Coto: “Queremos facer daqué más que sidra; aportar a la comunidá onde desendolcamos el nuesu llabor”

Acaben d’aterrizar y yá algamen el premiu popular de les Xornaes de la Sidra Natural de La Felguera. ¿Hai meyor manera de principiar l’aventura de Sidra L’Allume?

 

De xuru que non. Foi ensin dulda la meyor manera d’entamar a furrular. Algamar un premiu asina nes xornaes u tantes vegaes tuviemos ente’l públicu ye p’allegrase enforma.

 

¿Cuándo echa a andar el proyeutu?

 

Lo que ye’l llagar d’El Carbayu entamó a furrular nel añu 1990, dempués de dellos años de producción casero polos anteriores dueños, Avelino García Expósito y María Eugenia Bautista Corte. Colos años, llegaron a facese unos 60.000 llitros añales cola marca de Sidra El Carbayu.

 

La historia de L’Allume principia nun pequeñu llagar caseru, en Llantero, al llau de L’Entregu, que ye d’ún de los cuatros socios trabayadores, Adrián. Ellí xuntábemosnos tolos años los collacios pa facer la sidre n’andecha; n’ochobre pa mayar; en marzu pa corchar; y, por supuesto, n’abril-mayu pa probar el xéneru. Y tolos años dicíemos lo mesmo: “dalgún día vamos facer sidre pa vivir d’ello”. El casu ye que los años diben pasando y caún tiró de la so vida per un llau distintu –trés de los cuatro socios marchemos pa Madrid a buscanos la vida–. Y foi, dempués de munchos años, que la vida nos devolvió a la nuesa tierra por razones llaborales y diximos entós “agora o nunca”.

 

Dende’l primer momentu apuesten pol asturianu.

 

Home, supongo que, sobre manera, por dos motivos: por coherencia y por normalizar les coses na midida de lo posible. Los cuatro socios, collacios dende guaḥes, pasémosnos tola mocedá de manifestación en manifestación, yendo a tolos llaos onde se ficiera daqué pa apoyar l’asturianu. Agora que teníemos daqué que cuntar  nun lo podíemos facer d’otra manera.  

 

Y tamién como forma de comunicase que surde de la normalidá y que nagua por que se normalicen ciertes coses. La verdá ye que nun hubo muncho que falar ente nós. Surdió asina dende l’entamu y lo anormal fuera nun utilizar l’asturianu. Cuando ún deprende a falar col so pá y la so ma n’asturianu; a rellacionase colos collacios dende guaḥe n´asturianu; fala, namórase, suaña y vive n’asturianu, ¿cómo nun va poder dirixise a l’alministración n´asturianu? ¿Cómo nun va poder facer empresa n’asturianu? Eso ye lo que fai de la situación que vivimos n’Asturies dalgo anormal y un casu únicu n’Europa.

 

Llama l’atención que sían l’únicu llagar d’Asturies qu’etiquete n’asturianu nun mundu, el de la sidra, que bebe de manera direuta de la llingua del país. ¿A qué se debe esta situación?

 

Sí, que sepamos somos los únicos. Munchos de los llagareros usen l’asturianu na so vida diaria, polo menos en dalguna de les formes amestaes, y ésa ye la anormalidá de la que-y falaba. Mire, yo siempre m’alcuerdo de cuando de pequeñín diba cola mio ma y col mio pá al mélicu y, ellí, como por arte de maxa, entamaben a falar de manera totalmente distinta a como lo facíen en casa o colos collacios per L’Entregu. Yera porque al mélicu, y sobre too si yera n’Uviéu, nun se podía dir falando n’asturianu. Qué diba a pensar de nós…

 

Eso ye lo que tenemos que deprender a camudar; a llibranos de ciertos complexos absurdos, xeneraos por munchu tiempu de represión llingüística. L´asturianu nun pue sirvir namás que pa falar nel chigre, en casina o cuando tas comentando coses informales. Les distintes situaciones demanden códigos diferentes del llinguax, pero non llingües distintes. ¿Por qué nun te vas dirixir al direutor del bancu n’asturianu? Lo mesmo con un proveedor, un cliente o un mediu de comunicación.

 

Sicasí, ¿ta camudando dalgo l’asuntu?

 

Préstanos pensar que sí, pero tamién ye verdá que, amás de los cambios nes lleis, fai falta camudar tamién les formes de pensar. Si entres nun chigre y lo que se fala ye sobre manera asturiano; si la mayoría les pallabres qu’emplegamos pa falar de la sidre son n’asturianu… ¿Cómo nun va haber llagares que empleguen l’asturianu? Ye un cambiu cultural que va llevar más tiempu que camudar una llei. De toes formes, hai coses que sí que tan camudando: la revista La Sidra emplega l’asturianu, festivales –polo menos na cuenca’l Nalón– qu’empleguen l’asturianu, chigres que ponen los sos cartelos n’asturianu…

 

L’Allume tamién destaca por puxar poles pumaraes de la zona de les cuenques. ¿Ye tola mazana del llugar?

 

Les 130 tonelaes que mayemos esti primer añu salieron enteres de les dos cuenques mineres, de los conceyos de Sobrescobiu, Llaviana, Samartín, Llangréu, Mieres y Ḷḷena. Teníemoslos pernidio dende’l principiu: queríemos facer daqué más que sidra. Rellacionao colos principios cooperativistas, queríemos aportar coses tamién a la comunidá onde desendolcamos el nuesu llabor. Y una de eses coses yera la posibilidá d’echa-yos una mano a los productores de mazana de la zona. Tamién yera perimportante pa nós que la buelga ecolóxica fuera la mínima posible y nun queríemos aprovechanos de los precios más baxos a los que te pue salir la mazana o’l mostu foriatu. El contautu direutu colos proveedores de mazanes yera tamién perimportante.

 

Per otru llau, préstabanos tamién que la nuesa sidre tuviera una identidá nidia de les cuenques, y teníemos qu’entamar pola mazana. Principiamos con munches duldes sobre si diba ser posible pisar namás que mazana de les cuenques, pero dempués de patiar muncho les pumaraes de la zona, apaeció mazana a esgaya.

 

¿Foi bona la collecha 2013?

 

Pues paez que sí. Yá tenía perbona pinta pa la época de pañar y mayar, y paez que los restultaos tán a la par. Hai xente que fala de la meyor collecha en 10 o 15 años… Nós ye verdá que nun tenemos tanta esperiencia pa falar d’eso, pero colos llagares que tratemos tán percontentos y paez que ta  xenaralizada esa idea.

 

¿Qué producción fixeron nesti primer añu?

 

Nesti añu fiximos 94.000 llitros. Nun podíemos afrontar más gastos en mazana y tampoco queríemos escomencipiar con una producción demasiao grande. La idea ye, si sal too bien, dir poquitín a poquitín hasta algamar la producción de 180.000 llitros que, de momento, ye la capacidá máxima que tien el llagar.

 

¿Por qué’l nome de L’Allume?

 

Salió como un xuegu de pallabres col allumamientu, que nos abultaba mui llargo pa un nome comercial. Y mezcla’l candil de la mina con un resurdir de les cuenques mineres: una nueva lluz que allume el camín que nos queda per delantre. Tien tamién el matiz de allumase como emborrachase, asina que, dempués de da-y munches vueltes, quedónos asina.

 

¿Ónde se pue beber la sidra del vuesu llagar?

 

Agora mesmo tamos n’once chigres, diez en L’Entregu (Florida, Semáforo, El Coto, La Laguna del Río III, El Hogar, El Zamorano, El Portalón, La Güestia, Eliseo y Casa Camilo) y l’otru en Xixón (Sidrería Canteli). Tenemos dalgún compromisu pa les selmanes próximes nun chigre de La Felguera y otru más en Xixón, y, en cualquier casu, esperamos pronto tar polo menos en tolos pueblos de les cuenques.

 

Apostaron por una cooperativa pa emprender nun tiempu complicáu pa los negocios.

¿Qué espeutatives tienen de crecimientu?

 

Lo de facer el llagar en forma de cooperativa ye un poco como el porqué d’emplegar l’asturianu: casi que venía de serie. José Ignacio Fuentes Suárez, Pablo Fuentes Busto y Adrián Morán Suárez –toos entreguinos nacíos nel 1977– y yo somos collacios dende la época d’escolinos y nun víamos otra posibilidá de facer empresa que nun fuera asina, más nestos tiempos, cuando nun tenemos voz nin votu nes decisiones económiques que manden sobre la nuesa vida. Polo menos queríemos ser protagonistes del nuesu desarrollu económicu en cuanto al puestu de trabayu; decidir, acertar y equivocanos. Quiciabes tampoco supiéramos facelo d’otra manera.

 

Foi percurioso cómo en munchos de los organismos que nos atendieron queríen quitanos de la testera la idea de la cooperativa: “Pensái qu’hai que debatir toles decisiones; que ye más llento; que ye difícil llegar a un alcuerdu”. Y nós pensando, “pues eso ye polo que naguamos; por decidir, por debatir y por algamar decisiones compartíes polos cuatro socios trabayadores”. Yá que-y dicía lo de los organismos que nos ‘ayudaron’ con esta llocura, dexe que fale de la xente que sí puxó por nós: Paloma y la xente d’ASATA, que lleven la economía social na sangre; Germán, Mari Luz y tolos collacios de la FFES, que paez qu’agora quieren facenos creer que sobren cuando son más necesarios que nunca; y Verónica, del CEEI, que m’abulta que vivió’l nuesu proyeutu como si fuera’l suyu.

 

Pero ye que, amás, hai razones económiques. Ta perdemostráu que la forma de cooperativa trabaya más pola comunidá y resiste meyor la destrucción del emplegu porque antepón el mantenimientu del propiu puestu de trabayu a los beneficios; y la so propia dinámica de toma de decisiones horizontales favorez la estabilidá llaboral al repartu de dividendos. Según l’INE, mientres el 2013 el númberu de trabayadores en cooperatives xubió un 2,3 por cientu, mientres los autónomos baxaron un 0,30 por cientu y los asalariaos un 1,35 por cientu. Ente’l 2007 y el 2012, la perda d’emplegu nes empreses mercantiles foi nel Estáu d’un 20,9 por cientu, mientres que nel mesmu periodu, nes cooperatives, ésta malpenes pasó del 10 por cientu. El 80 por cientu de los trabayadores de les cooperatives tien un contratu fixu y la metá de los puestos de trabayu –y, poro, de los puestos de decisión–, tán ocupaos por muyeres. Yera más guapo, más xusto y más viable.

 

Y esto entronca cola entruga última. ¿Espeutatives de crecimientu? Tamos tovía nel asentamientu, cola idea de facenos un requexu nel mercáu, consiguir gananos la vida trabayando entre collacios y como collacios, y dir poquiñín a poquiñín… Garrándo-yos unes pallabres prestaes a los nuesos hermanos de Cerveza Caleya: “Facer sidre rico y nun facenos ricos cola sidra”.

 

Sorprende que’l vuesu sía l’únicu llagar comercial que furrula anguaño nes cuenques.

 

Ye un pelín raro, ye verdá. Húbolos y polo que paez va habelos, pero siendo una de les zones que más sidra bebe per cápita, yera una anormalidá que nun se llantara equí nengún llagar.

 

¿Tien bona salú la sidra asturiana?

 

Tienla, tienla. Resiste bien la crisis porque ye una bébora barata, social y que se da a beber en grupu. Amás tien un percorríu enorme fuera d’Asturies. Tien munches fortaleces y tamién dalguna debilidá; tien bona salú y futuru, en parte, porque tien un posu cultural y social que tresciende la cualidá de productu de consumu. Nun escaecer eso mientres se percuerre’l camín de la esportación ye la única forma de caltener esa bona salú.

 

¿En qué habría qu’ameyorar?

 

Mire, el branu pasáu nun fui quien a que m’escanciaren un culete en Llanes. Nún de los chigres entrugamos-y al camareru que por qué nun escanciaben. El mozu yera de Guayaquil y comentónos: “Nun me dexa’l dueñu, diz que si escanciamos tien que meter a otru”. Y llueu, baxó la voz, acercóse y díxonos: “Vosotros, que sois asturianos, sabréis lo que tenéis que facer meyor que yo, pero sin nel mio país tuviéremos esti fechu cultural tan distintivu y tan guapu, facíamos fiesta d’ello; tais dexándolo morrer y nun sabéis lo que perdéis nello…”.

 

Ye un poco lo que falábamos enantes: buscar formes nueves de llegar a xente de fuera qu’entá nun conoz la sidra como se merez, pero ensin sacrificar formes de facer que quiciabes seyan más sucies, más complicaes y más cares, pero que son les formes de facer que faen la sidra ser como ye.

 

¿Hai qu’apostar pola venta fuera de les nueses llendes?