Fernández Martínez: “El centru de cría del faisán montés ye la escenificación de la crónica d’una muerte anunciada”

La Coordinadora Ornitolóxica d’Asturies (COA) ye una organización que trabaya na conservación de l’avifauna del país y que respeta y promueve los nomes asturianos de les especies. El so vicepresidente, Rubén Fernández Martínez (Avilés, 1977), faló con Asturies.com de l'actividá de la organización y de la situación de los animales en peligru de desaniciu, como’l faisán montés o pequeños páxaros insectívoros, ente otros.

¿Cuándo naz la COA?

Nel añu 1987 al aconceyase 15 persones con ganes de formar un grupu. Nació con vocación de entidá independiente nun venceyada con otros grupos yá formaos, y hasta la fecha equí tamos, dando guerra.

¿Cuáles yeren los oxetivos cimeros?

Anque l’interés pola observación de la natura yera común a tolos integrantes, los fines de l’asociación centráronse na conservación, yá que’l nuesu sentir, yá d’aquella, yera que de siguir asina la situación, de base mala, ésta diba a dir a peor.

¿Cómo ye’l métodu de trabayu?

Debaxo’l paragües de la conservación entren munches coses, centramos la nuesa actividá en dos temes. En primer llugar, l’aición escontra les actividaes que comprometen la conservación de les aves o los sos hábitats, pente medies d’ alegaciones, y, cada vegada menos, denuncies y xuicios, yá que somos una asociación probe –namás que nos sustenten les cuotes de los socios– y la xusticia ye cara. Esti mal súfrenlo munchos grupos conservacionistes, a los que se nos fizo un cercu pa que nun nos movamos.

El segundu preséu qu’usamos ye l’estudiu de les poblaciones d’aves, esbillando datos per toda Asturies, tomando la temperatura a les poblaciones d’aves y asoleyando les nueses pescancies en delles espublizaciones, que sirven d’utilidá a muncha xente a la hora de ver cómo ta la situación y l’estáu de les especies d’aves qu’adiquen n’Asturies.

¿Quién la forma?

Somos alredor de 200 socios, de los que cerca de la metá son biólogos o de carreres venceyaes, ente los que hai dellos doctoraos y profesores d’universidá, lo que nos da valor en cuanto al rigor y bon facer de los nuesos proyeutos. Otra parte pervalible son los téunicos, yá qu’otru percentax perimportante de los socios son guardes y téunicos de l’alministración, polo que tán avezaos a los problemas reales del campu y el monte astur. Éstos, munches vegaes, son los que ven antes que naide alboriar daqué problema en cuanto a conservación se trata, yá que son xente preparao y comprometío. Queden dellos socios que venimos d’otres actividaes nun venceyaes colo natura, lo que nun quita que nun tengamos ganes de trabayar y nun dexemos d’amestar el nueso ‘granín al copín’.

¿Cuáles son les actividaes principales de la COA?

Como dixe antes, actividaes venceyaes col estudiu de les aves, asina por exemplu tolos iviernos –a mediaos de xineru– facemos un censu total les aves acuátiques d’Asturies, nun sólo na costa, sinón en tolos ríos importantes, embalses, llagos y demás. Nel 2017 van cumplise 30 años de magar qu’entamamos a facelo; 30 años moyándonos cuntando gaviotes, coríos y samarmuyos. Poques asociaciones tienen la infraestructura humana pa desendolcar esti trabayu.

Tenemos tamién la nuesa  xoya de la corona, el ‘Atlas de Aves Nidificantes de Asturies’, asoleyáu nel 2014, y que repasa l’estáu y evolución de les poblaciones d’aves qu’añeren na nuesa tierra, con datos d’ente 1990 y 2010. Un proyeutu de 20 años de trabayu a la búsqueda d’aves nos llugares más apartaos d’Asturies nel que collaboraron 183 ornitólogos. Esti tochu de 600 páxines, nel so pocu tiempu de vida, yá ye un referente non sólo n’Asturies, sinón fuera d’equí.

Como pue ver los nuesos proyeutos nacen como carrera de fondu. Tenemos ganes y xente perpreparao pa ello –ta mal dicilo, pero ente los nuesos socios tán muchos de los ornitólogos d’altu nivel d’Asturies, y dalgún de los punteros n’España– y esto damos el valor del rigor nes nueses actuaciones, yá que tenemos información de primer mano, coyida del campu a lo llargo’l tiempo y nun nos sofitamos en suposiciones o pareceres, sinón en datos reales de problemas reales.

Otru proyeuto que desendolcamos, ye’l ‘Annuariu Ornitolóxicu d’Asturies’, qu’añu tres añu esbilla los datos de les aves asturianes, y qu’asoleyamos na nuesa revista ‘El Draque’. Esa información forma una base de datos enorme, yá que tenemos datos desde los años 60 y 70 hasta’l día de güei, con una media d’ente 20.000-40.000 datos añales, que, amás d’amosar les especies rares y escases, tien información de cuasi toles especies qu’afiten n’Asturies en too esti tiempo; otra vegada un proyeutu desendolcáu a lo  llargo de munchos años de trabayu.

El ‘Annuariu Ornitolóxicu Dixital’ ye la iniciativa última del coleutivu y ta acabante de cumplir el so primer añu de vida. ¿Qué valoración fai d’ella?

La valoración ye perbona; el grau d’implicación de la xente foi increíble. Paez ser qu’a la xente gusto-yos la idea de poder ver qué páxaros y ónde se vieron ayeri o la selmana pasada n’Asturies. Nun ye una idea nueva; yá hai delles páxines españoles que faen esto nes sos autonomíes o pa un grupu concretu d’aves. Equí mesmo inténtose fai años, anque la cosa del Internet entá nun se desendolcara como nos nuesos díes, y nun cuayó.

Preba de que güei si cuayó ye que munchos de los colaboradores nun son socios de la COA, sinón d’otros grupos o independientes colos que trabayamos mano a mano, yá qu’entendemos (ellos y nós) que toos vamos nel mesmo sentíu: el de la conservación de les nueses aves.

¿Qué datos son los qu’aporten les persones collaboradores?

Anque pidimos datos de toles especies qu’adiquen n’Asturies, ye nidio que nun ye lo mesmo una cita de gurrión que de faisán montés o gallu. Por eso tenemos unos criterios de seleición de cites, que colgamos na web pa que los collaboradores destremen qué ye d’interés y qué non.

Cada observador danos información sobre la especie, el llugar y la fecha, y nós colgamos la información de toles cites día a día. El día ún de cada mes ponemos el contador a cero, pero colgamos un informe mensual con toles cites recoyides n’abiertu, pa que toos puedan consultalo.

¿Cómo se xestiona tal cantidá d’información?

La receta ye perfácil: ganes y hores, qu’espero que sigan durante munchos años. La xestión ye lo de menos. Da trabayu sí, pero’l valor verdaderu del proyeutu ye que ta moviendo a muncha xente a amestar los sos datos. Ensin la so collaboración, l’anuariu dixital nun val nada. Nesta asociación, como yá se vio, tolos proyeutos son coleutivos. Dirixen o coordinen unos pocos –porqué tien que lo facer daquién–, pero los resultaos son gracies al esfuerzu de toos.

Ente tolos datos aportaos nel 2014, ¿cuáles foron los más llamativos?

Pa los que tienen interés poles aves rares tenemos una serie de datos d’especies estrañes n’Asturies, como una utre africana (Gyps rueppellii) o un mazaricu asiáticu (Pluvialis fulva) enxamás vistes per equí. Mentes, pa los que tenemos interés poles aves añerantes, la cantidá d’información que s’esbilló ye lo más interesante: axuntamos unes 13.000 cites sólo nel anuariu dixital.

¿Y esmolecientes?

Los qu’amuesen el desaniciu de munches especies, non sólo conocíes como’l faisán montés, sinón el de munches que muerren en silenciu y que muncha xente nun s’enterá, como tolos paxarinos qu’anden peles nueses aldees: beraninos, mariagracíes y fasta gurriones. Lo q’ esmolez nun ye que desanicien per se, sinón que toes estes especies tienen un papel más importante del que se-yos da. Por exemplu, munchos son insecticides naturales que funciones 24 hores al día y 365 díes al añu. El beneficu pal campu ye incalculable, pero la xente nun lo ve.

Otra triba de datos que nos esmolez ye que hai delles especies que tán aumentando los sos númberos y distribución. Son especies propies de climes más secos y cálidos, y que nos recuerden qu’el planeta nueso ta acaleciéndose y qu’el futuru paez perprietu si non camudamos la situación.

Nel casu del faisán montés, un animal mui carauterísticu de los montes d’Asturies, ¿tán tomándose les midíes necesaries pa evitar el so desaniciu?

La verdá ye qu’a nós paeznos que non. Cuantayá que llevabamos avisando del enclín de la especie y naide paeció tomar notar, arremangase y ponese a trabayar por mor a la so recuperación, dalgo que yá paez imposible tres años d’inmovilismu. Depués de nun poner frenu a años de furtivismu, de permitir el sobrepastoréu del monte, de nun poner frenu a la superpoblación de venaos y xabalinos –qu’aumentaron, por ciertu, por que se cargaron a los sos depredadores–, d’años de permisos pa nueves pistes forestales y valtos nos fayeos..., agora acordámosnos de Santa Bárbola y facemos proyeutos Life y un centru de cría –con aves sacaes del monte– que ye un fiascu, nel que malapenes foron quien sacar pitos alantre. Sábese que fai falta soltar añalmente bastantes más páxaros que los cuatro del añu pasáu, y manteníu nel tiempu, pa llograr una recuperación. Danos la impresión de que ye la escenificación de la crónica d’una muerte anunciada.

¿Hai otres especies que tean n’especial peligru?

Munches, anque nun son tan célebres. Por exemplu, toles aves marines qu’añeren nes nueses costes tán en riesgo seriu de desaniciar; les propies de los bosques, ente les que ta’l faisán montés, tienen problemas pola perda d’habitát; les insectívores que nomé antes lo mesmo… En xeneral, tolos grupos d’aves tienen dalguna o toles sos especies en riesgo de desaniciu. Esto nun lo dicimos dende la inorancia; tenemos datos que lo sofiten  y tán ehí pa velos, amás de los d’otres entidaes –universidaes y otros grupos– que sofiten la nuesa tesis. El tema esmoleznos de verdá, yá que la vuelta p’atrás ye perdifícil, anque nun irreversible del too.

En xeneral, ¿cómo ye la salú de les aves n’Asturies?

L’avifauna asturiana tien una salú media tirando a mala. Dalgunes especies fueron p’arriba, como los coríos por mor, en parte, a la esistencia de los refuxos de caza. Otres tán estables, pero les que tán mal tánlo de verdá: especies qu’antes que nes nueses tierres tenién bayura, agora son rares o escases. Mesmamente el cuquiellu cada añu ye más escasu, y sentir los son cantos ye cuasi llotería. El problema ye que nun val de nada qu’el médicu te dea xarabe pa la tos cuando te duel un pie. Eso ye lo  que pasa n’Asturies y en más llugares: adóptense midíes equivocaes o pásase, ensin más, déxandolu pal siguiente que venga.

¿Cuáles son los sos principales peligros?

La perdá de hábitat ye’l más gordu. Si te quiten la casa y el moo de vida, vas pasalo permal; acabes malviviendo o muertu. Les soluciones en munchos casos nun precisen de grandes gastos de perres, como alegen munchos, sinón que pasen por nun siguir faciendo más dañu y dexar que la natura obre por sí sola. Otros peligros afeuten a especies concretes, como la caza furtiva, la contaminación, el cambéu climáticu y una llarga retafila d’ agresiones.

¿Qué  habría de facer l’Alministración pa preservar esta fauna?

Lo  primero, poner en marcha los planes de manexu de les especies en peligru, qu’ellos mesmos diseñaron pero que nunca punxeron en marcha. Otres midides, facer cumplir les lleis, qu’hai munches; tenemos les autonómiques, les nacionales, les europees y les internacionales, y toes son papel moyáu. Munchos críticos dicen que nun hai perres, pero pa munches actuaciones nun se precisen grandes inversiones; ye más, hai veces que tolos ciudadanos sacamos provechu d’elles como con, por exemplu, el turismu verde. Esto sábenlo los hosteleros de zones como Somiedu o Picos. N’España y n’Asturies, como  pa otres coses, nun tamos a nivel de los países del nueso entornu.

¿Cómo principió vusté a interesase poles aves?

Yo, como munchos otros, maravíllome poles pequeñes coses del  día a día. Esto fai que fixe la mio atención na natura; nun sólo nes aves, sinón en más aspeutos. Esta sensibilidá, ente otros, ye lo que nos mueve a tratar d’ameyorar les coses, porque queremos siguir viendo cómo los beraninos pruyen nes pomaraes.

¿Cuántu tiempu dedica a la observación?

La vida dexa a ún poco tiempo, polo que cada día trato d’atopar, anque seya media hora, pa salir al campu. Munches vegaes nun ye’l tiempu que dediques, sinón que lo disfrutes plenamente.

El nome oficial de l’asociación ye n’asturianu. ¿Respétase d’igual forma los nomes autóctonos de les aves?

Too ye consecuencia d’esa sensibilidá de la que falé: somos sensibles a lo que pasa al nueso alredor y, por eso, nun podemos dexar morrer tampoco lo nuesa cultura. La COA ta comprometida col desendolque de la llingua, na midida de lo posible, y los nuesos estatutos contemplen al asturianu como llingua oficial xunto col castellanu. Esto valiónos pa que dalgún sociu colase enfadáu, lo que ye una pena, pero ye lo que quiximos los socios.

Los nomes de les aves ye otra cara de la moneda. Nel ‘Atlas de Aves Nidificantes de Asturies’, recién asoleyáu, dánse los nomes propuestos por nós pa les aves asturianes, que son frutu del trabayu d’un grupu d’espertos nel tema. Amás, nel ‘Annuariu’ damos la toponimia tradicional y correuta. Esto también fizo que dalgunos dexaren de collaborar, otra pena, pero creemos qu’igual que queremos conservar al faisán montés cantábricu, también hai que guardar lo nueso, que pasa pola toponimia, los nomes d’aves y la nuesa llingua, na midida de lo posible.  

¿Son éstos habituales ente los ornitólogos o tienen mayor pesu los castellanos?

Por desgracia, non. Los nomes normativos castellanos lleven munchos años y ficieron güelga. Va dellos años, fici un pequeñu estudio sociollingüisticu, cola fin d’estudiar esto mesmo, y el resultáu foi triste nesti sentíu: la mayoría nomen les especies según la norma castellana. Hai muncho qu’andar; tenemos que tomar el modelu de los gallegos o catalanes, que tienen les sos llistes y toos úsenles…

¿Tienen pensao entamar dalguna actividá pa promover los nomes asturianos de les aves ente los aficionaos?

De mano finar la llista coles especies que nun añeren, sinón qu’ivernen o pasen per equí.

Les persones interesaes en collaborar o asociarse a la COA, ¿cómo pueden facer?

La nuesa web da tola información, actividaes, forma de sumase a los nuesos proyeutos, direiciones y demás. Invitamos a toos a participar d’una u otra manera, yá qu’hai llugar pa toos, tean el nivel que tean, o vengan del llugar que vengan.