Cubero de Vicente: “Son los pueblos los que salven a les llingües”

L’Asociación Cultural N’Ast, coleutivu presidíu por María Dolores Suárez Vallina, celebró la selmana pasada un conceyu abiertu pa perfilar les bases de trabayu pa los meses próximos. Javier Cubero de Vicente (Xixón,1986), responsable d’organización de N’Ast, faló con nós sobre'l resultáu d’esti aconceyamientu.
 
¿Qué valoración fai del conceyu abiertu que tuvo llugar n'Uviéu?
 
Abondo interesante tanto pola heteroxeneidá de los participantes como polos alderiques que se desendolcaron. Nunos tiempos nos que lo que foi'l movimientu de reivindicación llingüístico y cultural d'esti país ta fragmentáu en pequeños guetos desconectaos non únicamente ente ellos sinón tamién en rellación a la mayoría social, ye especialmente importante l'activación d'espacios d'alcuentru y de comunicación. Amás, les ganes de trabayar que se manifestaron como la mocedá de parte de los ciudadanos que tuvieron nesi aconceyamientu afalen a siguir trabayando con independencia del clima de paralís y pesimismu que s'estendió a lo llargo de los años últimos.
 
¿Tuvo muncha participación?
 
Bono, ‘muncho’ ye un conceutu difusu que namás adquier una significación concreta en rellación a unos parámetros que son siempres suxetivos. Nunos tiempos de completa desmovilización social no que cinca a la reivindicación llingüística l'axuntar a dieciséis persones pa falar sobre l'actual escenariu ya intentar definir unes llínees comunes de trabayu nun sé si pa dalgunos ye poco o muncho pero teo nidio qu'a lo menos dende la mio perspeutiva personal ye importante.
 
¿Qué decisiones se tomaron nél?
 
Fueron bien poques, yá que la intensidá y la duración de los alderiques torgaron el concretar munches cuestiones, polo cual dientro de trés selmanes vamos cellebrar una segunda sesión d'esti conceyu abiertu en Xixón. Pero por embargu s'algamó dir definiendo una axenda pal cursu 2011-2012.
 
¿Cómo foi la evolución del coleutivu dende’l so nacimientu hasta agora?
 
L'asociación ñaz nel añu 2007 nun contestu mui concretu, cuando determinaos sectores qu'ente otres cuestiones caracterizábense por posiciones astractamente ‘multiculturalistes’ taben en plenu apoxéu del so llideralgu dientro del movimientu en función d'un apueste ‘estratéxicu’ centráu namás nel inmediatismu de los plazos curtios y na posibilidá de consiguir una declaración d'oficialidá nuna reforma del Estatutu d'Autonomía qu'enxamás llegó a materializase pola falta d'interés de los partíos nacionalistes españoles. Y énte la evidencia de que, por mor de distintos factores, una mayoría del movimientu o bien yera abasnada nesa direición o bien yera neutralizada, surdió precisamente N’Ast pa caltener la posición del nacionalismu cultural frente a la deriva de desnacionalización identitaria de la reivindicación llingüística.
 
N’Ast d’aquella foi adquiriendo les carauterístiques propies d'un ‘cuartel d'iviernu’, centrándose especialmente na llucha ideolóxica y na publicación d'una revista d'ensayu. Y precisamente nestos momentos, cuando la situación de descomposición qu’anguaño vivimos no que yera un movimientu de reconstruición cultural mui activu, amuesa la falsedá d'aquel seudoposibilismu afitáu namás nun esclusivismu llingüísticu que nos sos análisis y táutiques escaecía hasta'l componente social que toa llingua viva implica, tamos aniciando una nuea etapa de progresivu esplegue.
 
¿N’Ast céntrase namái na llingua asturiana o toca tamién otros asuntos?
 
N’Ast concíbese como una organización sectorial –que non sectorialista– que trabaya l'ámbitu de la cultura asturiana dende la perspeutiva d'un proyeutu global de construición nacional. Tou esto implica una concepción unitaria de la llingua, de la cultura y hasta de la mesma sociedá asturiana como totalidá estructural, lo qu’entra nuna confrontación abierta coles dinámiques d'asimilación identitaria basaes na folclorización, momificación y fragmentación de los ellementos distintos que componen l'universu cultural asturianu. Poro, N’Ast, reconociendo una especial importancia a la llingua como la espresión principal de la cultura asturiana, nun entiende la reivindicación llingüística como un departamentu estancu al marxe de la defensa del patrimoniu arqueolóxicu o del desendolcu de la música asturiana, ente otros munchos exemplos.
 
¿Cuál ye’l perfil del militante de N’Ast?
 
Básicamente esisten dos perfiles medios d'asociaos. Per un llau, dende la fundación del coleutivu, vienen participando dellos vieyos militantes del nacionalismu asturianu, d'edá media, y, per otru, nos meses últimos hai dellos mozos que tán entrando na organización y que tienen que constituyir el motor de nueves dinámiques de trabayu socio-cultural.
 
¿Y el métodu de trabayu del so coleutivu?
 
Hasta agora yera mui cenciellu y asamblerariu, pero precisamente lo que se ta plantegando de cara a esti nuevu cursu ye la configuración d'una estructura más complexa onde se vaigan conformando distintes estayes de temática específica que mos permitan dir cubriendo cada vuelta más campos.
 
Ente toles campañes qu’entamó N’Ast, quiciabes la que más llamó l’atención foi’l del voluntariáu llingüísticu. ¿Qué tal ta yendo?
 
La iniciativa del Voluntariáu Llingüísticu ta furrulando en Xixón, con un pequenu sofitu de la Conceyalía de Cultura d’esti conceyu, al traviés del proyeutu ‘Afayaivos’, qu'agora mesmo inclúi a trés pareyes: una rusa y dos sudamericanes. Esperamos poder siguir afondando nesta dinámica a lo llargo del cursu viniente y dafechu tamos agora mesmo en conversaciones con asociaciones d'emigrantes pa ufierta-yos el programa.
 
¿Cuesta-y tovía a la xente arrancar a falar n’asturianu en públicu pese a conocer l’idioma?
 
Desgraciadamente esa ye una realidá constante sobre la qu’hai enforma que reflexonar y actuar dende árees bien distintes de la sociedá. Con tanta ‘posmodernidá’ dacuando paez que s'escaecieron les premises más fundamentales de la sociollingüística…
 
¿Ye una bona noticia la pretensión del Executivu d’Álvarez-Cascos de desarrollar dafechu la Llei d’Usu?
 
Dende N’Ast yá valoramos públicamente que col nuevu Executivu hebo un interesante cambiu d'actitú positivu hacia la llingua y cultura asturianes pero que, pel momentu, sigue siendo nidiamente insuficiente. Y si bien tou lo que seya avanzar na promoción de la llingua asturiana ye siempres importante, l'únicu marcu mínimu que pue permitir la revitalización de la llingua nacional ye'l de la oficialidá.
 
¿Qué opinen sobre los nomamientos de Vallaure y Álvarez Menéndez?
 
Dambos nomamientos son positivos ya significativos, yá que tamos falando de dos persones con capacidá y formación. Particularmente el de Vallaure ye bien importante, siendo mui d'agradecer que la responsabilidá de la Conseyería de Cultura recale nuna persona que na so trayeutoria vital siempre tuvo venceyada a la cultura del país.
 
¿Tien futuru la llingua asturiana?
 
Depende fundamentalmente del llabor que nos años vinientes realicemos los distintos axentes sociales que tamos comprometíos con ella. Lo que rescampla pa cualesquier persona con daqué de perspeutiva hestórica ye que nun son les llingües les que salven a los pueblos, sinón que son los pueblos los que salven a les llingües. Tou va depender de que seyamos quien a modificar determinaos equilibrios de poder, pues preste o non reconocelo, toda realidá socio-cultural ye la espresión d'una correllación de fuercies ente proyeutos antagónicos que son tresversales al conxuntu de la sociedá.
 
¿Qué midíes hai que poner en marcha p’asegurar la sobrevivencia del asturianu?
 
Podríen señalase numberoses midíes, pero solamente voi mentar los oxetivos que considero más importantes.Dende'l puntu de vista institucional, la ellaboración d'una política llingüística tresversal al conxuntu de l'alministración pública y la categorización estatutaria del asturianu como llingua oficial.Y dende l'ámbitu de la sociedá civil, el desendolcu d'una estratexa de conquista del espaciu públicu asina como la progresiva articulación d'un texíu societariu onde la llingua asturiana seya d’usu imprescindible.