Concha: "Munchos pequeños productores pesllarán cola entrada del TTIP"

L’Asociación Transatlántica pal Comerciu y la Inversión, o TTIP poles sos sigles n'inglés, trátase d'un conveniu negociáu en secretu por Estaos Xuníos y la XE que podría ser una realidá más pronto que tarde. L'abogáu Amable Concha (México, 1965) alerta sobre les consecuencies que tendría pa les pequeñes empreses y el consumidor.

¿Qué ye exautamente'l TTIP?

Un Conveniu pa facer medrar les rellaciones comerciales Xunión Europea/USA removiendo delles barreres arancelaries y normatives que segun l'Asociación faen de frenu al Comerciu y Inversión transatlántiques. Pa ello establez un sistema pa normalizar les llexislaciones y pa xulgar los pleitos entre les empreses y los Estaos.

¿En qué momentu tamos de la negociación?

El Conveniu, segun lo que filtrare Greenpeace Holanda, ta fináu na so redación y Anexos. Taría pendiente de la so aprobación. Na XE esto depende d'un procesu llargu y burocráticu. Nun val que lo apruebe la Comisión; tien que facese un Conseyu y aprobase también. Amás dellos estaos, la mayoría, someten al so control parllamentariu los trataos más importantes. Ye necesario que tolos Estaos tean d'alcuerdu pa qu'entre en vigor. Tamién pue dase que'l vetu sólo afeute al estáu o estaos que faigan el vetu –como ye el casu de Schengen–. Tamién cabe'l vetu parcial a partes del Conveniu, como paez que quier facer Francia.

¿Quiénes son los principales beneficiarios del TTIP?

Los grandes actores del comerciu internacional: los lobbys que presionaron por ello y, principalmente, la industria química y allimentaria d'USA que produz con un enfoque del riesgu, daqué que'l Conveniu recueye en delles partes.

¿Qué va suponer esti alcuerdu p’Asturies?

N'Asturies beneficiará a Dupont y a otres compañíes fuertes, pero esa normalización de la llexislación va impidir que les pequeñes y medianes empreses puedan adautase. Tien que pensase que'l Conveniu prohibe les ayudes direutes o indireutes a la esportación, o lo que ye lo mesmo, cualquier tipu de subvención, ensin la que munches empreses asturianes nun van a poder siguir.

¿Va terminar cola manera actual que tenemos de facer la cesta de la compra los asturianos?

Sí, por dos coses. Apaecerán con precios baratos productos de muncha peor calidá, modificaos transxénicamente (GM) y/o disruptores endocrinos –pal engorde– o insecticides y pesticides hasta agora prohibíos na XE. Per otro llau, desaniciaránse de delles estanteríes munchos produtos artesanales que nun se van a poder adautar. Yá pasó col maíz de México –y non sólo'l maíz, pero ésti foi'l casu más sangrín– cuando entró en vigor el NAFTA.

¿Qué alternatives-yos va quedar al pequeñu productor?

Munchos pesllarán. Otros tendrán qu'adautase a les pautes que-yos marquen daquellos que cumplan. Imaxino qu'entamarán a producir baxo la tutela y pa estes empreses que fixarán los precios de manera unillateral.

Quiciabes lo que más pue esmolecer al consumidor ye’l principiu de riesgu vixente na llexislación estauxunidense del que faló enantes, qu’acabaría cola normativa europea actual.

La Delegación USA ta enfotada en que se reconoza un 'enfoque basáu nel riesgu' y dizse en delles partes del Conveníu. Monsanto y otres grandes empreses veríen mermar el so mercáu si la cultura de proteición típica de la XE se recoyera nel Conveniu, yá que nun podríen vendese productos con sustancies prohibíes o que naguaron por elles. Amás el sistema d´investigación y la homologación ye perdiferente. Ellí ye privao y failo la propia empresa, y equí ye públicu y esternu.

Otru puntu llaceriosu ye’l papel que xugaría’l tribunal que s’encargaría d’interceder ente los conflictos ente les grandes corporaciones y los estaos.

L'aplicación del Conveniu taría en manes del Investors States Disputes Settlement (ISDS), un tribunal formáu por xuristes particulares al que se someteríen toles disputes ente empreses y estaos en rellación coles inversiones, la producción y el comerciu. Esto ye una reforma encubierta de la Constitución y ellí au yá funcionen estos tribunales los que pierden siempre son los ciudadanos porque les grandes empreses suelen ganar siempre.

¿Qué podemos facer como ciudadanos pa frenar esto que se nos vien enriba?

Tomar conciencia. Estudiar el Conveniu. Esmolecese por ello y treslladar a los políticos que tamos per esmolecíos por ello, como faen en Francia, Alemaña u Holanda. Participar na movilización social y llevar al CIS esti esmolecimientu. Entós los políticos pensaránlo más.

¿Nel Estáu qué partíos sofiten l’alcuerdu?

Que yo sepa, del Estáu sólo'l PP ta totalmente d'alcuerdu. PSOE y Ciudadanos, de perfil, y Podemos y IX totalmente en contra.