Fernández Crestelo: “La investigación del patrimoniu industrial ye’l primer pasu pa la so conservación”

La web Patrimoniu Industrial ye una ayalga que recueye decenes d’allugamientos indispensables pa entender la nuesa historia recién. La periodista Marta Fernández Crestelo (Ourense, 1973) y el cineasta Marcos M. Merino son los responsables de Freews, productora responsable d’esti proyeutu con versión n’asturianu, en castellanu y n’inglés que ta acabante d'anovase.

Yá van dos años dende qu’entamó’l proyeutu Patrimoniu Industrial. ¿Tán contentos cola repercusión que ta teniendo?

La idea siempre foi contribuyir a la difusión del patrimoniu industrial asturianu y atrayer l’interés d’un públicu non necesariamente especializáu o ‘convencíu’ de la so importancia. L’usu de los medios dixitales respuende a esi oxetivu porque, amás de fomentar el llibre accesu al conocimientu, tamién nos permite, per un llau, poner nel mapa global (con visionaos dacuando dende llugares inesperaos) l’inmensu llegáu industrial qu’atesoramos y, per otru, al ser el meyor vehículu pa ello, llegar a los más mozos que, al final, serán los responsables de la so conservación.

En cifres, dende’l so llanzamientu en xunetu del 2019, la web recibió más de 85.000 persones de 116 países que vieron un total de 210.000 páxines y 160.000 videos. Trés de cada diez proceden de fuera d’España, siendo Estaos Xuníos el segundu país con más visites. L’año pasáu les visites aumentaron un 40 por cientu, y no que llevamos de 2021, un 46 por cientu.

Pero más allá del impautu xeneráu, tamos contentos de poder desendolcar un proyeutu multidisciplinar con un equipu de 33 profesionales de la cultura, l’arte y la teunoloxía que, amás, despertó l’interés d’instituciones públiques y empreses. Frutu d’esti trabayu en rede, güei contamos con una ferramienta académica disponible pa cualquiera que decida averase y conocer el patrimoniu industrial d’Asturies, tan inmensu que pudimos difundir un conteníu distintu cada día nestos dos años de vida.

Agora faen una ampliación mui ambiciosa de los conteníos de la web acompañada d’una reestructuración de la mesma. ¿Qué inclúi dicha ampliación?

Otra de les ventayes de los formatos dixitales ye que nos permite actualizar los conteníos, inventarios y categorización de manera constante. La navegación camudó dafechu, agora ye más intuitiva y reducimos los pasos (clicks nesti casu) incorporando l’usu de fiches audiovisuales. Van notalo sobre manera los que se coneuten col móvil, porque tresformamos completamente’l so diseñu y usabilidá.

Foron cuasi dieciocho meses de trabayu p’ameyorar la programación, categorización y diseñu de la web qu’agora inclúi 250 testos nuevos, toos inéditos y escritos por investigadores formaos na Universidá d’Uviéu, 1.000 conteníos multimedia nuevos y 100 testimonios más de la memoria oral de tantos y tantes trabayadores que contribuyeron al progresu d’Asturies. Cuando lo traduces a cifres daste cuenta de la inmensa buelga industrial espardida per tol territoriu.

Vustedes vienen del mundu del cine, lo que se dexa nota nel tratamientu que dan a los videos de los diferente allugamientos.

El cineasta ye Marcos M. Merino, direutor del proyeutu. Ye verdá que cuando decidimos volver y asentanos n’Asturies me reciclé na producción cinematográfica, pero yo vengo del mundu del periodismu, profesión qu’exercí per 20 años y na que me formé por vocación, y que quiciabes por eso terminé abandonando, pero del estáu del periodismu si quier falamos n’otra ocasión.

Faigo esta introducción porque la propuesta audiovisual de la web aúne entrambes disciplines. Dende’l puntu de vista narrativu, plantegamos la non intervención y un puntu de vista radicalmente observacional col oxetivu de nun interferir nes emociones qu’a cada persona-y puedan espertar los espacios patrimoniales retrataos. Tresformar al máximu un visionáu audiovisual nuna visita in situ teniendo en cuenta les limitaciones impuestes polos medios téunicos, porque siempre que reproduces la realidá a otru formatu entra n’escena la suxetividá.

Apostamos por planos llargos montaos con un ritmu pausáu que convida a la reflexón y, sobre manera, rescamplamos el planu sonoru. Óscar de Ávila, el montador de soníu que trabaya habitualmente nes nueses películes, diseñó un soníu específicu pa caún de los vídeos de la web. Teníemos nidio que’l soníu habría ser protagonista, en parte porque’l silenciu nun esiste (o eso al menos ye lo que me dixeron siempre los profesionales na materia), pero tamién porque’l ruíu ye una carauterística inherente a los espacios industriales con un potencial tremendamente evocador. Como diz Faustino Suárez Antuña, coordinador del área histórica de la web, “dime cuenta del fin de la minería cuando sentí cantar a los páxaros nel valle d’El Nalón”.

¿Atoparon problemes o incovenientes a la hora de rodar?

Siempre surden imprevistos a la hora de rodar, pero más allá de los propios de la profesión tuvimos absoluta libertad de movimientu y d’aición. La collaboración por parte de les empreses, instituciones y conceyos que tienen la titularidá de los espacios patrimoniales a los qu’accedimos foi completa sacante contaes ocasiones. En concreto dos y convido-y a navegar pela web pa descubrilos, porque son dos allugamientos del patrimoniu industrial indispensables pa entender meyor la historia reciente d’Asturias. Esi escayu téngolu claváu.

¿Cuándo vieron necesario dar el pasu de recuperar el nuesu patrimoniu industrial al traviés d’esti proyeutu?

Como creadores interésanos el contestu nel que vivimos, facémonos entrugues sobre lo que nos arrodia y cada trabayu de nueso ye deudor del anterior. Vamos avanzando a partir de lo vivío, de lo yá esperimentao, y creo qu’eso aporta coherencia al nuesu trabayu. Decidimos regresar a Asturies pa documentar los llatíos últimos de la minería como suxetu universal d’una cultura y estilu de vida desaniciaos y ablicamos al ver qu’apenes había producciones con esta temática. Decidimos instalanos nesi momentu nel valle de Turón como averamientu a la realidá que queríemos contar y ésa foi la mio primer vez col patrimoniu industrial.

A partir d’ehí tuvimos la oportunidá de conocer los patrimonios d’otros países europeos d’enorme tradición industrial y vímoslo mui claro. Nun-y falo d’epifanía, pero pue que se nos escapara un ‘Eureka!!’. Ensin entrar en comparaciones, esos viaxes consolidaron la idea d’intentar construyir un rellatu rigurosu, integrador y contemporaneu al rodiu del nuesu patrimoniu industrial.

Echando un güeyu a los conteníos vese que munches de les actuaciones desendolcaes n’Asturies son llacerioses y que l’abandonu del nuesu patrimoniu industrial ye cuasi norma. ¿Por qué se dieron estes situaciones?

Falta d’interés, d’imaxinación, de presión social, d’autoestima, un proceso de reindustrialización agónicu, escasa tresmisión cultural ente xeneraciones, lentitú nos procesos de proteición de los bienes... Si la causa fora sólo una nos permitiría organizanos meyor. Dacuando les prieses nun son la meyor opción y si nun sabes qué facer col patrimoniu, déxalo tar, que para destruyir siempre hai tiempu. Tamién ye verdá que pa munches persones falar de patrimoniu industrial implica una derrota y asumilo lleva’l so tiempu. El meyor usu que se-y pue dar a un espaciu de trabayu ye más trabayu, pero les propuestes nun van perhí.

L’arqueoloxía industrial apaez mentada nel Estatutu d’Autonomía y hai llexislación tanto nacional como autonómica que protexe’l patrimoniu; lo que se necesita ye ponela en práutica y equí hai profesionales con décades de dedicación pa poder facelo. De fechu, Asturies ye un referente nacional na investigación del patrimoniu industrial, que ye’l primer pasu pa la so conservación. ¿Cómo vamos protexer y defender lo que nun conocemos? Un exemplu evidente del desconocimientu coleutivu son les centrales hidroeléctriques diseñaes pol arquiteutu y artista José Vaquero Palacios, con un enorme prestixu internacional, y qu’amás son tamién un exemplu de conservación.

¿Hai un cambiu na mentalidá con respeuto al tratamientu del nuesu patrimoniu industrial nos años últimos?

Con permiso de Javier Fernández, direutor del Muséu del Ferrocarril d’Asturies y una referencia nacional en temes ferroviarios, voi facer de mio les sos pallabres. Contó Javier va tiempu qu’hasta hai non muncho yera habitual referise al patrimoniu industrial como “chatarra” y que, polo menos agora, eso yá nun se diz. Paez que dalgo avanzamos, porque cuando cambia’l llinguaxe ye cuestión de tiempu que se tresforme tamién l’imaxinariu coleutivu, pero tiempu ye precisamente lo que nun sobra en cuestiones venceyaes col patrimoniu.

¿Por qué ye importante caltener el nuesu patrimoniu industrial?

Podría-y responder a la gallega: ¿y por qué non? Habrá que caltener aquello que sía relevante dende’l puntu de vista arquiteutónicu, teunolóxicu, artísticu, históricu y paisaxísticu, y qu’aporte valor a la sociedá, y nun falo namái d’un valor económicu, que tamién, sinón de tolos intanxibles surdíos al calor de la industria y qu’espliquen quiénes somos y nos ayuden a saber quiénes queremos ser. El so potencial como recursu turísticu ta por esplorar y la combinación que tenemos equí de patrimoniu industrial y naturaleza conviértenlu nun pegollu importante sobre’l que construyir el tan cacarexáu turismu sostenible.

Nun podemos escaecer qu’hasta equí se desplazaron los meyores arquiteutos y inxenieros de la época pa poner en marcha un procesu industrializador que camudó radicalmente la fisonomía del territoriu y de los sos habitantes. Que foron munchos –nunca sabremos la cifra esauta– los que finaron construyendo esi patrimoniu y esi llegáu deberíemos dexalu nes meyores condiciones posibles pa les xeneraciones del futuru.

Nel proyeutu Patrimoniu Industrial apostaron pol asturianu y l’inglés amás del castellanu como idiomes, nun gran esfuerciu dao’l volume d’información que manexen.

La inclusión de trés idiomas resulta un sobresfuerciu tanto a nivel de trabayu como financieru, pero non facelo asina resultaría del too incoherente colos oxetivos del proyeutu, asina que lo plantegamos en trés llingües como un exerciciu de rigor y coherencia: ¿Cómo vamos poner en valor el patrimoniu cultural si inoramos ún de los sos bienes con mayor valor inmaterial, que ye amás ún de los más febles?

El castellanu y l’inglés permítennos acceder a práuticamente cualquier ciudadanu del mundu, colo que cumplimos l’oxetivu de difundir y visibilizar el patrimoniu industrial asturianu de manera global. Y l’asturianu forma parte del patrimoniu inmaterial, que ta mui presente na plataforma. La pena ye nun contar colos recursos necesarios pa incluyir otros idiomes como l’alemán y el francés.

En llingua asturiana tamién tienen la iniciativa paralela ‘50 semeyes del patrimoniu industrial d'Asturies’, emitiéndose anguaño en TPA. ¿Cómo ta siendo’l so recibimientu?

‘50 Semeyes del patrimoniu industrial d'Asturies’ foi ún de los siete proyeutos seleicionaos na convocatoria conxunta de la Conseyería de Cultura y RTPA como una de les midíes pa estimular el sector cultural y decidimos presentanos precisamente p’ampliar la difusión del patrimoniu ente una audiencia alloñada de los medios dixitales. Actualmente ta emitiéndose, asina que ye pronto pa valorar el so algame y repercusión. De momento nun disponemos de datos y estadístiques que nos permitan analizalo, pero creo que ye una apuesta acertada con un formatu más televisivu y esportable a otres temátique. N’apenes un minutu pue vese y conocer los fitos más importantes de los diferentes sectores industriales.

¿Van siguir ampliando Patrimoniu Industrial?

Somos bastante inquietos y yá tenemos en mente nuevos retos profesionales. Nel casu de la web, prestaríanos incorporar un restolador p’axilizar y facilitar l’accesu a los conteníos, sobre manera por mor del volume de les propuestes. A día de güei tenemos preparaos conteníos nuevos hasta’l 2024. Hai material pa escribir una novela coles historias que nos contaron decenes de trabayadores y trabayadores de la industria, aunque eso más qu’un proyeutu sería un suañu. Y respeuto al cine, si too va bien, empezaremos a rodar un curtiumetraxe la seronda próxima.