Elipe: “Con ‘Ente la niebla’ nun fiximos otro que ser fieles a la filosofía cola que nacimos y que nos acompañó estos años”

“Ye un exerciciu de memoria colectiva que creyemos necesariu”, apunta Xune Elipe (Villalegre, 1962), sobre ‘Ente la niebla’, el llibru-discu de Dixebra que cuenta y canta la historia de les clases populares asturianes. Una edición de luxu con parte lliteraria, artística y, cómo non, musical col sellu tan carauterísticu d'una banda con 35 años de vida.

¿Ye ésti'l trabayu más ambiciosu de Dixebra?

Siempre intentemos ufiertar productos de calidá, tanto musical como lletrísticamente o nos formatos. Creyemos que'l fechu d'emplegar pa la nuestra creación la llingua asturiana esíxenos un plus de responsabilidá…, facer ver a la sociedá que n'asturianu tamién se pueden xenerar obres d'igual o mayor valir qu'en cualquier otra. Con 'Ente la niebla' abúltanos que queda claro esto que comentamos, ye un trabayu mui pensáu, cuidando tolos detalles, con espíritu multidisciplinar (musical, lliterariu, históricu, gráficu, etc.) y nel que más tiempu y recursos echemos con respectu a tolos nuestros anteriores.

¿Cómo se maduró'l proyeutu?

Escomencemos a pensar nello depués del últimu conciertu enantes de la pandemia. Decidimos daquella facer dalgo especial, apetecíanos muncho trespasar en cierta manera les nuestres propies llendes y dir más allá. Dímos-y vueltes a esta idea y surdió entós el tema de contar/cantar la historia de les clases populares asturianes, a partir d'ehí principemos a trabayar nello y fuimos perfaciendo y concretando lo que queríemos presentar. En llegando l'andanciu del COVID tuviemos que suspender los ensayos presenciales pero siguimos trabayando como pudimos y aquella idea primera foi ‘engordando’. En cuantes tuviemos los cantares yá compuestos decidimos da-y un calter multidisciplinar al productu final, axuntar nuna mesma obra música, lliteratura, historia, fotografía, ilustración... Y, por últimu, que'l formatu fuere los más aparente posible; asina surdió esti llibru-discu de lluxu que, ensin falses modesties, paeznos que ye una obra mui relevante nel mercáu cultural del país. Foron más de dos años y mediu de trabayu pero pagó la pena.

¿Por qué vieron necesario contar d'esta manera la historia de la clas obrera asturiana?

Ye un exerciciu de memoria colectiva que creyemos necesariu. Munches veces damos por sabida esta trayectoria de llucha y compromisu social del pueblu asturianu pero, como diz el cantar, otres dílise 'ente la niebla' y paez que se nos escaez. Recuperala y caltenela encesa ye fundamental pa saber quién somos y d'au venimos como sociedá; el sistema imperante quier inculcanos que la única respuesta posible ye l'adaptación al mesmu y la salida individual, pero los asturianos y asturianes tenemos detrás nuestro una historia y un bagaxe onde prima la solidaridá y la busca de soluciones colectives. Per otru llau, les xeneraciones más nueves nun tuvieron oportunidá de conocer en fondura tou esti camín percorríu a lo llargo del tiempu pol nuestru pueblu; dá-yoslu a conocer y faceles conscientes d'ello, convertinos en tresmisores de la herencia que nos dexaron aquellos homes y muyeres, yera cásique una obligación pa un grupu como Dixebra... Nun fiximos otro que ser fieles a la filosofía cola que nacimos y que nos acompañó toos estos años.

La pandemia retrasó enforma la salida, mui esperada vistos los datos de la preventa.

Sí, el procesu allargóse más de lo previsto. Ente la complexidá d'un trabayu como ésti, con una ventena de temes y un llibru de más de cien páxines, más tolo asociao a la pandemia –imposibilidá d'ensayar, restricciones, confinamientos varios, etc.– retrasóse considerablemente la so salida. Sicasi, l'acoyida nun pudo ser meyor, non solo poles ventes sinón poles crítiques recibíes y la consideranza que tuvo ente'l públicu y los medios.

¿Quién participa nél?

Pues directamente más d'una trentena de persones, a les qu'hai que sumar amás toes aquelles que collaboraron puntualmente o echáronnos un gabitu nun asuntu concretu. Nel planu lliterariu contamos col escritor Pablo Texón y na estaya que llamamos 'Estaferia' aporten testos los historiadores Rubén Vega (probablemente'l mayor espertu sobre la clas obrera asturiana), Faustino Zapico y Rafa R. Valdés, los escritores Xosé Miguel Suárez y Marta Mori, l'arqueóloga Irene Faza y la técnica en normalización llingüística Penélope Miranda. Toos y toes ellos y elles aporten el so puntu de vista y traten aspectos estremaos que complementen amañosamente lo que queríemos espresar con una obra como esta y lo qu'hai detrás d'ella. Ensin escaecer l'aportación fundamental de los ilustradores, que-y dan un plus artísticu al productu final pervaloratible: Miguel Solís Santos (que tanto nos ‘dibuxaría’ nos nuetros comienzos), Alfonso Zapico (ye un honor contar col so talentu), Ruma Barbero (un compañeru de fatigues que queríemos tuviera presente) y Nieves González (una figura emerxente de la ilustración n'Asturies). Nel planu estrictamente musical llamemos pa collaborar a compañeros y compañeres que yá lo fixeren anteriormente n'otros discos o que pensemos nellos pa dalgún tema concretu: Rubén Bada, Jose Tejedor, Toño Gómez, Lluci Palomares (Corquiéu y Muyeres), Javi Tejedor, Sandra Lusquiños (Alexandra in Grey), Bárbara González-Quevedo (Alienda y Muyeres), Irene Muñiz, Pablo Sánchez y Rocío Berrio.

No musical ¿qué vamos atopar?

Pues la filosofía 'dixebriega' de siempre pero diendo un poquiñín más allá... Na nuestra trayectoria caracterizámonos por tener un estilu mestizu y de fusión onde entren ritmos y aires bien distintos: punk, rock, folk, ska, reggae, metal o funk, ente otros. De too ello hai nesti 'Ente la niebla', nel que cuidamos al detalle tolo relativo al soníu y los arreglos, como tamién na producción (na que Sergio Rodríguez de Tutu Estudios foi fundamental). Por destacar dalgo, podría rescamplar l'aspectu vocal, tanto na voz solista como nos coros, nel que trabayemos abondo y nel que llogremos un mui bon resultáu.

La tendencia xeneral agora ye sacar temes sueltos y ustedes apuesten por un álbum conceptual.

Nesti sen, vamos a contracorriente... Anguaño lo avezao na música ye asoleyar canciones úniques cada ciertu tiempu pol aquello de tar d'actualidá lo más que se pueda. Nós nun nos debemos a la lóxica del mercáu y, poro, podemos facer trabayos más posaos y complexos. Una banda como Dixebra, cola nuestra trayectoria, nun encaxa mui bien con esa manera d'entender la música; nun nos víemos entrando nesa dinámica de publicar un tema agora y otru dientro de tres meses, menos nun trabayu como esti nel que toles pieces tienen un nexu común y hai qu'escuchales en conxuntu pa poder entendelu y aprecialu dafechu.

El direuto tamién garra importancia nos años últimos na escena musical. ¿Va haber sopreses?

Nes actuaciones tamos faciendo un equilibriu ente los temes nuevos y los nuestros 'himnos' de siempre. Tocamos aproximadamente la metá de les pieces que faen parte d''Ente la niebla', amás d'aquellos cantares que nun podemos dexar de llau porque si non el nuestru públicu diba enfadase seriamente. De xuru que va haber xente qu'eche de menos esti o aquel tema, pero con un repertoriu tan estensu como'l nuestru ye dalgo inevitable.

Na grabación yá participó Sergio Álvarez, el batería nuevu de la banda. ¿Qué tal foi l'adaptación?

La verdá que'l relevu producióse de manera mui natural, yera un amigu al que conocíemos de va tiempu y dende'l primer momentu supo entender qué ye Dixebra musicalmente y la nuestra manera de trabayar.

'Ente la niebla' sal coincidiendo col 35 aniversariu del grupu. ¿Esperaba cuando entamó con aquel ensayu en Castañeda un percorríu como ésti?

Daquella, cuando nacimos como grupu, fixímoslu cásique de manera intuitiva más que como dalgo bien estructurao y pensao. El casu ye que, col correr del tiempu, axuntámonos un nucliu qu'arreblaguemos penriba de toles torgues y problemes qu'un proyectu como'l nuestru diba atopar nel camín. Nun yera dalgo fácil nun contestu como l'asturianu qu'una banda de les nuestres característiques musicales, llingüístiques y ideolóxiques se caltuviera nel tiempu, pero demostremos que teníemos capacidá de resistencia y voluntá de continuidá. Otra cosa ye que trés décades y media depués sigamos tovía equí. En Castañeda naquellos primeros díes primaba la urxencia y lo inmediato. Enxamás nos dio por pensar que nel 2022 taríemos presentando'l nuestru discu númberu diecisiete (ente LP's, EP's, directos y recopilatorios).

¿Con qué se queda de toos estos años?

Cola sensación de que cumplimos abondosamente l'oxetivu col que nacimos, qu'ayudemos a esparder un discursu favorable a la llingua asturiana y contribuyimos a qu'una parte de la mocedá – y depués de la sociedá en xeneral– garrare conciencia de lo que significaba ser y exercer d'asturianos y asturianes. Per otru llau, creo qu'ún de los nuestros llogros foi trescender l'aspectu meramente llingüísticu, faciendo que'l públicu s'interesare na propuesta de Dixebra non tanto pola llingua qu'ermplegábemos sinón polo que dicíemos.

¿Dixebra tien cuerda pa otros munchos más?

Too tien un principiu y un final. El día que decidamos dexalo fadrémoslo de manera natural y ensin esparabanes; ta claro qu'una banda como Dixebra nun puede reconvertise nuna propuesta pa teatros... Lo nuestro ye'l directo intensu, blincón y mugorientu; mentanto podamos siguir ufiertándolu vamos tar ehí.

Depués de la presentación del discu n'Uviéu, ¿ónde vamos poder ver a la banda?

La verdá qu'esti añu preséntase movíu, yá tenemos unes quince feches pa la primavera-branu y delles más acutaes. Vamos tar en llugares como Cabrales, Soto Ribera, Tresona, Bimenes, Avilés, Villaviciosa, Morea…, amás de festivales en Cantabria, Galicia o Ibiza.

¿Va haber conciertu especial pol 35 aniversariu?

Hai intención d'ello, pero de momentu tamos centraos na xira de presentación. Esperemos que se dean les circunstancies pa poder entamalu a lo llargo del añu.