Colunga: “A día de güei, nun pautaría nin col PSOE nin con IX-LV si fóramos llave de gobiernu”

La dimisión de Valledor permitió a Roberto Colunga (Xixón,1970) la oportunidá d’ocupar el cargu de diputáu na Xunta Xeneral per más d’un añu. Tres esta esperiencia arriquecedora, llidera la llista de Bloque por Asturies-UNA a l’alcaldía de Xixón. 

¿Qué tal foi la esperiencia como diputáu?
 
La esperiencia en llinies xenerales foi positiva y arriquecedora. Per primer vez l'asturianismu d'izquierdes pudo tener voz y votu na Xunta Xeneral. Y gracies a ello, munches persones y colectivos sociales, sindicales y de toa triba pudieron tener contactu directu cola Xunta Xeneral, y pudieron ver plasmaes les sos reivindicaciones nesta institución. Amás, foi enriquecedora porque conocimos les interioridaes de la política asturiana nel día a día, y deprendimos munches coses sobre'l furrulamientu de les instituciones asturianes, lo que nos sirvió pa reforzar el nuestru proyectu.
 
A los pocos meses de tomar posesión del acta del diputáu pidió pasar al Grupu Mistu y los tres partíos na Xunta Xeneral principiaron a face-y vacíu.
 
Lo que siempre tuvimos claro nel Bloque por Asturies ye que tábemos nel Parllamentu pa defender un programa políticu col que nos comprometimos colos y les nueses votantes en mayu del 2007. Nun podíemos pasar per aprobar una Llei d'Axuste que supunxo un brutal recorte de salarios y derechos sociales de los y les trabayadores públiques y que, como tamos denunciando anguañu, nun supunxo denguna meyora nes altes cifres de desemplegu que sufre esti país. Ganamos la primer batalla, la que reconoció que la mio presencia na Xunta Xeneral como miembru del Grupu Mistu yera lexítima dafechu, pesie a les torgues que nos quinxeron poner los demás grupos políticos. Dempués d'eso, llegó'l vacíu que comentes. Les nueses propuestes pa llevar a plenu o a les distintes comisiones fueron refugaes, ensin escepción, una y otra vez na Xunta de Portavoces, muérganu colexáu que decide qué asuntos van a plenu o a comisión.
 
¿Nun-y prestó al resto de diputaos la presencia d’un nacionalista na cámara?
 
Ta claro que non. Izquierda Xunida-Los Verdes taba mui cómoda nel Gobiernu y nun quinxo aceptar el nuesu exerciciu de coherencia al abandonar el Gobiernu; el PSOE nun quería ver nin de lloñe una oposición firme y coherente dende la izquierda; y el PP paez tar mui cómodu nesa oposición blanda que vien faciendo dende hai munchos años. Ye por too esto polo que nun queríen, baxo dengún conceptu, que'l nuesu partíu pudiere llevar la so voz y les sos propuestes a la Xunta Xeneral.
 
¿Ye difícil trabayar nesa situación?
 
Pues imagina. Cuando nun te permiten que nin siquiera se discutan les tos propuestes y lo único que te queda casi ye'l derechu al pataléu, ye una migayina frustrante. Pero bono, quedamos cola sensación de que ficimos tolo que tuvo nes nueses manes, y dexamos bien claro que lo que necesita la política asturiana ye una renovación y una osixenación p'acabar col conformismu de les demás fuercies polítiques reprentaes hasta agora na Xunta Xeneral.
 
¿Cree que cumplió los oxetivos que se marcó cuando garró l’acta de diputáu?
 
Na midida na que nos dexaron, sí. Intentemos llevar al Parllamentu la voz, les desixencies y les reivindicaciones d'amplios sectores de la sociedá asturiana. Si nun lo llevemos hasta les últimes consecuencies, cómo yá comenté, ye pola censura y la represión de los demás grupos parllamentarios.
 
¿Cuál ye’l meyor recuerdu que se lleva del so pasu pela Xunta Xeneral?
 
El Debate d'Orientación Política. Ver les cares que-yos quedaron al restu diputaos y diputaes cuando-yos dixeron les verdaes a la cara, como diz l'anunciu, nun tien preciu. Y tampoco lu tien ver a Areces totalmente fuera de sí, ensin argumentos pa la réplica y nun tonu bastante faltón.
 
¿Y el peor?
 
El día que se votó la Llei d'Axuste. Nun foi platu de bon gustu tener que romper, pesie a que lo ficimos por coherencia y nun nos arrepentimos, con una coalición cola que, en llínees xenerales, tábemos trabayando bastante a gustu.
 
¿Tuvo problemes por usar la llingua asturiana na cámara?
 
La verdá que non, pero namás faltaba eso, qu'incumplieren la Llei d'Usu del Asturianu qu'esa mesma cámara aprobó hai más d'una década. Eso sí, hai que destacar que fuí l'únicu diputáu que nesta llexislatura fizo un usu continuáu de la nuesa llingua.
 
Visto col pasu del tiempu, ¿foi acertada la salida del Bloque por Asturies del pautu de Gobiernu?
 
Sí, cómo ya comenté enantes, precisamente nestes últimes feches venimos denunciando que la Llei d'Axuste nun sirvió pa crear emplegu n'Asturies. Lo único pa lo que sirvió foi pa recortar sueldos y derechos a los y les trabayadores públiques, como les ayudes que recibíen a los estudios de los sos fíos y fíes, o les ayudes por tener familiares con dalgún tipu de discapacidá. Amás, por poner namás un exemplu, pal cursu que vién va haber 1.500 mayestros menos nes escueles asturianes. ¿Ónde tán les ventayes entós d'esa Llei d'Axuste? Otra Llei que s'aprebó, col beneplácitu de PSOE e IX-LV foi la de Función Pública, que daba carta de llegalidá a la deucracia, esto ye, al nomamientu de personal de l'alministración a deu, un asuntu que'l Bloque por Asturies nun va aceptar enxamás.
 
Agora lleguen unes eleiciones nueves y vusté va ser el candidatu de la coalición Bloque-UNA a l’alcaldía de Xixón. ¿Qué sensaciones tien?
 
Una sensación d'ilusión. Ilusión por algamar representación y poder entrar como conceyal nel mayor conceyu d'Asturies. Y ilusión porque nesta precampaña tamos teniendo bones sensaciones. El contactu cola xente ta siendo mui enriquecedor y tamos recibiendo un sofitu que nun esperábemos.
 
¿Ye posible algamar un conceyal?
 
Ye posible, y quiciás non sólo algamar un conceyal, sinón dos. Si llogramos algamar esi 5 por cientu necesariu llegalmente pa entrar a formar parte de la corporación municipal, ye bastante probable qu'eso signifique la presencia de dos conceyales de Bloque por Asturies-UNA en dicha corporación, pola mayor fragmentación que va suponer tamién la casi segura presencia de Foro Asturias nel Ayuntamientu de Xixón. Col sofitu que tamos recibiendo de la xente y les bones sensaciones que tamos esperimentando, vémonos con fuercies y esperances pa sacar esa representación na Casa Conceyu.
 
¿Cuáles son les necesidaes de Xixón?
 
Les necesidaes que tien Xixón son munches y evidentes. A nivel económicu, d'emplegu, cultural... Y nesa llinia van les nueses propuestes y compromisos ellectorales. Entre otres coses, Xixón necesita un plan de vivienda llibre o desocupada que fomente la puesta a disposición de la ciudadanía el mayor númberu de viviendes posibles. Xixón necesita un Plan Xeneral de Movilidá pa fomentar l'usu de la bicicleta y l'autobus como medios de tresporte, y qu'elimine les barreres arquitectóniques. Xixón necesita una política cultural que nun tea llena d'autoodiu a lo propio, ensin dexar de mirar a lo ayeno. Xixón necesita que'l soterramientu de les víes llegue hasta Veriña, que garantice la integración de tol conceyu nun urbanismu ordenáu y nun nos obligue d'equí a poco a soterrar les víes hasta esi puntu. Eses y otres necesidaes son les que vamos defender nel nuesu programa políticu pa los prósimos 4 años.
 
Xixón siempre foi una plaza segura pal PSOE. ¿Cree posible una sorpresa’l 22 de mayu?
 
El panorama en Xixón, por desgracia, paez murniu. El PSOE ta fuertemente desgastáu poles polítiques que llevó a cau nestos últimos años y el PP, dixebráu en dos tres l'aparición n'escena de Cascos, presenta a una candidata que mostró poca capacidá na oposición p'afrontar los problemes de Xixón. Asina tá'l panorama de les dos fuercies más votaes hasta agora. Esperemos que la presencia de Bloque por Asturies-UNA sirva pa llevar alantre propuestes que meyoren la situación del nuesu conceyu.
 
¿Pautaría vusté col PSOE y/o IX-LV nel casu de ser llave de gobiernu?
 
A día de güei, rotundamente non. Muncho tendríen que cambiar les tornes nestos partíos pa qu’hubiere un programa de gobiernu que nos convenciere a dar esi pasu.
 
¿Qué-y paez el discursu rexonalista que tán tomando delles formaciones de nueva creación?
 
Falsu y oportunista. Ye la consecuencia lóxica cuando xurden esti tipu de formaciones, disgregaes d'un partíu de calter estatal. Al ser un escisión asturiana, nun-y queda otra qu'adoptar un discursu ‘asturianu’.
 
¿Tien futuru l’asturianismu?
 
Evidentemente sí. Ye por ello polo que venimos trabayando dende hai meses cola UNA y con independientes en formar una espaciu políticu dende l'asturianismu d'izquierdes, l'ecoloxismu y los movimientos sociales; porque creemos qu'Asturies necesita y reclama yá un cambiu na política, una osixenación y una rexeneración que namás pue venir dende l'asturianismu.