Desakato: “La música y la lliteratura faen muncho pola conservación de la cultura de los pueblos y poles llingües”

La pandemia de COVID-19 garró a Desakato col so trabayu últimu sacáu recién del fornu. Los temes de ‘La miel de las flores muertas’ animaron el confinamientu a los sos siguidores; mientres, Pablo Martínez Pérez (Posada, 1986), voz y guitarra, y los sos compañeros nagüen por volver a tocar, llevalos al direuto y poder reecontrase con ellos.

¿Qué tal recibimientu ta teniendo ‘La miel de las flores muertas’?

Tamos mui sorprendíos de l’acoyida’l discu. Esta vegada quiximos arriesgar un poco col soníu y nun sabíemos cómo diba a reaicionar el públicu, pero la verdá ye que tamos apolmonaos de les coses que la xente nos diz de los cantares nuevos, con una respuesta perpositiva.

El discu asoleyóse’l 27 de marzu, a lo poco d’entamar l’estáu d’alarma, con munchos conciertos a la vista. ¿Cómo ta afeutando la situación a la banda?

Emocionalmente ye perduro nun poder facer lo que más nos gusta, que ye tocar; más teniendo dalgo nuevo que enseñar a los siguidores. Esto, pa nós, ye difícil d’asimilar. Amás, tanto los músicos como los compañeros del equipu, la xente que trabaya con nós, tenemos una situación económica complicada per delantre y eso esmolécenos. Ye bastante frustrante nun saber cuándo vamos poder entamar la actividá, aunque tamién sabemos que lo primero ye la seguridá de la xente que vaya a venos a un conciertu, asina que nun mos queda más qu’esperar a que la situación ameyore.

¿La ‘normalidá nueva’ tardará en llegar al mundu de la música?

Agora ye perdifícil ver un panorama normalizáu a curtiu plazu, pero quiero creyer que les coses van dir camudando y que más pronto que tarde podamos volver a tocar, que ye a lo último la nuesa forma de vida. Nun ye sólo poles perres, sinón que pa nosotros la música ye más qu’un trabayu; necesitámosla, ye como una droga.

¿Cómo enfoquen el trabayu de la banda a curtiu plazu?

Tamos intentando adaptanos a esti tiempu que nos toca vivir y vamos preparar un conciertu en llinia pa la xente que quiera velo al traviés de cualquier dispositivu. Pue ser una alternativa bona pa les bandes nesta situación tan complicada que tamos viviendo y esperamos que’l públicu sofite esti tipu de iniciatives que son les que van facer que munches bandes puedan sobrevivir.

Volviendo al discu, ¿hai una evolución nel soníu de la banda con respeuto a ‘Antártida’?

Sí, creyíamos que yera’l momentu d’arriesgar, de probar coses nueves y, nesi sen, el fichaxe de Manuel Cabezalí, el nuesu productor, fizo muncho pa que’l grupu pudiese desendolcar un conceptu de soníu más ampliu. Tenemos la filosofía de cambiu constante. Vivimos la carrera de la banda como un procesu de deprendizaxe constante y por esi motivu comportámonos como guaḥes que xueguen na escuela descubriendo coses nueves. Ye lo que nos fai seguir motivaos pa facer música.

Inclúin dos temes n’asturianu, una práutica habitual a lo llargo de la trayeutoria de Desakato.

Paeznos que la música y la lliteratura faen muncho pola conservación de la cultura de los pueblos y poles llingües en particular. Dende piquiñinos sentimos música n’asturianu y eso ye dalgo que lleves dientro y qu’inevitablemente sal a la superficie. Amás tamos nun momentu perimportante pa la nuesa llingua y creyemos firmemente en qu’hai qu’usala lo más posible, ente otres coses pa desestigmatizala, porque vivimos bastantes situaciones nes que si falabes n’asturianu yeres un paletu. La tresmisión cultural n’asturianu ayuda a qu’un idioma salga del ámbitu más priváu y que se normalize’l so usu.

En conciertos y festivales como’l manchegu Viñarock, con miles de persones ente’l públicu, nunca falten dalgunos d’estos cantares y mensaxes favoratibles a la oficialidá. ¿Cómo los recibe’l públicu?

Ye peremocionante ver a un montón de xente cantando temes n’asturianu. Hai delles coses que nun entienden, pero creo que la xente de fuera tamién valora que la música tenga raigañu y que tea averada a los oríxenes. Creo que la música tien que tar siempre asociada al contestu cultural de cada grupu pa que seya dalgo verdaderu.

¿Percibe un desconocimientu de la situación del idioma fuera d’Asturies cuando salen a tocar?

Hai bastante desinformación col tema de les revindicaciones que facemos del nuesu idioma. De fechu, muncha xente nómalu bable y siempre-yos esplicamos que nos sentimos muncho más representaos cola denominación d’asturianu, pola connotación despeutiva que garró l’otru términu. Pero en xeneral suelen tar mui interesaos pola nuesa cultura y eso hai qu’agradecelo.

La gaita asturiana foi un instrumentu más del grupu nos sos primeros tiempos. ¿Por qué decidieron prescindir d’ella?

Dani yera’l nuesu collaciu y el nuesu gaiteru. Por problemes personales y llaborales tuvo que dexar el grupu y nun mos apetecía meter a un miembru nuevu na banda. Llevamos xuntos dende que teníemos 17 años y tenemos un funcionamientu mui peculiar basáu na amistá y na confianza que tenemos los unos nos otros. Paecíanos difícil que daquién de fuera pudiera amoldase a nós y probamos a siguir colo que teníemos.

Depués de consolidase como ún de los meyores direutos del Estáu, ¿qué oxetivos se marca Desakato anguaño?

Agora mesmo sobrevivir; intentar poner la tiesta a furrular pa buscar alternatives que nos permitan siguir sobreviviendo como grupu y tamién intentar ayudanos los unos a los otros no que podamos, yá que tamos pasando per un momentu difícil. Yá habrá tiempu pa pensar en más metes, de momento paezme que con éses ye suficiente.

¿Ve lluz depués de la pandemia que tamos viviendo?

De momento paez que ta perlloñe, pero quiero ser positivu y creyer que pronto taremos nuna situación diferente y podamos ver esto con perspeutiva.

Na semeya, Martínez Pérez, primeru pela derecha, nuna semeya promocional del discu nuevu de la banda.