problemes que tien cada asociación, y buscar, en conxunto, una solución. N’España hai más de cien fiestes de mázcares tradicionales y en Portugal tan sólo venti, pero les mázcares de dambos países tienen muncho que ver y escuenden munches tradiciones detrás que queremos poner en valor. Les mazcaraes son una de las celebraciones más universales y tienen más de diez mil años d’historia.

¿Cuáles son los proyeutos próximos de Progestur?

Anguaño tamos trabayando en dalgunos proyeutos de desarrollu territorial, siempre col oxetivu de promover la ufierta turístico-cultural de les rexones, creando sinerxies coles entidades llocales, rexonales y gubernamentales. Tamos tamién trabayando nos trámites pa oficializar la Rede Ibérica de la Mázcara y principiar l’estudiu pa la salvaguardia del patrimoniu inmaterial de la mázcara tradicional, nel tercer tomu del llibru ‘Máscara Ibérica’ y en da-y un xiru a la esposición de la Máscara Ibérica, agora nel Muséu del Pueblu d’Asturies y yá con pidíos de ciudaes de Portugal y España.

Toos estos proyeutos busquen la promoción y valoración de la ufierta turístico-cultural al mesmo tiempo que refuercen l’intercambiu colos axentes culturales, turísticos y económicos de dambos países. Ésta ye una visión pa la recuperación y afirmación de la nuesa cultura como un factor verdaderu de crecimientu económicu sostenible. Más que nel futuru de la nuesa asociación, tamos comprometíos n’ayudar a les rexones llocales y al país pa que consigan atopar nel so patrimoniu cultural y nes industries creatives, una fonte de creación de riqueza, d’espíritu empresarial y de trabayu.

Na semeya, Ferreira xunto con un maniquí cola indumentaria del Guirria de San Xuan de Beleño perteneciente a la esposición 'Máscara Ibérica' que se pue visitar hasta setiembre nel Muséu del Pueblu d'Asturies.