Desiderio Díaz: “Tar afiliaos a la Española trae munchu trabayu y nun nos da más que problemes”

L’asamblea de la Federación de Bolos del Principáu d’Asturies decidió salir de la Española la selmana pasada con 68 votos a favor, 6 en contra y 4 astenciones. José Desiderio Díaz López (Pumarabule, 1933) ye’l so presidente.

¿Qué foi lo que se decidió na asamblea estraordinaria del pasáu 11 de marzo?
 
La salida de la Federación Española de Bolos, de la que nun queremos saber nada, anque lo correuto ye dicir que lo que l’asamblea decidió foi la non afilación a la Federación Española de Bolos. Tamién aprobamos una derrama por un valor de 6.000 euros, les perres que la Direición Xeneral de Deportes nos quitó de la sovención.
 
¿Qué supón esta decisión?
 
La decisión que tomamos supón que cada ún vamos dir pel nuestru llau. La Federación de Bolos d’Asturies crease nel 1962 y, enantes, nel 1928, anque nel 36 desapaeció pola Guerra Civil. Tres la contienda hai una puxanza de los bolos como nunca, pero nun tuvieron manera de crear la Federación. ¿El motivu? Nun lo sé, pero paez increíble qu’ésta nun se fixera al igual qu’asocedió con otros deportes. Mira si había afición a los bolos n’Asturies que los periódicos del añu 40 señalen que la estrella de tolos actos de les fiestes de San Mateo, n’Uviéu, yeren los bolos: montaron una bolera na plaza toros y acudieron 3.500 persones.
 
Nel añu 1962 por fin se crea la Federación de Bolos d’Asturies. Hai que tener en cuenta que se fala de la pallabra ‘bolos’ porque los bolos n’Asturies yeren la cuatriada. Quién la creó nun conocía más porque yera lo qu’había; namái sabía d’otres modalidaes que se xugaben en pueblos el día de la fiesta. L’únicu xuegu que se prauticaba n’Asturies con un pesu y historia similar yera’l bolu palma en Ribadeva, les dos Peñamelleres y Llanes. Por eso nun se-yos ocurrió llamalo ‘Federación de Cuatriada’, porque se sobreentendía. Güei n’Asturies hai 15 modalides de bolos, ocho federaes –cuatriada, bolu vaqueiru, bolu celta, batiente, bolu palma, rodáu, bowling o bolo americanu y bolu lleonés–, que foron viniendo poco a poco. Cada modalidá tien el so campeonatu, quitando los del lleonés, y toles selmanes hai partíes. Namái se paraliza venti díes d’avientu y venti de xineru porque hai que tramitar les fiches. Ello crea un trabayu que nun hai quién lo resuelva. Pa comparar, ye como si nel fútbol hubiera ocho modalidaes distintes. Güei alcontramos que, namái en gastos de xestión, tenemos 47.000 euros.
 
¿Cuándo s’incorporaron a la Federación les otres modalidaes?
 
Al añu de crease la Federación, batiente, que se xugaba en Pravia, pidió entrar nella y aceptáronlo. Nun tenía rangu nengún; namái el día de la fiesta diben allí con trofeos y cubríen les fiches. Llueu, pal 79 o 80, entró’l bolu Tinéu, qu’agora se llama bolu celta; depués llegó la Federación de Bolos del Oriente d’Asturies, de bolu palma, qu’esistía dende l’añu 42; el bolu vaquieru, que se xuega en Degaña y Cangas del Narcea; el rodáu; y al final el bolu lleonés y el bowling. Polo tanto, la Federación hasta los años 80 yera sólo cuatriada, cola peculiaridá del batiente.
 
Pero, ¿qué lleva a l’Asturiana salise de la Española?
 
Llegamos a un estremu nel que’l trabayu que xenera la Federación nun hai quién lo mantenga. Hai dos persones afiliaes y tres que vamos tolos díes a la Federación a trabayar porque toles modalidaes dan muncho trabayu. Nun podemos escluyir nenguna porque toes forman parte de la cultura asturiana y tenemos qu’atendeles toes; poro, lo que tenemos que facer ye soltar llastre pa que’l barcu nun funda. No humano y no económico ye imposible mantener eso. Tar afiliaos a la española crea muncho trabayu y nun nos da más que llíos y problemes. Nengún beneficiu. Por ello, la xunta direutiva acordó dixebrase de la Española, de derechu, porque de fechu yá tamos separtaos. Namái se mandaben 200 llicencies de les 1.500 que tenemos, y les llicencies a la Española mándenles los deportistes o les peñes, que tán nel so derechu: yo pago la mio llicencia de la territorial asturiana y llueu digo que quiero pagar la llicencia tamién de la Española. Esa voluntariedá lleva a que namái 200 quieran tar, lo que de dalguna manera yá ye un absurdu. Nun-yos interesa porque la Española nun da nada.
 
Si vamos a razonar, la Federación Española de Bolos nun tien sentíu porque los bolos son autóctonos. El bolu palma ye de Cantabria y xuégase namái allí; y llueu dalgunos cántabros emigrantes que lo xugaren en Madrid y en Cádiz, mayores yá. Y la cuatriada, ye Asturies. Que yo conoza, namái hai cuatriada nel Centru Asturianu de Torrevieja, mineros que foron pa Bélxica y los centros asturianos d’América, onde los bolos sirvieron pa xunir a los asturianos emigrantes; pero cada vez xuégase menos.
 
Nesti aspeutu, hai que destacar que los bolos n’Asturies nun ye deporte, sinón cultura. Con esto nun quiero dicir que tolos deportes nun sían cultura; lo que sí digo ye que si Ortega y Gasset dicía que “cultura es lo que los pueblos crean y le dan dimensión universal”, los bolos ye cultura porque creáronlos los asturianos y dieron-yos una dimensión universal que pasó l’Atlánticu y instalóse con boleres en México, Venezuela, Uruguai, Arxentina… Si los bolos n’Asturies nun tienen el cartel de cultura, poco tienen qué facer porque hai 55 federaciones y otros tantos deportes, dalgunos tan arraigaos na televisión y na prensa que poco se pue competir con ellos.
 
Cuando’l mio equipu y yo llegamos a la Federación de bolos, ésta taba resquebrada: había un embargu de cinco millones de pesetes en maxistratura y tenía 700 llicencies. Diba en picao porque hai dos xeneraciones que nun conocen el xueu de los bolos. Los pas de güei nun los conocen y nun pueden tresmitir los sos conocimientos a los fíos. Nel decálogu que llevamos a les eleiciones dexábamos claro que debíamos concienciar al Gobiernu que los bolos son cultura y, como tal, la so obligación ye velar por ella. Si hai autonomíes y l’autonomía nun vela pola so cultura, val más que nun les haya. Polo tanto, hai que llevar los bolos a los colexos pa que los guah.es conozan el xuegu de los bolos; non que los práutiquen, sinón que los conozan. Llueu si quieren xugar yá pueden apuntase a una peña, pero si nun faes eso, los neños enxamás van tener conocimientu de los bolos y la cadena que yá ta rota sigue rota pa tola vida. Nesti sentíu, dalgo conseguimos nestos años, sobre too cuando taba Riopedre n’Educación, que nos ayudó muncho. Pero llueu tamién hai una cosa, que los profesores d’Educación Física tampoco conocen los bolos, polo que tenemos que mandar nosotros monitores. Otres de les nuestres peticiones a la Conseyería ye que, cuando haya oposiciones pa mayestros, haya un programa que sían los bolos.
 
La decisión de marchar de la Española yá la tomaron l’añu pasáu, pero la Direición Xeneral de Deportes impugnóla.
 
Sí, impugnóla porque l’artículu 72 de la Federación diz que pa camudar los estatutos y los reglamentos fai falta la metá más ún de los miembros de l’asamblea, que ta compuesta por 133 y, como ye normal en toles Federaciones, nun acuden toos a les asamblees. Pero l’artículu 27 señala mui claro que, en primera convocatoria, ye necesario esa metá más ún; en segunda, la cuarta parte; y en la tercera, el presidente, el secretariu y un vocal. En primer llugar impugnen por esto y nosotros nos defendimos señalando que dende la constitución de la Federación nel 62, ésta siempre se rixó pol 27: esto significaría que nenguna modificación de los reglamentos fecha hasta agora, serviría. ¿Por qué si nunca impugnasteis nada vienes agora y  faeslo? Al final, pa nun metemos en más llíos, decidimos dexalo pasar, pero la situación ye insostenible y decidimos ratificar esa decisión y salinos. Los gastos de xestión son de 47.000 euros; de llicencies obtenemos 35.000 euros y la conseyería da esti añu 31.000 euros, lo que suponen 66.000 euros.
 
Nesti puntu quería destacar que la nuesa sovención de la Direición Xeneral de Deportes, que tuvo conxelada per 11 años mentes les d’otres federaciones xubíen, yera de 42.000 euros. Cuando nosotros protestábamos, dicíennos que pal númberu de llicencies que teníemos yeremos los más favorecíos en proporción, pero eso nun ye verdá porque nós nun teníamos 42.000 euros, sinón 2.945.000 millones de pesestes por Deportes y 3.500.000 por cultura. Onde taba la tonada, la gaita y el tambor, taben tamién los bolos, pero cuando llegaron los dirixentes actuales al Gobiernu, xunieron les dos cantidaes en Deportes pa dicir que daben 42.000 euros. La decisión de dar perres a los bolos como cultura foi de Marqués: “a los bolos, en Deportes, hai que da-y lo que-y correspuenda y, llueu, en Cultura hai una partida pa defender los elementos culturales propios”. Inclusive, el dineru que recibíamos per Cultura yera mayor que per Deportes.
 
Llueu, cola Direición Xeneral de Deportes hai otres histories detrás como un espediente que m’abrieron, tres les protestes del presidente de la Española José Luis Boto, y el direutor xeneral de Deportes, Misael Fernández Porrón, porque autoricé a cuatro peñes de bolu palma que decidieron organizar un campeonatu’l día de la fiesta cola presencia de xugadores de Cantabria pa promocionar los bolos, dalgo a lo que nun concibo negame. Nun hai per ónde lo garrar.
 
¿Llegó a haber amenaces dende la Direición Xeneral de Deportes?
 
A mí nun me llegaron direutamente, pero la Direición Xeneral de Deportes sí que mando cartes a los clubes pa dici-yos que si votaben pa salir nun-yos diben dar sovención pal añu que vien. La carta fixo efeutu dominó y hubo una presencia mayor que n’otres ocasiones, polo que pudimos cumplir el requisitu del artículu 72 que señala la necesidá de contar col votu a favor del metá más ún pa camudar los estatutos. Nun entiendo cómo se pue facer una cosa asina, amás sabiendo que’l 22 de mayu hai eleiciones y pue ganar el PSOE y nun ponete a ti, o qu’entren otros nel Gobiernu. Eso n’otra época podría ser entendible, pero non en democracia.
 
¿Tuvo repercusiones fuera d’Asturies la decisión de l’asamblea?
 
Sí, porque agora, col Internet, tol mundu s’entera de lo que pasen n’otros sitios. Dende otres federaciones, como la catalana, sopréndense de que’l Gobiernu d’Asturies tea contra la so propia Federación. Ta tol mundu llamándome y nun entiende qu’un pá pueda dir en contra de los sos fíos. Cuando Cantabria s'estremó de la Española l’añu pasáu, Revilla, el conseyeru del ramu y la Direición Xeneral de Deportes de Cantabria, apoyaron la salida. Mesmamente, puedo contate que l’otru día, el conseyeru de Cantabria nuna reunión col Conseyu Superior de Deportes trató’l tema y Lissavetzky dixó-y que cómo nun trataben d’iguar esta situación, a lo que respondió qu’él nun tenía nengún problema en dir un día xunto al presidente de la Cántabra a una reunión en Madrid con él y con Boto. El presidente de la Federación Cántabra, que ye de bolu palma, propunxo que tamién tuviera representación Asturies nesa reunión al xugase’l bolu palma equí. Llamóme a a mí y contesté-y que nun tenía nengún problema y, unos díes más tarde, coméntame que dende’l Conseyu Superior de Deportes queríen que fora tamién Porrón, lo que yo tamién vi lóxico. Pues dos díes enantes de la reunión llamen pa dicime que Porrón dixo a Boto qu’él va, pero que yo non. Él negó esto depués nuna carta, pero yo sé que foi él quién me vetó.
 
Hubo xente del mundu de los bolos que protestó pola decisión de l’asamblea y critica a la Federación por mirar namái pola cuatriada. ¿Qué opina d’esto?
 
Los contrarios a la salida son los de bowling, que piden que-yos demos 6.000 euros, lo que nos quitó la Direición Xeneral de Deportes, por nun dedicalos a competiciones nacionales ya internacionales cuando los bolos namái se prautiquen n’Asturies, y una persona d’un club de bolu palma, l’únicu que manda llicencies a la Española, de los nueve qu’hai n’Asturies nesta modalidá. Lo de que miramos namái pola cuatriada dizlo él. De fechu, cuatriada ye que la modalidá que menos lleva en proporción.
 
Agora coméntase que la Federación Española de Bolos va presentar un proyeutu pa la creación d’una delegación n’Asturies.
 
En Cantabria haila y funciona pela so cuenta. Yo nun veo nengún problema en que l’abran pa que vaya a ella tol que quiera dir. En Cantabria prohibieron a los que tán nesa delegación el xugar nos sos campeonatos, pero yo nun voi facelo,  igual qu’hasta agora dexamos mandar llicencia a la Española a quien quixera.
 
¿Cómo ye la salú de los bolos n'actualidá?
 
Los bolos alcuéntrense con unos enemigos enormes, que son otros deportes con mayor repercusión mediática. Nós nun podemos quexanos porque tenemos cien llicencies infantiles y vamos caminando bien. La Federación tien vida, televísense 15 partíes en direuto pela TPA, y l’únicu problema que veo nel futuru ye quién va garrar esto cuando marchemos nosotros.
 
El trabayu que más guerra me da ye’l de buscar monitores. Tenemos 70 colexos de 140 qu’hai n’Asturies, que son mui pocos, asitiaos en Siero, La Pola Llaviana, Barreos, Sotrondio, Sama, Turón y Morea. Pero en Xixón, cola afición qu’hai, nunca tuvo nada nos colexos. En La Pola Siero tolos colexos tienen la so bolera, pero en Xixón Gutiérrez Granda nun quixo faceles; dixo que quién quixera xugar los bolos que fora a la bolera, pero un guah.e si nun conoz el xuegu por sí solu nun va dir a la bolera. Y la ma y el pá, que tampoco conocen el xuegu, tampoco los traen; llévenlos al Grupo Covadonga o al Santa Olaya. Una boleruca faese y dura tola vida. Nun ye un gastu desaxeráu.