Daniel Álvarez Prendes: “Les editoriales han ser un actor más na defensa del territoriu”

Falamos col presidente del Gremiu d'Editores d’Asturies sobre la so feria añal n’Uviéu y el sector editorial n'Asturies.

Ye’l segundu añu que’l Gremiu d'Editores d’Asturies fai la so feria añal n’Uviéu, LA FEA, un apueste por da-y visibilidá a les editoriales asturianes. Trenta y cuatro yá tán integráes nesta asociación que nun para de medrar, a pesar de la perpetua amenaza de la crisis del llibru o la suba del preciu del papel tres la invasión rusa a Ucrania.

N’Asturies.com charramos sobre estes y otres cuestiones col recién elexíu presidente del Gremiu d’Editores d’Asturies, Daniel Álvarez Prendes, tamién co-responsable de la editorial independiente Hoja de Lata.

Esti 2024 el Gremiu yá suma 34 editoriales. ¿Ye un bon númberu en comparanza con otres comunidaes asemeyaes a la nuestra? ¿Ye un sector fuerte?

Ye una cantidá increíble pa una comunidá uniprovincial como ye Asturies. Hai que destacar la cantidá pero sobre too la calidá de los sellos asturianos, con grupos editoriales grandes como ye Nobel-Paraninfo, sellos medianos clasiquísimos como Trea o KRK, pero tamién con propuestes mui sorprendentes como les de Satori, un sello comprometíu cola lliteratura y la cultura xaponeses; Duermevela, una editorial de fantasy y ciencia-ficción estupenda; o Cierva y Culiebra, el proyectu editorial del Premiu Nacinal de Poesía Moza Xaime Martínez, consagráu a la cultura n’asturianu.

Fuera del Gremiu, tamién tenemos sellos como Milkyway, verdaderu referente del manga pa los más mozos a nivel del mundu hispanofalante.

El mundu del llibru, como’l d’otres disciplines artístiques, siempre ta en crisis. ¿De verdá ta morriendo? De toes eses plagues anunciaes pal llibru: fin del papel, el llibru electrónicu, la perda de llectores, Amazon… ¿Cuála ye verdá y cuála quedó en nada?

Nun parez que’l mundu del llibru tea morriendo. De fechu, dende la pandemia espoxigó de manera curiosa y nel reciente Informe Anual del Llibru les cifres confirmen que tamos consolidando esi espoxigue. El retu ye competir con otros sectores del ociu y la cultura, como les redes sociales, les plataformes audiovisuales o mesmamente la hostelería.

N’Asturies y n’España nun parez que’l fechu de ser una persona cultivada seya un valor social, pela cueta, foméntase la figura del ignorante graciosu, que fae chanza d’ello y reivindícase como tal. L’oxetivu ha ser revalorizar el fechu cultural como tal, el valir de la llectura como fechu pausáu frente al ritmu desquiciáu que yá fueron a imponenos. Reivindicar la tranquilidá de la llectura frente a la inmediatez y fugacidá de les redes sociales ye fundamental.

N’Asturies y n’España el fechu de ser una persona cultivada nun ye un valor social, foméntase la figura del ignorante gracios

Por más que lo intentaron, quedó claro que’l llibru electrónicu será un canal más de llectura, xunto colos audiollibros o los podcast. Nun comió al llibru en papel como tolos gurús manifestaben hai venti años. Ye un complementu interesante y necesariu, pero parez que nadie nun ye pa col llibru en papel.

Más allá de si vamos ver Amazon en Siero, ¿qué supón esti xigante pal sector editorial? ¿Ta cambiando’l papel de les editoriales? ¿Ye una amenaza solo pa les llibreríes o tamién pa les editoriales?

Como tou buen xigante Amazon trata d’imponer los sos criterios. Mesmamente, ayeri rompió rellaciones col nuestru distribuidor d’ebooks. ‘Tómalo o déxalo’ ye la so filosofía. Y eso, pa un sector nel que les pautes comerciales son mui estables y tol mundu sabe qu’un llibru cuesta lo mesmo nuna gran cadena de llibreríes que na llibrería-papelería del so pueblu, puede ser perpeligroso.

La cuestión ye por qué la xente optó de manera abrumadora por un modelu de venta per catálogu propiu del sieglu XIX pero cola cara llavada, y si bramente ye sostenible –pal mediu ambiente, pa la nuestra economía, pa los nuestros profesionales– comprar per Interné un torniellu en China que va llegate ensin gastos d’unvíu.

Amazon comenzó siendo precisamente una llibrería virtual y pel momentu furrula comprando a les distribuidores de les editoriales. El peligru puede llegar el día que seyan a marcar ellos los criterios comerciales.

El 8 de marzu arrancó la segunda edición de La FEA, que s'allarga hasta mañana. ¿Cuáles son les espectatives?

Arrancamos con un homenaxe a una de les grandes novelistes asturianes, Dolores Medio, y les espectatives son dir a más con esa gran fiesta del llibru que fue la primera edición de La FEA. Trascorrales ye un espaciu maravieyosu con un encantu especial y les 31 editoriales asturianes que participamos vamos esmeranos pa que tola xente que s’avere pase un buen ratu y alcuentre polo menos un títulu que-y resulte interesante pa comprar o regalar.

Trascorrales ye un espaciu maravieyosu con un encantu especial pa facer La FEA

Tenemos una parrila d’actividaes bien curiosa, con eventos p’absolutamente tolos públicos. Dende cuentacuentos y actividaes pa la reciella hasta llibros sobre la emigración asturiana, el Real Oviedo, la meyor narrativa o poesía. Caben milenta mundos nel espaciu fermosu de Trascorrales.

Na FEA vais participar trenta y una editoriales con venta directa al públicu, esto ye, ensin les llibreries como intermediariu. ¿Molesta a los llibreros la iniciativa o entiéndese l’oxetivu?

Les llibreríes son les nuestres aliaes necesaries. Nelles vendemos los 362 díes restantes y Libroviedo –l’Asociación de Llibreríes carbayones– participó la primera edición de La FEA como convidada. Toos remamos na mesma direición y tanto la feria LibrOviedo como La FEA son oportunidaes estupendes pa fomentar l’hábitu de la la llectura ente la sociedá asturiana.

Editar n’Asturies nun tien porqué suponer editar sobre Asturies. ¿Qué se ta editando agora mesmo equí?

Efectivamente. Tenemos sellos que faen un llabor espléndidu publicando lo meyor del nuestru patrimoniu, la nuestra cultura o la nuestra gastronomía, y tenemos también sellos de La Calzada que publiquen haikus xaponeses. El compromisu común ye cola nuestra sociedá y la nuestra tierra en forma de xenerar texíu económicu cultural. Trabayamos equí, imprimimos mayoritariamente equí y pagamos equí los nuestros impuestos.

Col proverbial cosmopaletismu que sufre esta tierra dende siempre paez que cuesta que los nuestros vecinos nos valoren, pero podemos presumir de publicar lo meyor que da esta tierra y de salir a buscar fuera otres propuestes de calidá pa espublizales dende equí.

Ser una editorial independiente pue sonar romántico, pero ¿yelo? ¿Cuántes de les editoriales asturianes son profesionales y cuánto aporta esti sector a la economía asturiana?

Dos terceres partes de les editoriales viven estrictamente de la so xera como editores. Una de les necesidaes del sector editorial asturianu ye, precisamente, facer una radiografía exacta de quiénes sómos y cuánto suponemos económicamente pa la nuestra tierra.

Creamos alrodiu de dos centenares de puestos de trabayu directos

Pel momentu, l’aproximación ye que creamos alrodiu de dos centenares de puestos de trabayu directos más una órbita de varios cientos d’empleos indirectos. Tamos presentes en toles estayes culturales del Estáu y tenemos una presencia meritoria nel panorama internacional.

Los tiempos cambien: autoedición, autoxestión, comunicación a traviés de les RRSS, empreses qu’imprenten a la carta’l númberu de llibros… ¿Cuál tien que ser agora’l papel de les editoriales?

Una editorial buena ye la que busca una identidá concreta y encadarme un catálogu nesi sentíu. Hai sellos lliterarios, otros de llibros prácticos, d’álbumes ilustraos o de llibros de gran formatu y ediciones de luxu. La dixitalización supunxo la simplificación de los procesos productivos y la modernización de los llinguaxes.

Por exemplu, pa determinaes edaes puede suponer más la promoción que faiga un influencer a traviés de les redes sociales que’l suplementu cultural d’un diariu impresu. La cuestión ye tar sollerte y adaptate a la manera de furrular de los tiempos.

¿Y a nivel local? ¿Qué papel tienen que cumplir les editoriales en –y con– el so territoriu?

Les editoriales han ser un actor más na defensa del territoriu. Nun dexamos de ser empreses culturales que yá cola nuestra llabor económica aportamos a la nuestra tierra. Si pa encima esbillamos lo que de bueno tien y lo asoleyamos, yá ye fantástico.

Si damos trabayu a les empreses d’artes gráfiques de la tierra, estupendo. Pero tanto si espuplizamos en castellán como n’asturianu, si sacamos a autores de Peñamellera como d’Okinawa, facemos al menos la contribución de tener equí la nuestra sede social.

El Gremiu siempre usa l’asturianu nes sos comunicaciones, incluso nel so propiu nome o na so web. ¿Hai un compromisu concretu cola llingua asturiana dende’l Gremiu d’Editores d’Asturies?

L’asturianu ye parte de la nuestra cultura y la nuestra identidá, poro, tien qu’emplegase con normalidá en toles fasteres qu’afecten al Gremiu, tanto nel idioma de publicación como nes nuestres rellaciones orgániques. Asina lo entienden toles editoriales asociaes y lo ponemos en práctica ensin mayor disquisición.

¿En qué momentu ves agora al llibru n’asturianu?

Ye paradóxico que, al mesmu tiempu que vemos una castellanización galopante de les nueves xeneraciones, ye tamién bien granible la revalorización y naturalización del asturianu y del so usu na sociedá asturiana, sacante sectores cada vez menos influyentes nesta tierra.

El llibru n’asturianu tien un públicu piquiñucu pero fiel, que celebra la publicación de coses nueves y sorprendentes. Vieno perbién a la edición asturiana la llegada de xente mozo como son los responsables de los sellos Radagast, Cierva y Culiebra, Cuatro Gotes o La Fabriquina, que traxeron nueves idees a los proyectos clásicos y mui valoratibles como pueden ser Trabe o Saltadera.

 ‘Nunca vencida’, el magníficu ensayu de David Guardado,  supuso un fitu, porque enxamás un ensayu escritu n'asturianu llograre trescender del ñeru ruinucu de la non ficción asturiana

Mesmamente, l’ésitu de la publicación de ‘Nunca vencida’, el magníficu ensayu de David Guardado sobre la identidá asturiana, supuso un fitu, porque enxamás un ensayu escritu n'asturianu llograre trescender del ñeru ruinucu de la no ficción asturiana; sicasí, consiguió unes ventes excelentes y fue quien a abrir un debate na sociedá astur cola so tesis.

El gran talón d’Aquiles sigue siendo la non escolarización de los rapacinos n’asturianu, colo que nun hai un vezu constante de lleer n’asturianu y per ende, d’editar n’asturianu.

Hai poco que-y dabes el relevu a Ana Roza, primera presidenta del Gremiu y una figura clave nel impulsu d’esti colectivu ¿Qué tal ta diendo esi relevu?

Ana Roza fue terca na so idea de reflotar el Gremiu y fue a ello d’una manera incuestionable, a base d’un tesón y voluntarismu inquebrantables. Ensin Ana siguiríemos faciendo caún la guerra pela nuestra cuenta.

Depués de cuatro años al frente, col inevitable desgaste que supón tirar del carru, pidió dar un pasu a un llau y dexar qu’otres persones llevaren el Gremiu. Yo yá yera’l secretariu con Ana y la mi voluntá ye facer un proyectu continuista. Caltener les coses que se ficieron bien con Ana y tratar de camudar una migaya la mentalidá de los editores asturianos.

Hai que ser más ambiciosos, creyénoslo un poco más y tratar de facer proyectos más audaces, tanto no individual como no colectivo. Nun son meres pallabres combayones eses de que n’Asturies el sector editorial tien calidá. El retu ye dalo más a conocer y contribuyir a que l’hábitu de la llectura tenga más relevancia na nuestra sociedá.